Уйғур аптоном районлуқ һөкүмәтниң баянатчиси “адриян зензға қануний һәрикәт қоллинимиз” дәп тәһдит салған

Мухбиримиз ирадә
2021-12-02
Share

Тонулған тәтқиқатчи адриян зенз йеқинда уйғур елида йүргүзүлүватқан лагер вә мәҗбурий әмгәк қатарлиқ инсан қелипидин чиққан җинайәтләрниң хитай дөләт рәиси ши җинпиңниң бивастә йолйоруқи билән иҗра қилинғанлиқини испатлап чиққан иди.

У “уйғур сот коллегийәси” гә намәлум бир шәхс тәрипидин әвәтип берилгән хитайниң “мутләқ мәхпий” һөҗҗәтлирини тәтқиқ қилиш асасида юқириқи йәкүнни чиқарған. Нәтиҗидә уйғурларға қаритиливатқан ирқий қирғинчилиқниң хитай мәркизи һөкүмитиниң бивастә пиланлиши вә йетәкчиликидә елип бериливатқан узун муддәтлик бир сиясий истратегийә икәнлики йәниму айдиңлишип, зор ғулғула қозғиған.

Уйғур аптоном районлуқ һөкүмәт 1-декабир күни дәрһал бир ахбарат йиғини ечип, адриян зензни қаттиқ әйиблигән. Уйғур аптоном районлуқ һөкүмәтниң баянатчиси шү гүйшяң сөзидә: “хитайға дүшмәнлики билән тонулған адриян зенз очуқ-ашкара ялғанчилиқ қилди, мунасивәтлик тармақлиримиз бу сахта алимға қарита қануний һәрикәт қоллиниду,” дегән.

Адриян зенз хитайниң “йәр шари вақти” гезити қатарлиқ таратқулирида өзигә қарши елан қилиниватқан юқириқидәк һуҗумларға җавабән: “бу мунасивәтлик тармақларниң кимликигә қизиқиватимән,” дегән.

Диққәт қозғайдиғини шуки, хитайниң “йәр шари вақти” гезити арқидинла хитайниң дөләт игиликидики хитай електрон ширкити (CEC) ниң 1-декабир күни бейҗиңда йеңи бир хил учур йоллаш вә ишхана суписи әпини ясап чиққанлиқини, “ләншин” намлиқ бу әпниң һөкүмәт органлири вә дөләт карханилирини бихәтәр тор хизмәт суписи билән тәминләп, мәхпий учурларниң ашкарилинип кетишиниң алдини алидиғанлиқини хәвәр қилған.

Көзәткүчиләр буни хитайниң юқири дәриҗилик оргәанлири чиқарған “мутләқ мәхпий” һөҗҗәтлириниң хәлқараға ашкарилинип кетишидин кейин елинған бир тәдбир болуши мумкин, дәп қаримақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт