Jang chünshyen texttin ghulighan, chén chüen'go Uyghur aptonom rayonining sékrétarliqigha teyinlen'gen

Muxbirimiz qutlan
2016-08-29
Share

Xitay kompartiyisining Uyghur aptonom rayonidiki partkom sékrétari jang chünshyenning düshenbe küni texttin ghulighanliqi heqqidiki xewer pütün dunyadiki chong - kichik taratqularda ulap bésildi.

Shinxu'a agéntliqining bu heqtiki mexsus xewiride jang chünshyenning Uyghur aptonom rayonining partkom sékrétariliq wezipisidin qaldurulghanliqi we “Ayrim wezipige teyinlinidighanliqi” ilgiri sürülgen.

Qiziqarliqi shuki, tibet aptonom rayonining partkom sékrétari chén chüen'go ürümchige yötkep kélinip, jang chünshyenning ornigha Uyghur aptonom rayonining yéngi nöwetlik sékrétarliqigha teyinlen'gen. Xewerde déyilishiche, jang chünshyen bilen bir waqitta yene ichki mongghul aptonom rayoni bilen enxuy ölkisining sékrétarlirimu wezipisidin élin'ghan. Xitay kompartiyisi yekshenbe küni yene tibet aptonom rayoni bilen yünnen we xunen ölkilirining partkom sékrétarlirinimu almashturghan.

Közetküchiler bilen siyasiy analizchilar, bu qétimliq zor tengshesh shi jinpingning xitay kompartiyisining 19 - qurultiyi échilishtin burun özining hoquq chembirikini yenimu mustehkemleshke urunushining ipadisidur, dep qarimaqta.

Siyasiy analizchilarning qarishiche, jang chünshyen xitay kompartiyisi ichidiki “Jyang zémin guruhi” gha mensup emeldar bolup, bu yil 5 - aydin buyan uning Uyghur aptonom rayonining hakimiyet sistémisida yétishtürgen bir qisim yéqinliri tazilan'ghan. Gerche shinxu'a agéntliqining xewiride jang chünshyenni “Bashqa wezipe” ge qoyidighanliqi bildürülgen bolsimu, emma chet'el taratquliri uning wang léchüen'ge oxshash “Yérim dem élish” qa chiqirilghanliqini ilgiri sürmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet