"зимистан": хитай даирилири өткән йили 100 миң парчә қуран-кәримни көйдүрүвәткән

Мухбиримиз әркин
2020-03-30
Share

Хитай даирилириниң өткән йили 100 парчә қуран-кәримни көйдүрүвәткәнлики вә шәндуң һәм ниңшяда туңганларниң икки диний мәктипини тақап, униңдики "шинҗаңлиқ оқуғучилар" ни тутқун қилмақчи болғанлиқи илгири сүрүлди.

Италийәдики "зимистан" намлиқ диний әркинлик ториниң хәвәр қилишичә, даириләр өткән йили ниңшяниң йиңчүән шәһиридики бир диний мәктәпни тақап, бу мәктәпниң 100 миң парчә қуранини көйдүрүвәткән шундақла 2019-әтиязда "шинҗаңлиқ топилаңчи, террорчиларни тутимиз" дегән баһанә билән шәндуң өлкисиниң җоңшахәй туңган йезисидики диний мәктәпни ахтуруп, бу диний мәктәпниму тақивәткән.

Хәвәрдә, сақчилар бу диний мәктәптики "шинҗаңлиқ оқуғучилар" ни тутқун қилмақчи болған болсиму, лекин мәктәптики туңган оқуғучи вә мудәррисләрниң арилишиши билән "шинҗаңлиқ оқуғучилар" ни тутқун қилиш нийитиниң әмәлгә ашмиғанлиқи билдүрүлгән. Лекин хәвәрдә бу "шинҗаңлиқ оқуғучилар" ниң миллити, уларниң кейинки әһвали һәққидә һечқандақ учур берилмигән. Йәрлик бир туңган диний зат "зимистан" ториға қилған сөзидә, "әгәр дини затлар тутқун қилинип, яш мусулманларни тәрбийәләш мушундақ чәкләнсә", "етиқадимиз кәлгүсидә тәдриҗий йоқилиши мумкин" дегән.

Хәвәрдә қәйт қилинишичә, даириләр 2019-йили 7-айда йиңчүәндики диний мәктәпни ахтуруп, униң бир қисим оқутқучи вә оқуғучилирини сорақ қилған. Шу қетимда бу мәктәпниң 100 миң парчә қуран-кәрим китаби мусадирә қилинип, көйдүрүветилгән. Шу йили 11-айда бу мәктәпму тақилип, оқутқучи вә оқуғучилири тарқитиветилгән. Хитай һөкүмити илгири туңганларға нисбәтән кәңрәк сиясәт йүргүзүп кәлгән болсиму, лекин 2017-йили уйғур районида башланған чоң тутқун билән тәң уларғиму диний чәклимә қоюшқа башлиғаниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт