"зимистан" тори лагердики нурғун уйғурниң фуҗйән өлкисигә йөткәп келинип, әмгәккә селиниватқанлиқини ашкарилиди

Мухбиримиз әркин
2019-12-23
Share

Италийәдики "зимистан" тори 23‏-декабир күни тәкшүрүш доклати елан қилип, лагердики нурғун уйғур тутқунлириниң хитайниң фуҗйән өлкисидики җинҗяң, чуәнҗов қатарлиқ шәһәрләргә йөткәп келинип, завут-карханиларда мәҗбурий әмгәккә селиниватқанлиқини ашкарилиди.

Бу җайдики учур мәнбәлириниң "зимистан" ториға билдүрүшичә, бу уйғур ишчилириниң һәммиси сабиқ лагер тутқунлири икән. Бир учур мәнбәси уларниң лагерлардин қоюп берилипла фуҗйәнгә йөткәп келингәнликини билдүргән. У "әгәр бу уйғурлар хитайниң башқа өлкилиригә берип ишләшни рәт қилса, лагерға қайтурулуп кетилидиғанлиқи" ни илгири сүргән. Бу учур мәнбәсиниң қәйт қилишичә, уйғурларниң башқа өлкиләргә йөткәп апирилишидики мәқсәт уларни "ислам дини вә әсәбийликтин хали қилип, уларниң тезрәк хитайлишишини ишқа ашуруш" икән.

Доклатта ичкиридики бу уйғурларниң назарәт астида яшайдиғанлиқи, уларниң диний ибадити чәклинип, уларға вәтәнпәрвәрлик, қанун-түзүм вә хитай тили өгитилидиғанлиқи, уларниң һәр дүшәнбә күни байрақ чиқириш мурасимиға қатнишидиғанлиқи, мурасимни сақчиларниң назарәт қилидиғанлиқи тәкитләнгән.

Бир уйғур ишчи "зимистан" ториниң хадимиға бәргән учурида сақчиларниң даим ятақ вә янфонлирини тәкшүрүп туридиғанлиқини билдүргән. Фуҗйәнниң чүәнҗов шәһиридики йәнә бир учур мәнбәси бу шәһәрдики уйғур ишчилириниң һәр күни 13 саәт ишлисиму, лекин интайин аз мааш берилидиғанлиқини илгири сүргән. Чүәнҗовдики бир уйғур ишчи "зимистан" ториға "биз һәр күни бәк чарчап кетимиз. Чүнки артуқ ишлишимиз керәк. Мәхпий ибадәт қилайли десәкму униңға вақтимиз вә һалимиз қалмайду," дегән.

Буниң алдида уйғур аптоном райониниң рәиси шөһрәт закир баянат елан қилип, лагердики курсантларниң һәммиси "оқуш пүттүргәнлики" ни елан қилған. Лекин көзәткүчиләр униң сөзиниң гуманлиқ икәнлики, лагердики бәзи тутқунларниң завут-карханиларға йөткәп кетилгән болуши мумкинликини билдүргән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт