Уйғур елидин 2500 йил бурунқи зороастир қәбристанлиқи тепилди

Мухбиримиз әркин
2013-08-16
Share


Хитай иҗтимаий пәнләр академийисиниң археологлар уйғур елиниң ташқорған наһийисидин 2500 йил бурунқи дәвргә аит зороастир "атәшпәрәслик" қәбристанлиқини тапқан.

Археологлар карбон - 14 тәҗрибиханисида тәкшүрүп, 3050 метир егизликтин тепилған мәзкур қәбристанлиқниң буниңдин 2500 йил бурун ясалғанлиқини оттуриға қойған.

Зороастир диний отқа чоқунидиған қәдимки иран диний болсиму, бирақ мәзкур динға аит қәдимий излар оттура асияда кәң учрайду.

Шинхуа агентлиқиниң хитай археологлиридин нәқил кәлтүрүп хәвәр қилишичә, қәбристанлиқтики мунбәр нур чечип турған күнгә охшитилип ақ вә қара таштин ясалған. Қара таш зороастир динидики қараңғулуқ яки яманлиққа, ақ таш йоруқлуқ яки яхшилиққа вәкиллик қилидикән.

Археологлар йәнә, қәбристанлиқтин диаметири 30 сантиметирлиқ яғач исриқдан тапқан.

Археологларниң илгири сүрүшичә, қәбристанлиқниң қурулуши вә униңдин тепилған буюмлар зороастир дининиң асаслиқ алаһидиликлирини әкс әттүридикән.

Қәбристанлиқтин йәнә, мессопатамийәдин кәлгән кәһрива, юң тоқулма, йипәк кийимләр тепилған. Мәзкур буюмларниң бир қисми ирандин кәлгән, йәнә бир қисми оттура асияниң йәрлик буюмлири болуп, бу уйғур елиниң қәдимки мессопатамийә вә иран билән болған қоюқ мәдәнийәт алақисини чүшәндүрүп беридикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт