Генерал зунун тейипоф туғулғанлиқиниң 100 йиллиқи әскә елинди

Мухбиримиз үмидвар
2017-08-06
Share

Йеқинда қазақистанда уйғур тилида чиқидиған җумһурийәтлик "уйғур авази" гезити 1945-1949-йиллиридики миллий армийиниң муавин баш қомандани зунун тейипоф туғулғанлиқиниң 100 йиллиқи мунасивити билән униң қизи мубарәк зунун қизи тәрипидин йезилған мәхсус әслимә мақалисини елан қилди.

Мәзкур әслимә мақалисидә қәйт қилинишичә, зунун тейипоф әсли қазақистанниң алмата вилайитиниң яркәнт шәһиридә 1917-йили һал оқити яхши тиҗарәтчи аилисидә дуняға кәлгән. Башланғуч вә оттура мәктәпкичә яркәнттики рус мәктипидә оқуған зунун тейипоф 1931-йили, совет иттипақиниң бай-йәр игилиригә зәрбә бериш һәрикити мәзгилидә ата-аниси билән биргә ғулҗиға көчүп келип, һүсәнбай терә завутида ишчи болуп, ишләйду.

Зунун тейипоф 1944-йили елихан төрә башчилиқидики 12 кишилик азадлиқ тәшкилатиниң ғоллуқ әзаси болуп, 1944-йили, 7-ноябир күнидики ғулҗа қозғилиңиға актип қатнишиду һәмдә шәрқий түркистан җумһурийити һөкүмити һәрбий назарәт башлиқи қатарлиқ бир йүрүш хизмәтләрни атқурғандин кейин, миллий армийә қурулғанда полковниклиқ унвани билән муавин баш қомандан болиду.

У, дөрбилҗин, чөчәкни азад қилиш уруши вә шиху урушиға қоманданлиқ қилғучиларниң бири сүпитидә хәлқ ичидә юқири тәсир күчкә игә болиду.

Тарихий шаһитларниң учурлириға қариғанда, зунун тейипоф, 1950-йили, миллий армийә хитай азадлиқ армийисиниң 5-корпусиға өзгәртилип, шинҗаң һәрбий райони қурулғанда, мәзкур һәрбий районниң муавин штаб башлиқлиқ вәзиписини атқурған һәмдә 1955-йили, сәйпидин әзиз, мәмтимин иминоф, заһир савданоф, мәрғуп исһақоф билән бирликтә хитай азадлиқ армийисиниң генерал майорлиқ унваниға еришкән. Әмма, зунун тейипоф 1962-йили совет иттипақиға көчүп кәткән.

Униң қизи мубарәк зунунниң әслимисидә қәйт қилинишичә, зунун тейипоф 1960-йилларда совет иттипақи алий партийә мәктипидә оқуған. Кейин алмутада завут башлиқи қатарлиқ вәзипиләрдә болған. У, уйғур балилириниң өз ана тилида алий маарип тәрбийиси елиш қатарлиқ ишларға вә ғени батур вапат болғандин кейин чиләктә униң һәйкилини тикләшкә алаһидә күч чиқарған.

Зунун тейипоф 1988-йили, алмутада вапат болған. У 1970-йилларда рус вә уйғур тиллирида тунҗи қетим миллий инқилаб әслимә китабини нәшр қилдурған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт