Қазақистанда зунун тейипоф туғулғанлиқиниң 100 йиллиқи хатириләнди

Мухбиримиз үмидвар
2017-09-03
Share

Өткән һәптә қазақистанниң кона пайтәхти алмата шәһиридә 1944-1949-йиллардики миллий азадлиқ инқилабидики һәрбий-сиясий рәһбири шәхсләрдин бири, миллий армийә муавин баш қомандани, полковник зунун тейипоф туғулғанлиқиниң 100 йиллиқи хатириләнди.

Алмата шәһиридики бир ресторанда өткүзүлгән мәзкур хатириләш мурасимиға бир қисим миллий инқилаб дәври шаһитлири, зунун тейипофниң пәрзәнтлири, шуниңдәк миллий инқилабий һөкүмәттә вә миллий армийидә рәһбири хизмәтләрни өтигән тарихи шәхсләрниң әвладлири, җамаәт вәкиллири болуп, 100 дин артуқ киши қатнашти.

Алматадики уйғур җамаәт әрбаби ваққас мәмәдиноф әпәндиниң ейтишичә, мәзкур мурасимда 1947-1949-йиллири арисида ғулҗида чиққан "инқилаби шәрқий түркистан" гезитидә хизмәт қилған 90 яшлиқ уйғуршунас мунир йерзин сөз қилип, зунун тейипоф қатарлиқ миллий армийә қоманданлири вә шәрқий түркистан җумһурийити рәһбәрлири һәм қатнашқучилириниң төһпилиригә юқири баһа бәргән. Мурасимда мутәхәссисләр, зунун тейипофниң пәрзәнтлири сөз қилип, тарихи шәхсләр, җүмлидин зунун тейипофқа охшаш миллий армийиниң қурулуши вә раваҗлиниши үчүн һәссә қошқан командирлар, җүмлидин азадлиқ йолида һаятидин айрилған җәңчи-офитсерларни әсләшниң кейинки әвладларниң тарихни унтуп қалмаслиқи үчүн муһим әһмийәтлик икәнликини билдүрүшкән.

Зунун тейипоф 1917-йили, қазақистанниң яркәнт шәһиридә туғулған, 1930-йилларда аилиси билән ғулҗиға көчүп кәткән болуп, у 1944-йили қурулған "азадлиқ тәшкилати" ниң ғоллуқ әзаси сүпитидә ғулҗа қозғилиңиға актип қатнашқан.У 1945-йили, 8-апрел күни миллий армийә қурулғанда муавин баш қомандан болуп, чөчәк, шиху урушлириға қоманданлиқ қилишқа қатнашқан. Зунун тейипоф 1949-йилиниң ахирида хитай компартийисини уйғур диярини игилигәндин кейин қурулған "шинҗаң һәрбий райони" ниң муавин штаб башлиқи болған вә 1955-йили, генерал майорлуқ унвани берилгән .У 1961-йили, совет иттипақиға кетип, алмутада яшап, 80-йилларда вапат болған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт