Qazaqistanda zunun téyipof tughulghanliqining 100 yilliqi xatirilendi

Muxbirimiz ümidwar
2017-09-03
Élxet
Pikir
Share
Print

Ötken hepte qazaqistanning kona paytexti almata shehiride 1944-1949-yillardiki milliy azadliq inqilabidiki herbiy-siyasiy rehbiri shexslerdin biri, milliy armiye mu'awin bash qomandani, polkownik zunun téyipof tughulghanliqining 100 yilliqi xatirilendi.

Almata shehiridiki bir réstoranda ötküzülgen mezkur xatirilesh murasimigha bir qisim milliy inqilab dewri shahitliri, zunun téyipofning perzentliri, shuningdek milliy inqilabiy hökümette we milliy armiyide rehbiri xizmetlerni ötigen tarixi shexslerning ewladliri, jama'et wekilliri bolup, 100 din artuq kishi qatnashti.

Almatadiki Uyghur jama'et erbabi waqqas memedinof ependining éytishiche, mezkur murasimda 1947-1949-yilliri arisida ghuljida chiqqan "Inqilabi sherqiy türkistan" gézitide xizmet qilghan 90 yashliq Uyghurshunas munir yérzin söz qilip, zunun téyipof qatarliq milliy armiye qomandanliri we sherqiy türkistan jumhuriyiti rehberliri hem qatnashquchilirining töhpilirige yuqiri baha bergen. Murasimda mutexessisler, zunun téyipofning perzentliri söz qilip, tarixi shexsler, jümlidin zunun téyipofqa oxshash milliy armiyining qurulushi we rawajlinishi üchün hesse qoshqan komandirlar, jümlidin azadliq yolida hayatidin ayrilghan jengchi-ofitsérlarni esleshning kéyinki ewladlarning tarixni untup qalmasliqi üchün muhim ehmiyetlik ikenlikini bildürüshken.

Zunun téyipof 1917-yili, qazaqistanning yarkent shehiride tughulghan, 1930-yillarda a'ilisi bilen ghuljigha köchüp ketken bolup, u 1944-yili qurulghan "Azadliq teshkilati" ning gholluq ezasi süpitide ghulja qozghilingigha aktip qatnashqan.U 1945-yili, 8-aprél küni milliy armiye qurulghanda mu'awin bash qomandan bolup, chöchek, shixu urushlirigha qomandanliq qilishqa qatnashqan. Zunun téyipof 1949-yilining axirida xitay kompartiyisini Uyghur diyarini igiligendin kéyin qurulghan "Shinjang herbiy rayoni" ning mu'awin shtab bashliqi bolghan we 1955-yili, général mayorluq unwani bérilgen .U 1961-yili, sowét ittipaqigha kétip, almutada yashap, 80-yillarda wapat bolghan idi.

Toluq bet