Қирғизистан уйғурлири "5-июл үрүмчи қирғинчилиқи" ниң 12 йиллиқини хатирлиди

Ихтиярий мухбиримиз ферузә
2021-07-06
Share
Қирғизистан уйғурлири Д у қ ниң қирғизистандики вакалатчиси розимуһәммәт абдулбақийеф әпәнди "5-июл үрүмчи қирғинчилиқи" ниң 12 йиллиқини хатириләш паалийитидә сөзлимәктә. 2021-Йили 5-июл, бишкәк.
RFA/Féruze

5-Июл күни қирғизистан уйғурлири "иттипақ" җәмийити вә дуня уйғур қурултийиниң қирғизистандики вакалатчиси розимуһәммәт абдулбақийефниң уюштуруши билән бишкәк шәһиридә "5-июл үрүмчи қирғинчилиқи" ниң 12 йиллиқини хатириләш паалийити өткүзди.

Әпсуски, корона вируси вабаси сәвәблик коллектип паалийәтләргә көп киши қатнишалмайдиған болғачқа, бишкәктә өткүзүлгән бу қетимлиқ паалийәткә бишкәк шәһири вә униң әтрапидики йезилардин болуп 50 кә йеқин уйғур җамаити қатнашти.

Мурасим қирғизистан уйғурлири "иттипақ" җәмийитиниң рәиси әсқәр қасимовниң риясәтчиликидә елип берилди. Риясәтчи "үрүмчи қирғинчилиқи" ни хатирләш паалийити башлиниши билән йиғин қатнашқучилириға салам йоллап, уларға өз рәһмитини билдүрди, андин вәтәнниң азадлиқи вә мустәқиллиқи йолида қурбан болған шеһитларға атап хәтмә-қуран оқулди.

Мәзкур хатириләш паалийити давамида пәлсәпә пәнләрниң намзати әкбәрҗан бавудунов асаслиқ доклатни оқуп өтти. У доклатида "үрүмчи қирғинчилиқи" ниң келип чиқиши тоғрисида тәпсилий мәлумат бәрди. У "5-июл қирғинчилиқи" уйғурлар тарихидики қара күн болсиму, әмма әйни вақитта бу вәқә уйғур мәсилисиниң җиддийликини дуня җамаәтчиликигә тонутуп, хәлқараниң диққитини уйғурлар вәзийитигә қаратқанлиқини тәкитләп өтти.

Паалийәт давамида дуня уйғур қурултийиниң қирғизистандики вакаләтчиси розимуһәммәт абдулбақийеф мушу еғир күнләрдә хитай һөкүмитиниң зулум сияситидин азап чекиватқан қериндашларни әсләп өтти. Розимуһәммәт әпәнди йәнә бүгүнки күнләрдә хитай даирилириниң уйғурларға қаратқан қирғинчилиқ сиясити барғансери күчийип бериватқан болсиму, лекин дуня уйғур қурултийи қатарлиқ чәт әлләрдики уйғур тәшкилатлириниң хәлқара сәһниләрдики паалийәтлириниң күндин-күнгә күчийип бериватқанлиқини алаһидә тилға алди. У йәнә

Әнглийә пайтахти лондон шәһиридә болуп өткән "уйғур сот коллегийәси" ниң тунҗи нөвәтлик испат аңлаш йиғини тоғрисида мәлумат бәрди.

Уйғурлар әң көп олтурлашқан новопокровка йезисиниң йигит беши ғәйрәт җаһанов зияритимизни қобул қилип, бу хил паалийәтләрниң қирғизистанда яшаватқан уйғур яш-өсмүрлирини миллий роһ вә вәтәнпәвәрлик туйғуси билән тәрбийәләштә муһим әһмийәткә игә икәнликини билдүрди.

Қирғизистан уйғурлириниң "иттипақ" җәмийити аяллар комитетиниң мудири турсунай ислам зияритимизни қобул қилип, бүгүнки күнләрдә уйғур хәлқиниң өз келәчики үчүн бирлик вә өмлүк билән һәрикәт қилиши лазимлиқини тәкитләп өтти.

Нөвәттә қирғизистан уйғурлири имканийитиниң йетишичә уйғур тарихидики зор вәқәләрни хатириләп, келәчәк әвлатларни вәтәнпәрвәрлик роһида тәрбийәләшкә тиришмақта. Шундақла уйғур тили, миллий кимлики, өзигә хас мәдәнийити вә миллий тарих туйғусини сақлап қелиш үчүн түрлүк паалийәтләрни уюштуруп кәлмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт