Qirghizistan Uyghurliri “5-Iyul ürümchi qirghinchiliqi” ning 12 yilliqini xatirlidi

5-Iyul küni qirghizistan Uyghurliri “Ittipaq” jem'iyiti we dunya Uyghur qurultiyining qirghizistandiki wakalatchisi rozimuhemmet abdulbaqiyéfning uyushturushi bilen bishkek shehiride “5-Iyul ürümchi qirghinchiliqi” ning 12 yilliqini xatirilesh pa'aliyiti ötküzdi.

Epsuski, korona wirusi wabasi seweblik kolléktip pa'aliyetlerge köp kishi qatnishalmaydighan bolghachqa, bishkekte ötküzülgen bu qétimliq pa'aliyetke bishkek shehiri we uning etrapidiki yézilardin bolup 50 ke yéqin Uyghur jama'iti qatnashti.

Murasim qirghizistan Uyghurliri “Ittipaq” jem'iyitining re'isi esqer qasimowning riyasetchilikide élip bérildi. Riyasetchi “Ürümchi qirghinchiliqi” ni xatirlesh pa'aliyiti bashlinishi bilen yighin qatnashquchilirigha salam yollap, ulargha öz rehmitini bildürdi, andin wetenning azadliqi we musteqilliqi yolida qurban bolghan shéhitlargha atap xetme-quran oquldi.

Mezkur xatirilesh pa'aliyiti dawamida pelsepe penlerning namzati ekberjan bawudunow asasliq doklatni oqup ötti. U doklatida “Ürümchi qirghinchiliqi” ning kélip chiqishi toghrisida tepsiliy melumat berdi. U “5-Iyul qirghinchiliqi” Uyghurlar tarixidiki qara kün bolsimu, emma eyni waqitta bu weqe Uyghur mesilisining jiddiylikini dunya jama'etchilikige tonutup, xelq'araning diqqitini Uyghurlar weziyitige qaratqanliqini tekitlep ötti.

Pa'aliyet dawamida dunya Uyghur qurultiyining qirghizistandiki wakaletchisi rozimuhemmet abdulbaqiyéf mushu éghir künlerde xitay hökümitining zulum siyasitidin azap chékiwatqan qérindashlarni eslep ötti. Rozimuhemmet ependi yene bügünki künlerde xitay da'irilirining Uyghurlargha qaratqan qirghinchiliq siyasiti barghanséri küchiyip bériwatqan bolsimu, lékin dunya Uyghur qurultiyi qatarliq chet ellerdiki Uyghur teshkilatlirining xelq'ara sehnilerdiki pa'aliyetlirining kündin-kün'ge küchiyip bériwatqanliqini alahide tilgha aldi. U yene

En'gliye paytaxti london shehiride bolup ötken “Uyghur sot kollégiyesi” ning tunji nöwetlik ispat anglash yighini toghrisida melumat berdi.

Uyghurlar eng köp olturlashqan nowopokrowka yézisining yigit béshi gheyret jahanow ziyaritimizni qobul qilip, bu xil pa'aliyetlerning qirghizistanda yashawatqan Uyghur yash-ösmürlirini milliy roh we wetenpewerlik tuyghusi bilen terbiyeleshte muhim ehmiyetke ige ikenlikini bildürdi.

Qirghizistan Uyghurlirining “Ittipaq” jem'iyiti ayallar komitétining mudiri tursun'ay islam ziyaritimizni qobul qilip, bügünki künlerde Uyghur xelqining öz kélechiki üchün birlik we ömlük bilen heriket qilishi lazimliqini tekitlep ötti.

Nöwette qirghizistan Uyghurliri imkaniyitining yétishiche Uyghur tarixidiki zor weqelerni xatirilep, kélechek ewlatlarni wetenperwerlik rohida terbiyeleshke tirishmaqta. Shundaqla Uyghur tili, milliy kimliki, özige xas medeniyiti we milliy tarix tuyghusini saqlap qélish üchün türlük pa'aliyetlerni uyushturup kelmekte.