Qirghizistan Uyghurliri “5-Iyul ürümchi qirghinchiliqi” ning 13 yilliqini xatirlidi

5-Iyul küni qirghizistan Uyghurliri 2009-yili 5 iyulda yüz bergen “Ürümchi qirghinchiliqi” ning 13 yilliqini xatirlidi. Xatirilesh pa'aliyitide shu qétimliq qirghinchiliqta hayatidin ayrilghan shéhidlarning rohigha atap xetme qur'an oquldi. Xatirilesh pa'aliyiti 5-iyul küni qirghizistan paytexti bishkek we qirghizistanning jenubidiki jalal-abad shehiride ötküzüldi.

Bu yilliq “5-Iyul ürümchi qirghinchiqliqi” ni xatirilesh pa'aliyiti qirghizistan Uyghurlirining “Ittipaq” jem'iyiti we dunya Uyghur qurultiyining qirghizistandiki wakalatchisi rozimuhemmet abdulbaqining teshkillishi bilen élip bérildi. Xatirilesh pa'aliyiti dawamida dunya Uyghur qurultiyining re'isi dolqun eysa ependi tor arqiliq jama'et bilen uchrshti. U Uyghur mesilisining dunyawiy mesilisige aylan'ghanliqini tilgha élip, d u q ning eng yéqinqi pa'aliyetlirini tonushturup ötti.

RFA/Féruze

“5-Iyul ürümchi qirghinchiliqi” ni xatirilesh pa'aliyitige qirghizistan Uyghurliri “Ittipaq” jem'iyitining mu'awin re'isi ekbarjan ba'udunof riyasetchilik qildi. Aldi bilen ürümchi qirghinchiliqida qurban bolghan shéhidlarning rohigha atap quran tilawet qilindi, andin qirghizistan Uyghurliri “Ittipaq” jem'iyitining re'isi esqer qasimof “5-Iyul ürümchi qirghinchiliqi” yüz bérish sewebliri we jeryani toghrisda doklat berdi.

Bishkek shehiride ötküzülgen xatirilesh pa'aliyitige qirghizistan Uyghurliri “Ittipaq” jem'iyitining terkibidiki yézilarning yigit bashliri we aktip ezaliri qatnashti. Bu pa'aliyetke yene qazaqistanning qorday yézisidiki Uyghur pa'aliyetchi mewlan hoshurofmu qatnashti. Radiyomiz ziyaritini qobul qilghan mewlan ependi özining bu xatirilesh pa'aliyitidin alghan tesiratlirini bayan qilip ötti.

Qirghizistan Uyghurlirining “5-Iyul ürümchi qirghinchiliqi” ning 13 yilliqini xatirilesh pa'aliyiti yene jalal abad shehiridimu ötküzüldi. Pa'aliyetke jalal abad shehiridiki xelqlar assambliyesining re'isi kanibék attokurof qatnaship, Uyghur xelqining bügünki weziyiti bilen tonushup chiqti. Radiyomiz ziyaritini qobul qilghan jalal abad oblasti aqsaqallar kéngishining ezasi elishir nasiraxunof mezkur pa'aliyet heqqidiki tesiratlirini bayan qilip ötti.

Qirghizistan Uyghurliri özlirining milliy kimlikini saqlap qélish üchün imkaniyiti yar bergen da'iride türlük pa'aliyetlerni uyushturup kelmekte. Jümlidin Uyghur tarixidiki muhim weqelerni xatirilep, kelgüsi ewladlarni milliy rohta terbiyeleshke tirishchanliq körsetmekte.