Бир шаһитниң «5-июл үрүмчи қирғинчилиқи» һәққидики баянлири (2)

Мухбиримиз сада
2019-07-11
Елхәт
Пикир
Share
Принт
Уйғурларниң тинчлиқ намайишини бастуруш үчүн үрүмчигә киргән хитай қораллиқ әскәрлири. 2009-Йили 5-сентәбир, үрүмчи.
Уйғурларниң тинчлиқ намайишини бастуруш үчүн үрүмчигә киргән хитай қораллиқ әскәрлири. 2009-Йили 5-сентәбир, үрүмчи.
AP

Бүгүнки заман уйғур тарихидики унтулмас қанлиқ вәқә - «5-июл үрүмчи қирғинчилиқи» ниң йүз бәргәнликигә 10 йил болған болсиму, муһаҗирәттә яшаватқан бәзи уйғур шаһитларниң 10 йил илгирики шу күни өз көзлири билән көргән-билгәнлири изчил оттуриға чиқмақта. Уларниң гуваһлиқ сөзлири муһаҗирәттики уйғур җәмийитигә шу қанлиқ кечини давамлиқ әсләп турушқа үндимәктә.

Алдинқи сан программимизда голландийәдә яшаватқан уйғур көзәткүчи асийә ханим 2009-йили 5-июл күнидики намайишниң раваҗи, кишиләр топи арисида туюқсиз пәйда болуп қалған бир нәччә кишиниң башқиларни қалаймиқанлиқ чиқиришқа күшкүртүши, йолниң бойидики җәсәтләр, шу күни кечидә туюқсиз токниң үзүлүши вә пүтүн бир кечә давамлашқан оқ авази қатарлиқ инчикә нуқтилардин тәпсилий мәлумат бәргәниди.

Сөһбитимизниң бүгүнки санида асийә ханим 5-июлдин кейинки өзгиришләр һәққидә тәпсилий тохтилиду.

Асийә ханимниң илгири сүрүшичә, шу мәзгилләрдә уйғур диярида вәзипә өтәватқан уйғур аптоном районлуқ парткомниң сабиқ секретари ваң лечүән «5-июл вәқәси» дин кейин бир телевизийә нутқи сөзлигән вә бу вәқәни уйғурларниң мәқсәтлик чиқарғанлиқи һәм хитайларниң буниң үчүн уйғурлардин интиқам елиши керәкликини ишарәт қилған. Шуниңдин кейин уйғурлар билән хитайлар арисида тил билән ипадиләп бәргили болмайдиған бир зиддийәт пәйда болған.

Асийә ханим сөһбәт давамида «5-июл вәқәси» дин кейин из-дерәксиз ғайиб болған икки уйғур һәққидиму тохтилиду. Униң ейтип беришичә, бу икки уйғурниң бири җәнубий қовуқ әтрапида ишләйдикән. 5-Июл күни кәчтә у иштин чүшүп өйгә қайтиватқинида, хитай һәрбийләрниң уйғурларға қаритип оқ чиқиришиға удул келип қалған вә путиға оқ тәгкән. Шуниң билән у уйғур аптоном районлуқ хәлқ дохтурханисиға апирилған. Һалбуки дохтурлар уни давалашниң орниға сақчиға мәлум қилған. Нәтиҗидә у хитай сақчилири тәрипидин тутуп кетилгән вә шуниңдин кейин хәвири болмиған.

Йәнә бир уйғур болса шинҗаң университетида оқуйдиған оқуғучи болуп, 5-июл күни «мәктәпкә баримән» дәп чиқип кәткәнчә қайтип кәлмигән вә из-дерәксиз ғайиб болған.

Юқири улиништин асийә ханим билән өткүзгән сөһбитимизниң 2-қисмини аңлиғайсиләр.

Пикирләр (0)
Share
Толуқ бәт