"5-июл вәқәси" ниң 12 йиллиқ хатирә күнидә токйода наразилиқ намайиши өткүзүлди

Ихтиярий мухбиримиз әркин тарим
2021-07-05
Share
"5-июл вәқәси" ниң 12 йиллиқ хатирә күнидә өткүзүлгән хитайға қарши наразилиқ намайишидин көрүнүш. 2021-Йили 5-июл, японийә.
RFA/Erkin Tarim

Японийә пайтәхти токйодики әң ават районларниң бири болған шинҗуку пойиз истансиси алдида 4-июл күни японийәдики уйғур җәмийитиниң уюштуруши вә хоңкоңлуқлар һәм моңғул җәмийитиниң аваз қошуши билән "5-июл вәқәси" ниң 12 йиллиқ хатирә күнидә хитайға қарши наразилиқ намайиши өткүзүлди.

Бу намайишқа токйо вә әтрапидики шәһәрләрдин келип топланған уйғурлар, моңғоллар, хоңкоңлуқлар вә бир қисим йәрлик японларму қатнашти. Дуня уйғур қурултийиниң японийәдики вәкили илһам мәхмут әпәндиниң ейтишичә, бу қетимқи намайишқа 150 әтрапида киши иштирак қилған болуп, намайиш алди билән 5-июлда һаятидин айрилған уйғурларниң роһиға атап қуран тилавити қилинғандин кейин башланған. Қоллирида ай-юлтузлуқ көк байрақ көтүрүвалған намайишчилар "хитай 5-июл вәқәсидә қетил қилған уйғурларниң һесабини бәрсун", "хитай уйғурларға елип бериватқан ирқий қирғинчилиқни тохтат", "уйғурларға әркинлик", "хитай җаза лагерлирини тақивәтсун", "қериндашлиримни қайтуруп бәр", "хитай шәрқий түркистандин чиқип кәт" дегәндәк шоарларни товлап әтрапни ләрзигә салған.

Намайиш ахирлашқандин кейинла зияритимизни қобул қилған д у қ ниң японийәдики вәкили илһам мәхмут әпәнди бу қетимқи намайишниң "5-июл үрүмчи вәқәси" ни хатириләш вә хитайниң уйғурларға елип бериватқан нөвәттики дәриҗидин ташқири бесим сияситигә наразилиқ билдүрүш үчүн елип берилғанлиқини тилға алди.

Илһам мәхмут әпәнди бу қетимқи намайишни көргән японларниң бармақлирини көрситип, уйғурларни қоллайдиғанлиқини ипадиләшкәнликини баян қилди.

Бу қетимқи намайишни уюштурған японийә уйғур җәмийитиниң рәиси доктор абдукерим абдурахман әпәндиму зияритимизни қобул қилип, "5-июл үрүмчи вәқәси" хатириләш мунасивити билән токйода өткүзүлгән бу қетимлиқ намайиш арқилиқ уйғур тарихидики бу қанлиқ вәқәни унтуп қалмайдиғанлиқини йәнә бир қетим намайәндә қилғанлиқини оттуриға қойди.

Мәлумки, японийә уйғур зиялийлири әң көп дөләтләрниң бири болсиму, әмма түрлүк сәвәбләр түпәйли хитайға наразилиқ билдүридиған паалийәтләргә қатнишидиған уйғурларниң сани нисбәтән аз болуп кәлгәниди. Бирақ, бу қетим көпәйгән. Уйғур җәмийити рәиси доктор абдукерим абдурахман әпәнди бу намайишниң һазирқи вәзийәттә елип берилишиниң әһмийити һәққидә тохталди.

Илһам мәхмут әпәнди японийәдә өткүзүлгән бундақ наразилиқ намайишлири вә паалийәтлириниң японийәдә уйғур дәвасиниң тонулуши, хитайниң һәқиқий йүзиниң японийә җамаәтчиликигә ашкарилинишида әһмийити болғанлиқини тәкитлиди.

"5-июл үрүмчи" вәқәси 2009-йилидин тартип японийәдә изчил һалда хатирилинип келиватқан болуп, һәр йили дегүдәк бу вәқә тоғрисида һазирланған тәшвиқат варақчилири тарқитилған вә японларниң соаллириға җаваб берилгән. Бу йилму шундақ тәшвиқат васитилири қоллинилди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт