Хитайниң тәшвиқат аппарати болған CGTN қанили “StillNoInfo#” һәрикитини қарилашқа урунмақта

Мухбиримиз ирадә
2019.12.30
Share on WhatsApp
Share on WhatsApp
CGTN-StillNoInfo.jpg Хитайниң тәшвиқат аппарати болған CGTN қанили “StillNoInfo#” һәрикитини қарилашқа урунмақта.
Social Media

Һөрмәтлик радийо аңлиғучилар, йеқиндин буян хитайниң чәтәлләргә қаратқан тәшвиқат васитиси болған CGTN қанили, йәни “хитай йәр шари телевизийә тори” өзиниң ювтуб вә тивиттирдики һесаблири арқилиқ қисқа видийоларни тарқитип, чәтәлләрдики уйғурларниң йеқинқи 2-3 йилдин буян из-дерикини қилалмайватқан уруқ-туғқанлири һәққидә бәргән гуваһлиқлириниң ялғанлиқини илгири сүрмәктә. Бу видийоларда йеқинда чәтәлләрдики уйғурлар иҗтимаий алақә торида ишлитиватқан “StillNoInfo#” йәни “техичә учур йоқ” һәрикити асаслиқ нишан қилинип туруп: “техичә учур йоқ хәштәг һәрикитигә зәрбә, биз уни таптуқ”, “техичә учур йоқ, ким ялған сөзләватиду” қатарлиқ темиларда видийо тарқатқан.

CGTN Қанили 26-декабир күни тарқатқан бу һәқтики видийода өзини мухбир дәп тонуштурған бир аял төвәндикиләрни баян қилиду: “йеқиндин буян чәтәлләрдики тор бәтләрдә хитайдики йоқап кәткән уруқ-туғқанлирини издәш һәрикити қозғалди. Бу шәхсләр вә органлар техичә учур йоқ, дегән хәштәгни қоллинип туруп чиқарған учурлирида тәрбийәләшни түгәткән туғқанлириниң йоқап кәткәнликини илгири сүрүшти. CGTN Шинҗаңға адәм әвәтип, аталмиш йоқап кәткүчиләр үстидә тәкшүрүш елип барди” дәйду. 

CGTN Қанили өз видийолирида чәтәлләрдики уруқ-туғқанлири тәрипидин сүрүштүрүлгән маһирә, хенимхан турди вә әзиз нияз қатарлиқ кишиләрни өйлиридә вә аталмиш иш йәрлиридә көрситиш арқилиқ уларниң “йоқап кәтмигәнлики”, әксичә нормал һаятини давамлаштуруватқанлиқини илгири сүрүп, “техичә учур йоқ” һәрикитиниң ялғанчилиқ икәнликини илгири сүрмәкчи болған.

“техичә учур йоқ” хәштәги билән башланған бу һәрикәт әсли америкада өзиниң дадисиниң из-дерикини қилип дава қиливатқан яш паалийәтчи бәһрам синташниң тәшәббуси билән оттуриға чиққан тор һәрикити иди. У бүгүн радийомизниң зияритини қобул қилип, CGTN әгәр һәқиқәтән “техичә учур йоқ һәрикитиниң ялғанчилиқ икәнликини испатлимақчи болса, алди билән бу һәрикәтниң башламчиси болған мениң туғқанлиримни, йәни мениң дадамни маңа көрсәтсун”, деди. 

Америка авам палатаси 3-декабир күни уйғур қанун лайиһәсини мутләқ көп сан аваз билән қоллиғандин кейин хитай даирилири дәрһал бейҗиңда ахбарат елан қилиш йиғини чақирған. 9-Декабирдики ахбарат йиғинда уйғур аптоном райониниң рәиси шөһрәт закир баянат берип, аталмиш “кәспий тәрбийәләш мәркәзлири” намидики лагерларда тутуп турулуватқан тутқунларниң “оқуш” пүттүрүп, өйлиригә қайтқанлиқини билдүргән. Нәтиҗидә чәтәлләрдә һелиһәм уруқ-туғқанлиридин хәвәр алалмайватқан уйғурлар бәһрам қурбан синташниң һәрикитигә аваз қошуп уруқ-туғқанлирини сүрүштә қилишни күчәйткән. 

Бәһрам бу һәқтики сөзидә хитай һөкүмитиниң юқиридики бу тәшвиқат һәрикитиңму худди илгирики һәрикәтлиридәк мәғлуп болидиғанлиқини, чүнки чәтәлләрдики уйғурларниң юртидики уруқ-туғқанлири билән нормал алақиси пүтүнләй әслигә кәлмәй туруп, пәқәт бир қанчә уйғурни анда-санда видийоларда көрситиш арқилиқ хитай һөкүмитиниң һечкимни алдиялмайдиғанлиқини билдүрди.

Дәрвәқә, юқиридики бу видийоларға нурғун тивиттир қолланғучилири инкас қайтуруп, хитайниң бундақ сахта вә сәһниләштүрүлгән көрүнүшләр билән әмди һечкимни алдап болалмайдиғанлиқини билдурүшкән вә юқиридики бу аталмиш “мухбирлар” ни тәнқид қилған. 

CGTN Қанили хитайниң мәркизи телевизийә истансиси CCTV гә қарашлиқ болған қанал болуп, униң ингилизчидин башқа йәнә, әрәбчә, латинчә вә росчә тарқитишлири бар. Америка әдлийә министирлиқи 2018-йили сентәбирдә қарар чиқирип, хитайниң шинхуа агентлиқи билән униңға қарашлиқ әң чоң хәлқаралиқ телевизийә тори CGTN қанилини мустәқил хәвәр оргини әмәс, бәлки “чәтәл агентлири” йәни “чәтәл вакаләтчиси” қатарида тизимлаш һәққидә буйруқ чиқарған.

“вал-ситрит жорнили” ниң бу һәқтики хәвиридин қариғанда, “чәтәл вакаләтчилирини тизимлаш қануни” америкида 1938‏-йилидин буян иҗра қилиниватқан болуп, қисқартилип FARA дәп атилидикән. Мәзкур қанун чәтәл һөкүмәтлириниң ахбарат васитиси арқилиқ америка җамаәт пикиригә вә бу арқилиқ америка һөкүмитигә тәсир көрситишиниң алдини елиш үчүн түзүлгән, йәни мустәқил ахбарат оргини болмиған, чәтәл һөкүмәтлириниң қанити болған ахбарат орунлириниң америкида җасуслуқ ролини ойнап қелишиниң алдини елишни мәқсәт қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.