Америкалиқ уйғур әлнигар илтәбир ақ сарайдики йеңи хизмитини башлиди

Мухбиримиз сада
2019.08.14
elnigar-xanim-doklat-bermekte.jpg Әлнигар илтәбир ханим “ахбаратниң инсан һәқлири вә демократийини илгири сүрүштики күчи” мавзулуқ доклат бәрмәктә. 2011-Йили 26-сентәбир, естонийә.
Social Media

Америкалиқ уйғур тәтқиқатчи әлнигар илтәбир америка дөләт хәвпсизлики кеңишиниң хитай ишлири бөлүминиң директорлуқ вәзиписигә тәйинләнгән.

“ташқи сиясәт” журнилиниң 14-авғусттики хәвиридә дейилишичә, трамп һөкүмитиниң әлнигар илтәбирни бу вәзипигә тәйинлиши символлуқ мәнигә игә болуп, буниң америка-хитай оттурисидики сода сөһбити вә башқа мунасивәтләргә тәсир көрситиш еһтимали бар икән.

Мәзкур хәвәрдә әлнигар илтәбирниң буниңдин кейин қилидиған ишлири вә роли һәққидә тәпсилий чүшәнчә берилгән. 

Мәлум болушичә, у, трамп һөкүмитидики әң муһим мәсилиләрниң бири болған хитай сиясити мәсилисини бир тәрәп қилишқа ярдәмлишидикән. Булар йәнә америка-хитай оттурисидики сода, һәрбий вә кишилик һоқуқ мәсилилириниму өз ичигә алидикән.

“ташқи сиясәт” журнилидики мәзкур мақалидә қәйт қилинишичә, хәлқара кәчүрүм тәшкилати асия тинч-окян бөлүминиң башқурғучиси франсиско бенкозм әлнигар илтәбирниң бу хизмәткә олтуруши һәққидә сөз қилип: “хитай һөкүмәт хадимлири билән болған сөһбәтләрдә үстәлниң қариши тәрипидә бир уйғурниң олтуруш еһтималлиқи кишини толиму һаяҗанға салиду” дегән.

Нөвәттә, уйғур дияридин икки милйонға йеқин уйғур вә башқа түркий милләтләрниң җаза лагерлириға қамилип, кишилик һоқуқлириниң еғир дәриҗидә зиянкәшликкә учраватқанлиқи мәлум болуватқан пәйттә америкадики бир уйғурниң трамп һөкүмитидики юқири дәриҗилик хизмәтни өз үстигә алалиши уйғур вәзийитигә көңүл бөлгүчиләрниң диққитигә еришти.

Һалбуки хәвәрдә әлнигар илтәбирниң ақсарайдики хизмитини башлиған яки башлимиғанлиқи һәққидә учурлар берилмигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.