Roshen abbas xanim xelq'ara jem'iyetni Uyghurlargha yürgüzülüwatqan qilmishlarni irqiy qirghinchiliq dep tonushqa chaqirghan

Muxbirimiz jüme
2020-11-15
Share
Roshen-Abbas-20200913-3.jpg Roshen abbas doxtur gülshen abbas xanim tutulghanliqining ikki yilliq xatire küni xitay elchixanisi aldida namayishi qildi.
Photo: RFA

Amérikidiki Uyghur herikiti teshkilatining prézidénti roshen abbas xanim xelq'ara jem'iyetni xitay Uyghurlargha yürgüzüwatqan basturush siyasitini "Irqiy qirghinchiliq" dep tonushqa chaqirghan.

"Zé5" xewer torining xewer qilishiche, u bu sözlerni 13-noyabir türkiye paytexti enqerede médiya sahesige bergen bayanatida otturigha qoyghan. U sözide milyonlighan Uyghurning jaza lagérlirigha qamalghanliqi, ularning mejburiy emgek zawutlirida qulluqqa mejburlan'ghanliqini bayan qilip ötken.

U, türkiyediki bir muxbirning so'allirigha jawab bergende xelq'ara jem'iyettin buninggha qarshi muwapiq inkas kütidighanliqini bildürgen we mundaq dégen: "Uyghurlarning mejburiy emgiki bilen ishlepchiqirilghan tawarlarning chet'el bazirigha kirishining aldini xelq'ara qanunlar arqiliq élish kérek."

U yene xelq'ara jem'iyettin béyjing hökümitining Uyghurlargha qarshi qilmishlirini "Irqiy qirghinchiliq" dep étirap qilishini telep qilidighanliqini bildürgen.

U mundaq dégen: "1948-Yili birleshken döletler teshkilati teripidin maqullan'ghan irqiy qirghinchiliqning aldini élish we jazalash ehdinamisige asaslan'ghanda, sherqiy türkistanda yüz bergen ishlar bir irqiy qirghinchiliqtur. Bundaq bir ehwalni 'irqiy qirghinchiliq' dep izahlaydighan besh madda bar. Ularning hemmisi sherqiy türkistanda yüz bériwatidu."

Roshen abbas, xitayning Uyghurlargha qaratqan siyasetlirini ashkara tenqid qilghandin kéyin, uning a'ile ezaliri xitayning zerbe bérish nishanigha aylan'ghan we uning hedisi doxtur gülshen abbas 2018-yili may aylirida tutup kétilgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet