Sabiq milliy armiye jengchisi abdukerim kerimof qirghizistanda wapat boldi

Ixtiyariy muxbirimiz féruze
2019-08-22
Élxet
Pikir
Share
Print
Sabiq milliy armiye jengchisi abdukerim kerimof(otturidiki aqsaqal) ependining 100 yilliq tewellutida ewladliri bilen. 2019-Yili yanwar, bishkek.
Sabiq milliy armiye jengchisi abdukerim kerimof(otturidiki aqsaqal) ependining 100 yilliq tewellutida ewladliri bilen. 2019-Yili yanwar, bishkek.
RFA/Féruze

1944-1949-Yilliridiki sheqiy türkistan jumhuriyitining milliy armiyeside wezipe ötigen sabiq jengchi abdukerim kerimof qirghizistanning toqmaq shehiride 100 yéshida alemdin ötti.

Abdukerim kerimof 1919-yili qeshqer shehiride tughulghan bolup, u shu zamanlarda qeshqerde diniy we penniy mekteplerde oqughan iken. Kéyinche déhqanchiliq qilghan we ashpezlik kespini öginip, bu sahede usta bolghan iken.

1942-Yili abdukerim kerimof a'ilisi bilen ghulja shehirige kélip, ashpezlik kespi bilen shoghullan'ghan iken. 1944-Yili ghuljida gomindang hakimiyitige qarshi milliy azadliq inqilabi bashlan'ghanda u pida'iylar sépide ghulja shehirining lengshang (ashliq iskilati), herembagh urushlirigha qatnashqan iken. Abdukerim kerimof kéyinche milliy armiyening shimalgha yürüsh qilish frontigha qatniship, altay wilayitini azad qilish urushigha qatnashqan iken.

Merhumning oghli islahat radiyomiz ziyaritimizni qobul qilip, dadisi hayat waqtida her da'im milliy armiyediki sepdashlirini we Uyghur diyarida ötken künlirini eslep yürgenlikini tilgha aldi. U dadisining 1962 yili öz wetinini terk étishke mejbur bolup, sowétlar ittipaqigha köchüp chiqqanliqini bayan qildi.

1962-Yili abdukerim kerimof a'ilisi bilen torghat éghizi arqiliq sabiq sowét ittipaqining qirghizistan ittipaqdash jumhuriyiti tewesidiki narin wilayitige köchüp chiqqan. Bir heptidin kéyin ular toqmaq shehirige bérip orunlashqan. Bu yerde u üzümzarliq we étiz-ériqlarda ishligen. Hayat waqitlirida toqmaq shehiridiki Uyghur jama'itining ishlirigha aktip qatnashqan. Qazaqistanda neshr qilin'ghan "Kommunizm tughi", "Yéngi hayat" gézitlirige mushteri toplash we uni tarqitish ishlirini atqurghan. U yene qirghizistanda chiqidighan Uyghur tilidiki "Ittipaq" gézitining jan köyer oqurmini idi. Igilishimizche toqmaq shehiride Uyghurlarning yene bir meschitining échilishida abdukerim hajim chong töhpilerni qoshqan.

Radiyomiz ziyaritini qobul qilghan toqmaq shehiridiki Uyghur jama'itining aqsaqali albdulla turdiyéf közliri nemlen'gen halda merhum abdukerim kerimofning hayatidiki ish-izliri heqqide sözlep ötti hemde uning hayatigha yuqiri baha berdi.

1960-Yillarda qirghizistanda 1944-1949-yilliridiki sherqiy türkistan milliy azadliq inqilabigha qatnashqan jengchi-ofitsérlardin 200 din artuq kishi bar idi. Epsuski, yillarning ötüshi bilen ularning köp qismi baqi dunyagha ketti. Igilishimizche, bügünki künlerde qirghizistanda milliy armiyege qatnashqan jengchi-ofitsérlardin peqet üch kishila hayat. Ular bishkek shehirining turghunliri ablimit bekriyéf, abduréshit selimof we keng bulung yézisining turghuni abdukerim abdullayéftur.

Qirghizistan Uyghurlirining "Ittipaq" jem'iyiti tarixiy weqelerning untulmasliqi üchün her yili "Milliy armiye küni", "Sherqiy türkistan jumhuriyet küni" ni xatirilesh pa'aliyetlerni ötküzüp kelmekte. Shundaqla yash ewladlargha milliy armiye jengchilirining wetenperwerlik rohini tonushturup kelmekte.

22-Awgust küni toqmaq sheherlik meschitide merhum abdukerim kerimowning neziri ötküzüldi. Nezir we xetme-qur'an'gha 300 ge yéqin kishi qatnashti. Toqmaq shehiridiki jama'et merhum milliy armiye jengchisi abdukerim kerimofning wapatini uning "100 Yilliq toyi" dep bildi, jama'et aqsaqalliri du'a qilip merhumning a'ilisige sebir tilidi. Merhumning newrisi güzel bowisining ömür musapisini eslep, özining hés-tuyghulirini we tesiratlirini bayan qilip ötti.

Toluq bet