Ataqliq edib we sha'ir abdulla sawut türmidin késel chiqip dawalinalmay jan üzgen

Muxbirimiz shöhret hoshur
2022.12.27
Ataqliq edib we sha'ir abdulla sawut türmidin késel chiqip dawalinalmay jan üzgen Bügünki dewr Uyghur edebiyatidiki ölmes eserlerdin “Qanliq qirghaq”, “Chaqmaq” we “Dat basmas qilich” qatarliq roman we powéstlarning aptori abdulla sawut ependi. (1950.4 - 2022.18)
Abduweli Ayup

Ijtima'iy taratqularda xewer qilinishiche we muxbirimizning alaqidar idare-organlardin igilishiche, bügünki dewr Uyghur edebiyatidiki ölmes eserlerdin “Qanliq qirghaq”, “Chaqmaq” we “Dat basmas qilich” qatarliq roman we powéstlarning aptori abdulla sawut ikki ayning aldida késel sewebi bilen türmidin qoyup bérilgen. Türmidin hali xarab chiqqan yazghuchi, yurtidiki yuqum qamalining ozuqlinish we dawalinish cheklimilirige berdashliq bérelmigen. Netijide mushu ayning 18-küni 72 yéshida dunya bilen widalashqan.

Bu hepte ijtima'iy taratqularda, mol hosulluq edib we sha'ir abdulla sawutning türmidin chiqip jan üzgenliki heqqide uchurlar tarqaldi. Bu heqte tunji bolup tiwittérdin uchur bergen norwégiyediki pa'aliyetchi abduweli ayupning déyishiche, abdulla sawut mushu ayning 18-küni jan üzgen. Abduweli ayupning birqanche menbedin sürüshte qilishiche, abdulla sawut, 2017-yili tutqun qilin'ghan, ikki ay ilgiri késel halette türmidin qoyup bérilgen.

Téléfonimizni qobul qilghan qizilsu qirghiz aptonom oblastliq saqchi idarisining xadimliri, qizilsuda tutqundiki yazghuchilar arisida abdulla sawut isimlik birsining bar-yoqluqini sorighinimizda, tizimlikke qarap chiqqandin kéyin “Bar” dep jawab berdi we uning 18-dékabir küni wapat bolghanliqini delillidi.

Tor arxiplirida tonushturulushiche, 1950-yili aqtu nahiyesining üjme yézisida tughulghan abdulla sawut, 1974‏-yili qizilsu oblastliq darilmu'elliminni püttürgen. 1973-Yildin bashlap edebiy ijadiyetke kirishken aptor, uzun mezgil aqtu nahiyesining medeniy-ma'arip saheside xizmet qilghan. 1988‏-Yildin 1996‏-yilighiche, Uyghur aptonom rayonluq yazghuchilar jem'iyitining kespi'iy yazghuchisi bolghan.

U az kem yérim esirlik ijadi'iy hayatida, “Qanliq qirghaq”, “Chaqmaq”, “Dat basmas qilich”, “Hayatliq zenjiri”, “Shraq” we “Ewliya ot” qatarliq roman, hékaye we powéitlarni yazghan.

Norwégiye Uyghuryar fondi tüzgen tutqundiki ziyaliylar tzimlikide bayan qilinishiche, abdulla sawut hayati boyi sherqi türkistan milliy inqilab tarixini yorutush we qehrimanlar abidisini tiklesh bilen meshghul bolghachqa, 2017-yilidiki chong tutqunda u deslepki tutqunlar qatarida orun alghan.

Melum bolushiche, türmige kirgendin kéyin namelum sewebler bilen yazghuchining salametlikide éghir chékinish yüz bergen. Da'iriler, uning saqiyishigha közi yetmigendila, dawalinishi üchün a'ilisige qayturghan. Emma uning qoyup bérilishi Uyghur élidiki qamal mezgilige toghra kelgechke, dawalinish imkanlirimu cheklimige uchrighan, yéterlik ozuq we kéreklik dorigha érishelmigen yazghuchi, türmide yépishqan késelge taqabil turalmighan.

Mezkur saqchi xadimi, yazghuchi abdulla sawutning türmidin késel halette chiqqanliqi we öyide jan üzgenlikinimu delillidi.

Aptorning hérismen kitabxanliridin bolghan pa'aliyetchi abduweli ayup, aptor we eserlirini mundaq esleydu:

Yuqirida, mol hosulluq edib we sha'ir abdulla sawutning türmidin kések halette chiqqanliqi we qamal mezgilide dawalinishqa imkani bolmastin wapat bolghanliqi heqqide melumat berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.