Türkiye asasiy qanun sot mehkimisi abdulqadir yapchanning tutqun qilinishini "Qanunsizliq" dep qarar berdi

Ixtiyariy muxbirimiz arslan
2019-05-30
Élxet
Pikir
Share
Print
Abduqadir yapchan ependi yighinda söz qilmaqta. 2019-Yili noyabir, türkiye.
Abduqadir yapchan ependi yighinda söz qilmaqta. 2019-Yili noyabir, türkiye.
RFA/Arslan

Ikki yérim yildin buyan türkiye köchmenler ishliri idarisi teripidin nazarette tutup turuluwatqan jama'et erbabi abduqadir yapchan adwokati arqiliq türkiye asasiy qanun sot mehkimisige özining erkinlikidin mehrum qaldurulup we kishilik hoquqining depsende qilin'ghanliqini bildürüp, özining tutup turuluwatqanliqigha étiraz bildürgenidi. Türkiye asasiy qanun sot mehkimisi uning étiraz bayannamisini qobul qilip, körüp chiqqandin kéyin uning tutqun qilinishini "Qanunsizliq, kishilik hoquqi we bixeterliki depsende qilin'ghanliq" dep qarar berdi we u naheq tutulghan ikki yérim yilliq muddet üchün 30 ming türk lirasi tölem tölesh hem tölemni dölet xezinisidin öteshni qarar qildi.

Türkiye asasiy qanun sot mehkimisining bu heqte özining resmiy tor bétide élan qilghan bayanatida yene abduqadir yapchanning türkiyede héchqandaq bir jinayet sadir qilmighanliqi heqqidimu mundaq déyilgen: "2001-Yilidin buyan türkiyede yashawatqan erzdar nazaret astigha élin'ghan 2016-yilighiche bolghan ariliqta jem'iyet amanliqi we bixeterlikining buzulushigha seweb bolidighan héch qandaq bir weqege chétilmighan, bu heqte edliye we teptish idariliri teripidin bir délo toxtitilghan ehwal yaki delil-ispat yoqtur".

Bu heqte türkiye asasiy qanun sot mehkimisining özining resmiy tor bétide we döletning resmiy gézitide élan qilin'ghan qararida abduqadir yapchanning kishilik hoquqining depsende qilin'ghanliqi qararlashturulup mundaq déyilgen: "Asasiy qanun sot mehkimisi, asasiy qanunning 19-maddisigha asasen, bixeterliki kapaletke ige qilin'ghan kishining erkinliki we bixeterlik hoquqining depsende qilin'ghanliqigha da'ir qarar bérildi".

Biz bu heqte pikir qarashlirini élish üchün abduqadir yapchanning adwokati ibrahim ergin ependi bilen söhbet élip barduq.

Ibrahim ergin ependi mundaq dédi: "Ziyaret qilghanliqingiz üchün köp rehmet, abduqadir yapchanning gunahsiz ikenliki sot mehkimilirining qararliri arqiliq békitiliwatidu. Buningdin ilgiri türkiye asasiy qanun sot mehkimisi we yawropa kishilik hoquq sot mehkimisining uni qayturmasliq tedbiri qararliri bilen uni xitaygha qayturidighan mesile toxtitilghanidi. Buningdin ilgiri, bakirköy sot mehkimisining 2-éghir jaza sot mehkimisi abduqadir yapchanning xitaygha qayturulushini siyasiy qarar dep qarap, uning qayturulushini ret qilghan bolsimu, emma qayturulush dawasi chaghliyan 29-éghir jaza sot mehkimisi teripidin dawam qiliwatidu. Abduqadir yapchan toghrisida ikki xil sot bar idi, buning birinchisi qayturulush mesilisi, ikkinchisi bolsa chégradin chiqiriwétish mesilisi idi, chüshinish jehette bu ikki mesilining ayrim-ayrim jeryan ikenlikini bilishinglar kérek. Asasiy qanun sot mehkimisi teripidin abduqadir yapchanning jinayiti yoqluqi bildürülgen bu güzel qarar türkiyede tunji qétim otturigha chiqti. Chünki, biz abduqadir ependini 2016-yilidin buyan tutup turushning naheq ikenlikini bildürüp asasiy qanun sot mehkimisige étiraz bildürgeniduq. Oxshashla yene tutup turulghan shert-shara'itlarning yaxshi emeslikini, uni yalghuz kishilik yerge solap qoyghanliqini we bundaq yalghuz qamap qoyushning qanun'gha uyghun emeslikini tekitlep étiraz bildürgeniduq. Asasiy qanun sot mehkimisi bizning étirazlirimizni qobul qildi we tutqun qilishning naheq ikenlikini bildürüp, döletning xata qilghanliqini békitti. Asasiy qanun set mehkimisi, abduqadir ependini tutqun qilishqa seweb bolidighan héchqandaq bir delil ispat yoq dep qarar berdi. Bu bir ijabiy ilgirilesh boldi. Emma bu dawam qiliwatqan qayturush dewasigha biwasite bir tesiri bolmaydu. Biraq, abduqadir yapchan ependining heqliq ikenlikini ispatlashqa tesir körsiteleydu. Shuning üchün bu qarar qayturulush dawasigha yenila tesir körsiteleydu".

Ibrahim ergin ependining bildürüshiche, sot mehkimisi xitayning abduqadir yapchanni qayturup bérishni telep qilip, otturigha qoyghan atalmish jinayetlerni körsitidighan höjjetlirining jinayet artishqa kupaye qilmaydighanliqini bildürüp, xitay tereptin bashqidin delil-ispatliq höjjet telep qilghan. Xitaygha qayturush yaki qayturulmasliq qararni béridighan bu dawa, xitaydin kélidighan höjjetlerni kütmektiken. Emma ikki yildin buyan kütülüwatqan u höjjetler hazirghiche kelmigen bolup, eger xitaydin telep qilghan höjjet kelmise sot mehkimisi özining qararini béridiken.

Adwokat ibrahim ependining bildürüshiche, abduqadir yapchan ependi üstidin bu yil 9-ayning 26-küni yene sot échilidiken. Ibrahim ependi: "Yaxshi netijiler otturigha chiqidu dep ümid qilimiz. Téximu yaxshi qararlarning élinishi üchün qolimizdin kélishiche tirishchanliq körsitimiz", dédi.

Abduqadir yapchan ependi ziyaritimizni qobul qilip, türkiye asasiy qanun sotining özini aqlighanliqini bayan qildi.

Istanbul chaghliyandiki adalet sariyida abduqadir yapchan üstidin bu yil 5-ayning 3-küni sot échilghan bolup, u sotta abduqadir yapchan özining héchqandaq jinayiti yoqluqini bildürüp, erkin qoyup bérilishini telep qilghanidi. Sot mehkimisi abduqadir yapchanni özining öyi jaylashqan istanbul küchükchekmeje nahiyesige qarashliq fewzichaqmaq mehellisidin sirtqa chiqmasliq sherti bilen erkin qoyup bergenidi.

Toluq bet