Bélarusiyede wapat bolghan abduraxman abdulning ayali we qizi istanbulgha yétip keldi

Istanbuldin bélarusiyege bérip koruna wirusi bilen yuqumlinip wapat bolghan 44 yashliq Uyghur ziyaliyisi abduraxman abdulning ayali nisagul we qizi 21 ‏-féwral küni kéchide istanbulgha saq-salamet qaytip keldi.

Biz merhum abduraxman abdul we wapati toghrisida melumat élish üchün merhumning istanbulgha qaytip kelgen ayali nisagul bilen söhbet élip barduq.

Nisagul ziyaritimizni qobul qilip aldi bilen merhum yoldishi abduraxman abdulning hayati toghrisida qisqiche toxtaldi. Merhum abduraxman abdul esli turpan wilayitidin bolup bu yil 44 yashqa kirgen. U ilgiri shendung néfit uniwérsitétida oqughaniken. U, 2012 ‏-yili türkiyege oqush we bilim ashurush üchün kelgen bolup, türkiyege kelgendin kéyinmu istanbul tijaret uniwérsitétida karxana bashqurush kespide magistirliq unwani üchün oqughan, kéyin oqushtin chékinip bir mezgil melum bir shirkette bughaltir bolup xizmet qilghandin kéyin öz aldigha igilik tiklesh üchün istanbulda “Idiqut” namida bir résturan achqan.

Nisagülning bildürüshiche ular hem qizini yawropada yaxshi oqutush we igilik tiklesh meqsitide ötken yili yawropagha kétishni pilanlighaniken. Merhum abduraxman abdul we ayali qizi bilen birlikte yawropagha kétish üchün bu yil 1 ‏-ayning 26 ‏-küni istanbuldin bélarusiyege barghandin kéyin yawropagha kétish üchün ayropilan'gha chiqish jeryanida koruna wirusi bilen yuqumlan'ghanliqi bayqilip ayropilan'gha chiqalmay ikki hepte bélarusiyening minsk shehiride qélishqa mejbur bolghan. Biraq u shu yerde dawalan'ghan bolsimu ünümi bolmay 18 ‏-féwral küni wapat bolghan.

Nisagülning bildürüshiche, merhumni yerlikige qoyush üchün türkiyediki sherqiy türkistan ma'arip we hemkarliq jem'iyitining re'isi hidayetulla oghuzxan we farabiy telim-terbiye, medeniyet we ilmiy tetqiqat jem'iyitining re'isi abdulla qaraqashning yol méngishi bilen türkiyening bélarusiyede turushluq elchixanisi we dini ishlar bashqarmisining bélarusiyediki shöbe mes'ulliri yardem qilghan bolup, merhumning méyiti musulmanlar mazarliqigha depne qilin'ghan.

Nisagül xanimning bildürüshiche, ular koruna wirusi bilen yuqumlan'ghandin kéyin bir hepte doxturxanida yatqandin kéyin u doxturxanining dawalash téxnikilirining töwen ikenlikini hés qilghan we türkiyege qaytip kétish üchün türkiyediki teshkilat rehberliri bilen alaqe qilip qaytip kétishni telep qilghan. Teshkilat mes'ulliri ularni türkiyege qayturup keltürüsh üchün tirishchanliq körsetken bolsimu, biraq wirus bilen yuqumlan'ghan bir kishini ayropilan'gha chiqirishqa we yötkeshke amal bolmighan.

Merhum abduraxman abdulning istanbulda yéqin ötken dosti memettursun Uyghur ependi, merhum abduraxman abdul bilen késel waqtida téléfonda sözleshkenlikini, ularning istanbulgha qaytip kélishi üchün türkiyediki bezi teshkilat mes'ullirining yardimi bilen ulargha pul ewetkenlikini, biraq shu pul ewetken küni yeni 18‏-féwral küni abduraxman abdulning ölüm xewirini anglap qayghugha chömgenlikini, merhumning bek téz we tuyuqsizla ölüp ketkenlikidin bek échin'ghanliqini ipadilidi.

Nisagul xanim, merhum yoldishining axiretlik ishliri tamamlinip depne qilin'ghandin kéyin 21‏-féwral küni kéchide qizi bilen istanbulgha saq-salamet qaytip kelgen. Ularning qolida türkiyede muddetsiz olturaqlishish ruxset kinishkisi bolup, ular istanbulgha kélishte héch qandaq tosalghugha uchrimighan.

Nisagul xanim we uning qizimu korona wirusi bilen yuqumlan'ghan bolup ehwali anche éghir emes iken. Ular hazir istanbuldiki öyide dura ichip dawaliniwatqanliqini bildürdi.