Абдуреһим ғени: «хитай әлчиханисиға киришим тутқундики туғқанлирим һәққидә җаваб елиш үчүндур»

Мухбиримиз меһрибан
2020-08-16
Елхәт
Пикир
Share
Принт
3 Йилдин буян голландийәниң дам мәйданида ялғуз кишилик намайиш қилған паалийәтчи абдуреһим ғени өзиниң уруқ-туғқанлирини сүрүштә қилип хитай консулханисиға хәт киргүзүватқан көрүнүш. 2020-Йили авғуст, голландийә.
3 Йилдин буян голландийәниң дам мәйданида ялғуз кишилик намайиш қилған паалийәтчи абдуреһим ғени өзиниң уруқ-туғқанлирини сүрүштә қилип хитай консулханисиға хәт киргүзүватқан көрүнүш. 2020-Йили авғуст, голландийә.
Abduréhim Ghéni ozi teminligen

14-Авғуст әтигән фейсбокта 3 йилдин буян голландийәниң дам мәйданида ялғуз кишилик намайиши арқилиқ хитай лагерлиридики уруқ-туғқанлири вә уйғурларниң вәзийитини аңлитиватқан паалийәтчи абдуреһим ғениниң шу күни хитайниң голландийәдики әлчиханиси ичигә бөсүп киргәнлики вә кейин голландийә сақчилири тәрипидин тутқун қилинғанлиқи һәққидә нәқ мәйдан син филими тарқалди.

Син филими тарқилип тордашлар арисида абдуреһем ғени һәққидә җиддий инкас давам қиливатқинида униң бирнәччә саәттин кейин қоюп берилгәнлик учури тарқалди.

Вәқәдин кейин абдуреһим ғени әпәнди радийомиз зияритини қобул қилип, җүмә күни әтигән йүз бәргән вәқә һәққидә ениқлима бәрди.

Абдуеһим ғени әпәндиниң билдүрүшичә, униң 14-авғуст әтигән голландийә әлчиханисиға кириш мәқсити әмәлийәттә уни үзлүксиз җавабсиз қалдуруватқан хитай әлчиханисидин тутқундики туғқанлири һәққидә йүз туранә ениқ җаваб елиш үчүн болған икән. Әмма хитай әлчихана хадимлири униңға бу пурсәтни беришниң орниға әлчиханиниң қоғдиғучи хадими арқилиқ уни әлчиханидин мәҗбури чиқиривәткән. Голландийә сақчилириниң уни тутқун қилип елип кетишиму хитай әлчиханисиниң шикайити сәвәбидин болған икән.

Абдуреһим әпәндиниң билдүрүшичә, униң чүшәндүрүши билән сақчилар уни икки саәттин кейин өйигә қайтурған. Әгәр голландийә соти хитай әлчиханисиниң шикайитини қобул қилса, униңға 1000 явро әтрапида җәриманә қоюлуши мумкинкән.

Абдуреһим ғени әпәнди йәнә өзиниң 3 йилдин буян тутқундики уруқ-туғқанлириниң әһвалини голландийәдики хитай әлчиханисидин һәр хил йоллар арқилиқ үзлүксиз сүрүштә қилип кәлгән болсиму, әмма хитай әлчиханисиниң униңға һазирға қәдәр ениқ бир җаваб бәрмәслики, буниң билән униң 14-авғуст күни хитай әлчиханиси ичигә кирип йүзтуранә җаваб елишқа мәҗбур болуштәк қатмал вәзийәтни пәйда қилғанлиқини билдүрди.

У йәнә 14-авғуст йүз бәргән хитай әлчиханиси ичигә кириштин илгирики 3 күнлүк намайиши һәққидә тохталди.

Униң билдүрүшичә, у голландийә һөкүмитидики мунасивәтлик органлардин намайиш тәстиқи алғандин кейин, 3 күндин буян голландийәниң дәнһак шәһиридики хитай әлчиханиси алдида тинч намайишини давамлаштуруватқан икән. У бу җәрянда хитай әлчиханиси алдида тутқундики уйғурлар һәққидә сүрәтләр көргәзмиси қилиш, паалийәтчиләрниң уйғур вәзийити һәққидики авазлиқ нутуқлирини аңлитиш қатарлиқ усулларда тутқундики 19 нәпәр туғқини вә уйғур вәзийитини аңлатқан. У йәнә хитай әлчиханисидин тутқундики туғқанлири һәққидә җаваб беришни тәләп қилип икки күн илгири әлчихана алдидики хәт сандуқидин мәктуп йоллиған. Әмма хитай әлчиханиси униң илгири голландийә ташқи ишлар министирлиқи арқилиқ аилисидики тутқунларни сүрүштүргән мәктупиға җаваб қайтурмиғинидәк, бу қетимму униң хетиға җаваб қайтурмиған. Хитай әлчиханиси йәнә бир күн илгири, йәни 13-авғуст күни голландийә сақчилириға униң хитай әлчиханиси алдида намайиш қилишидин шикайәт қилған. Әмма голландийә сақчилири униң рухсәтлик намайиш қилғанлиқини билгәндин кейин, униңға намайиш қаидисигә әмәл қилишни уқтуруп қайтип кәткән икән. Нәччә күндин буян хитай әлчиханисидин ениқ җаваб алалмиған абдуреһим ғени әпәнди 14-авғуст әтигән тутқундики туғқанлири һәққидә әлчихана хадимлиридин йүзтуранә җаваб елиш үчүн әлчихана ичигә киргән. Әмма у хитай әлчиханисиниң буйруқи билән қоғдиғучи хадим тәрипидин мәҗбури чиқириветилгән. Хитай әлчиханисиниң шикайити сәвәбидин голландийә сақчилири тәрипидин елип кетилип, 2 саәттин кейин өйигә қайтурулған.

Абдуреһим ғени йәнә хитай әлчиханисиниң униң аилә әзалирини сүрүштүрүштәк әң әқәллий тәлипиниму җавабсиз қалдуруши, һәтта униң үстидин шикайәт қилиши, хитай һөкүмитиниң маһийитини хәлқараға техиму ениқ ечип бәрди, деди.

Зияритимиз ахирида абдуреһим ғени әпәнди йәнә өзиниң голландийә һөкүмитиниң рухсити билән саяһәтчиләр көп келидиған амстердамдики дам мәйдани вә хитай баш әлчиханиси алдида елип бериватқан тинч шәклидики намайишини давам қилидиғанлиқини билдүрди. У хитай һөкүмитигә қарши хәлқаралиқ бесимни күчәйтиштә тинч шәкилдә елип берилидиған бу хилдики намайишларниң техиму зор үнүми болидиғанлиқини тәкитлиди.

Пикирләр (0)
Share
Толуқ бәт