Abduréhim ghéni: "Xitay elchixanisigha kirishim tutqundiki tughqanlirim heqqide jawab élish üchündur"

Muxbirimiz méhriban
2020-08-16
Élxet
Pikir
Share
Print
3 Yildin buyan gollandiyening dam meydanida yalghuz kishilik namayish qilghan pa'aliyetchi abduréhim ghéni özining uruq-tughqanlirini sürüshte qilip xitay konsulxanisigha xet kirgüzüwatqan körünüsh. 2020-Yili awghust, gollandiye.
3 Yildin buyan gollandiyening dam meydanida yalghuz kishilik namayish qilghan pa'aliyetchi abduréhim ghéni özining uruq-tughqanlirini sürüshte qilip xitay konsulxanisigha xet kirgüzüwatqan körünüsh. 2020-Yili awghust, gollandiye.
Abduréhim Ghéni ozi teminligen

14-Awghust etigen féysbokta 3 yildin buyan gollandiyening dam meydanida yalghuz kishilik namayishi arqiliq xitay lagérliridiki uruq-tughqanliri we Uyghurlarning weziyitini anglitiwatqan pa'aliyetchi abduréhim ghénining shu küni xitayning gollandiyediki elchixanisi ichige bösüp kirgenliki we kéyin gollandiye saqchiliri teripidin tutqun qilin'ghanliqi heqqide neq meydan sin filimi tarqaldi.

Sin filimi tarqilip tordashlar arisida abduréhém ghéni heqqide jiddiy inkas dawam qiliwatqinida uning birnechche sa'ettin kéyin qoyup bérilgenlik uchuri tarqaldi.

Weqedin kéyin abduréhim ghéni ependi radiyomiz ziyaritini qobul qilip, jüme küni etigen yüz bergen weqe heqqide éniqlima berdi.

Abduéhim ghéni ependining bildürüshiche, uning 14-awghust etigen gollandiye elchixanisigha kirish meqsiti emeliyette uni üzlüksiz jawabsiz qalduruwatqan xitay elchixanisidin tutqundiki tughqanliri heqqide yüz turane éniq jawab élish üchün bolghan iken. Emma xitay elchixana xadimliri uninggha bu pursetni bérishning ornigha elchixanining qoghdighuchi xadimi arqiliq uni elchixanidin mejburi chiqiriwetken. Gollandiye saqchilirining uni tutqun qilip élip kétishimu xitay elchixanisining shikayiti sewebidin bolghan iken.

Abduréhim ependining bildürüshiche, uning chüshendürüshi bilen saqchilar uni ikki sa'ettin kéyin öyige qayturghan. Eger gollandiye soti xitay elchixanisining shikayitini qobul qilsa, uninggha 1000 yawro etrapida jerimane qoyulushi mumkinken.

Abduréhim ghéni ependi yene özining 3 yildin buyan tutqundiki uruq-tughqanlirining ehwalini gollandiyediki xitay elchixanisidin her xil yollar arqiliq üzlüksiz sürüshte qilip kelgen bolsimu, emma xitay elchixanisining uninggha hazirgha qeder éniq bir jawab bermesliki, buning bilen uning 14-awghust küni xitay elchixanisi ichige kirip yüzturane jawab élishqa mejbur bolushtek qatmal weziyetni peyda qilghanliqini bildürdi.

U yene 14-awghust yüz bergen xitay elchixanisi ichige kirishtin ilgiriki 3 künlük namayishi heqqide toxtaldi.

Uning bildürüshiche, u gollandiye hökümitidiki munasiwetlik organlardin namayish testiqi alghandin kéyin, 3 kündin buyan gollandiyening denhak shehiridiki xitay elchixanisi aldida tinch namayishini dawamlashturuwatqan iken. U bu jeryanda xitay elchixanisi aldida tutqundiki Uyghurlar heqqide süretler körgezmisi qilish, pa'aliyetchilerning Uyghur weziyiti heqqidiki awazliq nutuqlirini anglitish qatarliq usullarda tutqundiki 19 neper tughqini we Uyghur weziyitini anglatqan. U yene xitay elchixanisidin tutqundiki tughqanliri heqqide jawab bérishni telep qilip ikki kün ilgiri elchixana aldidiki xet sanduqidin mektup yollighan. Emma xitay elchixanisi uning ilgiri gollandiye tashqi ishlar ministirliqi arqiliq a'ilisidiki tutqunlarni sürüshtürgen mektupigha jawab qayturmighinidek, bu qétimmu uning xétigha jawab qayturmighan. Xitay elchixanisi yene bir kün ilgiri, yeni 13-awghust küni gollandiye saqchilirigha uning xitay elchixanisi aldida namayish qilishidin shikayet qilghan. Emma gollandiye saqchiliri uning ruxsetlik namayish qilghanliqini bilgendin kéyin, uninggha namayish qa'idisige emel qilishni uqturup qaytip ketken iken. Nechche kündin buyan xitay elchixanisidin éniq jawab alalmighan abduréhim ghéni ependi 14-awghust etigen tutqundiki tughqanliri heqqide elchixana xadimliridin yüzturane jawab élish üchün elchixana ichige kirgen. Emma u xitay elchixanisining buyruqi bilen qoghdighuchi xadim teripidin mejburi chiqiriwétilgen. Xitay elchixanisining shikayiti sewebidin gollandiye saqchiliri teripidin élip kétilip, 2 sa'ettin kéyin öyige qayturulghan.

Abduréhim ghéni yene xitay elchixanisining uning a'ile ezalirini sürüshtürüshtek eng eqelliy telipinimu jawabsiz qaldurushi, hetta uning üstidin shikayet qilishi, xitay hökümitining mahiyitini xelq'aragha téximu éniq échip berdi, dédi.

Ziyaritimiz axirida abduréhim ghéni ependi yene özining gollandiye hökümitining ruxsiti bilen sayahetchiler köp kélidighan amstérdamdiki dam meydani we xitay bash elchixanisi aldida élip bériwatqan tinch sheklidiki namayishini dawam qilidighanliqini bildürdi. U xitay hökümitige qarshi xelq'araliq bésimni kücheytishte tinch shekilde élip bérilidighan bu xildiki namayishlarning téximu zor ünümi bolidighanliqini tekitlidi.

Toluq bet