Ялғуз намайишчи абдуреһим ғени аместердам дам мәйданида икки җумһурийәтни хатирилиди

Мухбиримиз меһрибан
2019-11-16
Елхәт
Пикир
Share
Принт
ялғуз кишилик намайишчи абдуреһим ғени әпәнди голландийә дам мәйданида икки җумһурийәтни хатириләш паалийити өткүзди. 2019-Йили 16-ноябир. Амистердам, голландийә.
Ялғуз кишилик намайишчи абдуреһим ғени әпәнди голландийә дам мәйданида икки җумһурийәтни хатириләш паалийити өткүзди. 2019-Йили 16-ноябир. Амистердам, голландийә.
Abdurehim Gheni Teminligen

16 Айдин бери голландийә пайтәхти аместердамдики дам мәйданида ялғуз намайишни давамлаштуруп келиватқан абдуреһим ғени 16-ноябир күни 20-әсир уйғур тарихидики икки җумһурийәтни хатириләш паалийити өткүзди.

Аместердамдики дам мәйданида өткүзүлгән икки җумһурийәтни хатириләш паалийити шу йәр вақти 16-ноябир шәнбә саәт 12:00 дә абдуреһим ғениниң уйғурчә вә голландчә нутқи билән башланди. Униң нутқи йәнә уйғур тәрҗиман арқилиқ нәқ мәйданда инглизчиға тәрҗимә қилинди.

Абдуреһим ғени нутқида икки қетимлиқ шәрқий түркистан җумһурийитиниң қурулуши вә уларниң қандақ тарихий шараитта йиқилғанлиқиға даир тарихи савақларни әслитип өтти. У сөзидә йәнә хитай коммунист һакимийитиниң уйғурлар үстидин йүргүзүватқан ирқий вә диний бастурушлирини дуняға аңлитишниң зөрүрлүкини, дуня җамаәтчиликиниң диққитини уйғурларниң нөвәттики җиддий вәзийитигә тартишниң муһаҗирәттики һәр бир уйғурниң баш тартип болмайдиған вәзиписи икәнликини тәкитлиди.

Нәқ мәйдандин радийомиз зияритини қобул қилған абдурәһим ғени өзиниң 2 айдин буян җиддий тәйярлиқ қилиш арқилиқ уйғур тарихидики икки җумһурийәткә аит тарихий сүрәтләрни топлиғанлиқини, мәхсус лозунка ясиғанлиқини шундақла илгири өзиниң ялғуз кишилик намайиши җәрянида ишләткән уйғурлар һәққидики тәшвиқат тахтилириниң мәзмунини йеңилиғанлиқини билдүрди. У йәнә бүгүнки паалийәткә қатнашқан һәрқандақ бир кишиниң уйғур тарихи, уйғурларниң нөвәттики сиясий вәзийити вә уйғур мәдәнийити һәққидә омумйүзлүк бир чүшәнчигә игә болидиғанлиқини әскәртип өтти.

Мәлум болушичә, абдуреһим ғениниң 16-ноябир аместердам дам мәйданида өткүзгән икки қетимлиқ шәрқий түркистан җумһурийитини хатириләш паалийити голландийәдики вә дуняниң һәрқайси җайлиридики уйғурларниң қоллишиға еришкән. Голландийәдики уйғур җамаити мәзкур паалийәт җәрянида уйғурчә таамларни һазирлаш, уйғур мәдәнийәт буюмлирини тәйярлаш ишлириға ярдәмләшкән болса, башқа дөләтләрдики уйғурлар абдуреһим ғениға доппа қатарлиқ уйғур кийим-кечәклири билән хатирә буюмлирини әвәткән.

Паалийәткә қатнашқан әхмәтҗан әпәнди зияритимизни қобул қилип, бу паалийәткә голландийәдики уйғурларниң актиплиқ билән қатнашқанлиқини, уйғур яшлириниң актиплиқ билән голландчә, түркчә, әрәбчә, инглизчә тилларда өткән-кәчкәнләргә уйғур вәзийитини аңлатқанлиқини билдүрди.

Биз зияритмиз җәрянида аместердамдики дам мәйданиға келип мәзкур паалийәтни көргән бир саяһәтчидин тәсиратни соридуқ.

Өзиниң тунҗи қетим уйғурлар уюштурған бу хил паалийәткә қатнашқанлиқини билдүргән бу саяһәтчи мәйданға қоюлған лозунка вә тәшвиқат сүрәтлиридин уйғурларниң нөвәттики қийин әһвалини чүшәнгәнликини, уйғурларниң тарихта қурған икки мустәқил җумһурийити вә уйғур мәдәнийитигә аит билимләрдин хәвәр тапқанлиқини баян қилди.

Абдуреһим ғениниң аместердам дам мәйданида өткүзгән уйғур тарихидики икки қетимлиқ шәрқий түркистан җумһурийитини хатириләш паалийити уйғур тәшкилатлириниңму йеқиндин қоллишиға еришкән. Мәзкур паалийәткә германийәдин келип қатнашқан дуня уйғур қурултийиниң рәиси долқун әйса әпәндиму радийомиз зияритини қобул қилди.

Долқун әйса абдуреһим ғениниң 16 айдин буян давамлаштуруп келиватқан ялғуз кишилик намайишиға юғури баһа бәрди. У йәнә абдурәһим ғениниң дуняниң муһим саяһәт мәркәзлириниң бири болған аместердамдики дам мәйданида өткүзгән икки җумһурийәтни хатириләш паалийитиниң уйғур вәзийитини дуняға аңлитишта муһим рол ойнаватқанлиқини тәкитлиди.

Толуқ бәт