Tijaretchi abduxélilning türmide ölgenliki delillendi, qiyin-qistaqtin ölgenliki perez qilinmaqta

Muxbirimiz shöhret hoshur
2021-05-10
Share
Tijaretchi abduxélilning türmide ölgenliki delillendi, qiyin-qistaqtin ölgenliki perez qilinmaqta Künestiki yéngi türmide jan üzgen, ghulja shehiridiki tömür sodigiri abduxélil hashim ayali bilen. (Waqti we orni éniq emes)
Oqurmen teminligen

Künestiki bir türmide jan üzgenliki melum bolghan ghulja sheherlik tijaretchi abduxélil hashim heqqide ilgirilep élip barghan éniqlashlirimiz dawamida, uning türme doxturxanisida ölgenliki delillendi. Abduxélilning qazaqistandiki jiyenining bügün radiyomizgha inkas qilishiche, abduxélilning ayali u ölüp kétishtin ikki kün burun, uning bilen ékranda körüshken bolup, ékranda abduxélil saq-salamet we keypiyati yaxshi halette körün'gen iken. Abduxélilning qazaqistandiki tughqanliri uning türmide qiyin-qistaqtin ölgenlik éhtimalliqini perez qilishmaqta.

Biz türmide 59 yéshida jan üzgen abduxélil hashim heqqide ghuljidiki saqchi idariliri, türme bashqurush idarisi we türme xadimlirigha téléfon qilduq. Xadimlar, köpinche hallarda, so'allirimizgha jawab bérishni ret qildi.

Taghisi abduxélil hashim heqqide jüme küni radiyomizgha xewer bergen qazaqistanliq abduwahap hakimning bügün yene inkas qilishiche, bir heptigiche uninggha héchqandaq uchur bérelmigen ghuljidiki uruq-tughqanliri tünügün tunji qétim bu heqte éghiz achqan. Bu éghiz échishmu, abduwahap, öz öyide ötküzgen nezirning körünüshini ghuljidiki uruq-tughqanlirigha yollighandin kéyin mumkin bolghan. Déyilishiche, uruq-tughqanliri bu nezir widiyosini körgendin kéyin, abduwahapning dadisigha yeni abduxélilning akisigha sewr tilep söz qaldurghan. Emma ular yenila, abduxélilning qandaq seweb bilen ölgenliki, jesitining a'ilige qayturulghan-qayturulmighanliqi qatarliq asasliq uchurlar heqqide éghiz achmighan. Abduwahap hakim yene özining bir qisim alaqe torliri arqiliq, abduxélil hashimning ölümidin ikki kün burun ayali bilen ékranda körüshtürlgenliki we ayalining uni nahayiti saghlam we keypiyati yaxshi halette körgenliki hem bu tesiratini shu küni uruq-tughqan we qolum qoshniliri bilen ortaqlashqanliqi heqqide uchur alghan. U yene abduxélilning jesitining a'ilisige bérilmigenlikidinmu xewer tapqan. Abduwahap hakim taghisining lagérgha kirishtin awwal özliri bilen shérik tijaret qilghan mezgilidiki saghlamliqi we uruq-tughqanlirining abduxélilning ölüm uchurini mumkin qeder özidin yoshurushqa trishqanliqi we abduxélilning jesitining a'ilisige bérilmigenliki qatarliq uchurlargha asasen, bolupmu ölümidin ikki kün burun ayali bilen normal ékranda körüshkenlikige asasen, uning türmide qiyin-qistaq we yaki bir saqchi zorawanliqi weqesi sewebidin hayatidin ayrilghanliq éhtimalliqini perez qilmaqta.

Biz bu ehwallarni aydinglashturush üchün, künestiki alaqidar xadimlargha qaytidin téléfon qilduq.

Tordiki uchurlardin melum bolushiche, küneste ilgiriki qarabughra türmisidin bashqa, künes beshtöpige tewe yéngi sana'et rayonida qurulghan bir türme bar bolup, bu türme xelq ichide yéngi türme dep atalghan. Tordiki uchurlarda bu türmining orni we kölimi éniq bayan qilin'ghan bolsimu, uning nami tilgha élinmighan. Mezkur türme heqqidiki bir süretlik xewerde mehbuslargha qarita diniy esebiylikni tügitish terbiyesi élip bériliwatqanliqi eskertilgen. Ötken yilqi éniqlashlirimizda, abduxélil hashimning 40 yilning aldida bala waqtida qoshnisidin alghan diniy sawat seweblik diniy esebiylikke baghlinip tutulghanliqi melum bolghanidi. Shunga biz künestiki yéngi türmige téléfon qilip, abduxélil hashim heqqide melumat soriduq. Türme xizmetchiliridin biri abduxélil hashimning ölüp ketkenlikini delillidi, emma u jesitining a'ilisige bérilgen-bérilmigenliki heqqide melumat bermidi. Türmining yene bir xadimi, abduxélil hashimning türme doxturxanisida ölgenlikini delillidi. Emma, umu abduxélilning ölüm sewebi, jümlidin qiyin-qistaqqa we yaki saqchi zorawanliqigha uchrighan-uchrimighanliqi heqqide melumat bérelmidi.

Ilgiriki éniqlashlirimizda, türmide jan üzgen ghulja xenbinglik diniy zat abduréshit seleyning saqchi zorawanliqi sewebidin ölgenliki uning bash qismi téngiqliq halettiki jeset süritidin melum bolghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet