Шаир абләт абдурешит бәрқиниң 13 йиллиқ кесилгәнлики дәлилләнди

Мухбиримиз шөһрәт һошур
2022.07.25
Share on WhatsApp
Share on WhatsApp
Ablet-Abdurishit-Berqi.jpg Тутқундики шаир шинҗаң маарип институтиниң дотсенти абләт абдурешит бәрқи әпәнди.
Tang danhong teminligen

Тутқундики көзгә көрүнгән шаир вә педагоклардин бири, шинҗаң маарип институтиниң оқутқучиси абләт абдурешит бәрқидур. Мухбиримизниң узунға созулған ениқлашлири давамида маарип институти абләт абдурешитниң әһвали һәққидә мәлумат беришни изчил һалда рәт қилип кәлди; униң юрти лоп наһийәсиниң сампул йеза сақчи хадими шаирниң 13 йиллиқ кесилгәнлики вә тумшуқ түрмисидә җаза муддитини өтәватқанлиқини дәлиллиди.

Тор архиплиридики материялларда көрситилишичә, шаир абләт абдурешит бәрқи, докторлуқ диссертатсийәсини “абдухалиқ уйғур” темисида яқилиған. Бу теминиң муһимлиқи вә сәзгүрлүкиниң өзила, шаирниң тутқунда икәнлики һәққидә җәмийәттә тарқалған учурларниң растлиқидин бешарәт бәрмәктә иди. Икки йилниң алдида радийомизға кәлгән бир язма инкаста қәйт қилинишичә, шаир абләт абдурешит бәрқи, “шинҗаң мәдәнийити” журнилида елан қилинған “иқтисадий аң вә тәрәққият” вә “сапат вә мағзап” қатарлиқ бир түркүм мақаллири сәвәблик, “бөлгүнчилик” билән әйиблинип 17 йиллиқ кесиветилгән.

Шинҗаң маарип институтиниң оқутуш башқармиси хадими, “абләт абдурешит хизмәт орнида бар-йоқлуқи һәққидики соалимизға җавабән, абләт абдурешит дәп бирини тонумайдиғанлиқини билдүрди. Биз униң тутқундики оқутқучи икәнликини әскәрткинимиздин кейин, бу һәқтә мәктәп мәмурийәт ишханиси билән алақилишишимизни тәвсийә қилди. Әмма мәмурийәт хадимлири абләт абдурешит һәққидә мәлумат беришни изчил һалда рәт қилди.

Шаирниң чәтәлдики кәсипдашлиридин һүсәнҗан әпәндиниң мәлум қилишичә, у үрүмчидики ишәнчлик мәнбәләрдин абләт абдурешитниң кесиветилгәнлики һәққидә ениқ учур алған, әмма җаза муддити һәққидә мәлуматқа еришәлмигән.

Биз шинҗаң маарип инститотиға қайта телефон қилип, абләт абдурешит һәққидә мәлумат соридуқ. Мәктәп оқутуш башқармиси, абләт абдурешит исимлик бир утқучиси йоқлуқини тәкитлиди. Биз униң тутқунда икәнликини әскәрткинимиздә, бундақ бир темида мәлумат берәлмәйдиғанлиқини билдүрди.

Инкасчи һүсәнҗан әпәнди, уйғур райониниң нөвәттики вәзийитидә абләт абдуришиттәк илмий вә әдәбий саһәдә тәң мевә бәргән ярамлиқ бир қәләмкәшниң аман қалмайдиғанлиқини әскәртип; бу һәқтә шаирниң юрти болған лоп наһийә сампул йезилиқ сақчиханисиниң ениқ барлиқини тилға алди.

Телефонимизни қобул қилған сампул йезилиқ сақчи хадими, шаир абләт абдурешит бәрқиниң ата‏-анисиниң сампул йеза айдиңкөл кәнтидә олтурушлуқ икәнликини вә абләт абдурешитниң өзиниң нөвәттә түрмидә икәнликини ашкарилиди.

Бу сақчи хадиминиң баян қилишичә, абләт абдурешит “мәктәптә оқутқучилиқ қиливатқан мәзгилидә өткүзгән хаталиқлири” сәвәблик “муқимлиққа тәһдит” дәп қарилип кесиветилгән.

Йәнә тор архиплиридики материялларда баян қилинишичә, абләт абдурешит бәрқи 2014- вә 2016-йиллири арисида исраилийәдә икки йил илим тәһсил қилған. Мәзкур сақчи хадимниң баянлиридин мәлум болушичә, , шаирниң “муқимлиққа тәһдит” дәп қарилишида язған мақалә вә сөзлигән лексийәлиридин башқа, чәтәлгә чиққанлиқиму бир сәвәб болған. Мәзкур сақчи хадими шаир абләт абдурешит бәрқиниң 13 йиллиқ кесилгәнлики вә нөвәттә тумшуқ түрмисидә җаза муддитини өтәватқанлиқини дәлиллиди.

Юқирида шинҗаң маарип институтиниң дотеснти, шаир абләт абдурешит бәрқиниң түрмидә икәнликиниң дәлилләнгәнлики һәққидә аңлитиш бәрдуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.