Aqsaray aldida achliq élan qilghan Uyghurlar amérika hökümitidin emeliy heriket telep qilmaqta

Muxbirimiz irade
2022.09.20
Share on WhatsApp
Share on WhatsApp
Aqsaray aldida achliq élan qilghan Uyghurlar amérika hökümitidin emeliy heriket telep qilmaqta Xitay hökümitining Uyghurlarni jaza lagérlirida solap türlük wasitiler bilen qiynishi we nöwette wirusni bahane qilip ularni öylirige qamal qilip ach qoyushigha qarshi aqsaray aldida achliq élan qilghan lagér shahitliri we pa'aliyetchiler. 2022-Yili 20-séntebir, washin'gton.
Photo: RFA

Amérikadiki bir qisim lagér shahitliri we pa'aliyetchiler aqsaray aldida 19-séntebir küni achliq élan qilish herikiti bashlighan idi. Biz ularning bu herikitining ikkinchi künide, yeni 20-séntebir küni aqsaray aldigha bérip, ularni alahide ziyaret qilduq.

Biz aqsaray aldigha barghanda, zumret dawut, tursun'ay ziyawudun, gülzire awulqanqizi qatarliq lagér shahitliri hemde amérika Uyghur birleshmisining re'isi elfidar iltebir we shundaqla lagérgha tutulup ketken dadisi üchün dawa qiliwatqan dilyar seypidin qatarliqlar achliq élan qilish herikitini dawam qiliwatatti. Ular bir yaqtin shu'ar towlap, yene bir yaqtin ularning achliq élan qilish herikitige qiziqquchilargha Uyghurlarning kimliki, ular uchrawatqan irqiy qirghinchiliq heqqide melumat bériwatqan idi.

Amérika Uyghur birleshmisining re'isi elfidar iltebir, özlirining néme üchün achliq élan qilish herikiti bashlighanliqini chüshendürüp ötti. U sözide bügün ikkinchi künige qedem qoyghan bu herikitining ikki meqsiti barliqini éytti: “Bizning achliq élan qilishtiki meqsitimiz, birinchidin, xitayning Uyghur élida dawam qiliwatqan qattiq qamali seweblik yüz bergen Uyghurlarning achliq kirizisigha dunyaning diqqitini tartish؛ ikkinchidin, nöwette jenwede dawam qiliwatqan b d t kishilik hoquq kéngishide Uyghur mesilisining resmiy otturigha qoyush üchün amérika hökümitini bir qararname teyyarlashqa chaqirishtin ibaret.”

Xitay hökümitining Uyghurlarni jaza lagérlirida solap türlük wasitiler bilen qiynishi we nöwette wirusni bahane qilip ularni öylirige qamal qilip ach qoyushigha qarshi aqsaray aldida achliq élan qilghan lagér shahitliri we pa'aliyetchiler. 2022-Yili 20-séntebir, washin'gton.

Elfidar, özlirining hazirqi achliq élan qilish meqsitini muxbirlar amérika hökümitining axbarat-uchur ishxanisi we bu ishxanining bayanatchiliri bilen alaqilishish arqiliq, ulargha yetküzüwatqanliqini, pat arida ulardin bir jawab kélishini kütiwatqanliqini éytti.

Melum bolushiche, achliq élan qilish herikitige qatnishiwatqanlar tönügün kéchinimu aqsaray aldida ötküzgen bolup, ular bu jeryanda bir qisim qéyinchiliqlargha duch kelgen. Lagér shahiti zumret dawut, özlirining ayal kishi bolush süpiti bilen kéchide talada qélishining asan'gha toxtimighanliqini, emma özlirining achliq élan qilish herikitini bir netije chiqquche dawam qilidighanliqini éytti.

Lagér shahiti gülzire awulqanqizimu wetendiki lagérlarda qiyniliwatqanlarning azabi aldida özlirining ach qélishining héchnerse emeslikini, shunga bu herikitini izchil dawam qilidighanliqini éytti.

Achliq élan qilish herikitige qatnashqanlar, yenimu köp kishilerning özlirining sépige qoshulushini ümid qilidighanliqini, bu xil emeliy heriketler arqiliq Uyghurlarning awazini dunyagha yetküzüshke jasaret qilishni dewet qildi.

Dilyar seypidin özining lagérgha qamalghan dadisini qutquzush we Uyghurlar uchrawatqan irqiy qirghinchiliqni toxtitish üchün qolidin kelgen barliq charilerni qiliwatqanliqini, yenimu köp Uyghurlarning bu sepke qétilishi kéreklikini tekitlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.