Сабиқ мәшәл көтүргүчи адил абдуреһимниң “дөләтни парчилашқа урунуш җинайити” билән 14 йиллиқ кесилгәнлики дәлилләнди

Мухбиримиз шөһрәт һошур
2022.02.14
Share on WhatsApp
Share on WhatsApp
Сабиқ мәшәл көтүргүчи адил абдуреһимниң “дөләтни парчилашқа урунуш җинайити” билән 14 йиллиқ кесилгәнлики дәлилләнди 2008-Йиллиқ олимпик мусабиқисиниң мәшилини көтүрүп кетиватқан уйғур. 2008-Йили 19-июн, шихәнзә.
AFP

Мухбиримизниң илгириләп әһвал ениқлиши давамида ашкарилинишичә, үрүмчи шәһәр сайбағ районлуқ мәдәнийәт идарисиниң сабиқ башлиқи адил абдуреһим 2008-йилдики бейҗиң олимпикида мәшәл көтүргәндин башқа йәнә үрүмчи вә бейҗиңларда өткүзүлгән 300 дин артуқ мәдәнийәт вә тәнтәрбийә паалийәтлиридә риясәтчи, тәрҗиман вә тәшкиллигүчи болуп вәзипә өтигән; шундақ туруқлуқ, у 2018-йили дөләтни парчилашқа урунуш җинайити билән әйиблинип 14 йиллиқ кесиветилгән.

Тордики материялларда тонуштурулушичә, адил абдуреһим чәтәл тиллиридин русчә вә инглизчини пухта билидикән. У 1992-йили өткүзүлгән “үрүмчи йәрмәнкиси” дә русчә тәрҗиман болуп хизмәт қилған. У 2008-йилидики бейҗиң олимпикида мәшәл көтүрүп, әйни чағда, хитай ахбарат сәһнисидә бир чолпанға айланған. Нөвәттә түрмидә җаза муддитини өтәватқан сабиқ әмәлдар адил абдуреһимниң кесим муддити вә сәвәблирини айдиңлаштуруш үчүн, биз йәнә үрүмчидики алақидар идарә органларға телефон қилдуқ.

Йәнә тордики мәзкур материялда тонуштурулушичә, адил абдуреһим мәдәнийәт тәнтәрбийә-паалийәтлирини тәшкилләш җәһәттиму мол тәҗрибигә игә болуп, у уйғур аптоном райони бойичә өткүзүлгән мәдәнийәт көргәзмиси, әнәниви тәнтәрбийә мусабиқиси вә бейҗиңда өткүзүлгән дөләтлик тәнтәрбийә мусабиқиси қатарлиқ катта сорунларда риясәтчи вә тәшкиллигүчилик вәзиписини өтигән. Адил абдуреһим тутқун қилинғанда, үрүмчи сайбағ районлуқ мәдәнийәт-тәнтәрбийә идарисиниң башлиқи болуп, биз бу һәқтә үрүмчи сайбағ районлуқ сақчи идарисигә телефон қилдуқ. Алақидар бир хадим, адил абдуреһимниң тутулғиниға5 йил болғанлиқи вә җаза муддитиниң 14 йил икәнликини ашкарилиди. Хәвәр архиплирида қәйт қилинишичә, адил абдуреһим бир садақәтмән компартийә әзаси болуп, у дөләт вә аптоном район дәриҗилик болуп, 2010-йилиға қәдәр 300 дин артуқ мәдәнийәт-тәнтәрбийә паалийитидә мәмурий вә кәспий җәһәттин рол алған. Мәлум болушичә, у, үрүмчи оттура сот мәһкимиси тәрипидин сотланған. Сотта униң юқириқи хизмәт вә төһпилириниң һечбири етибарға елинмиған. Телефонимизни қобул қилған үрүмчи оттура сотниң бир хадими, адил абдуреһимниң “дөләтни парчилашқа урунуш җинайити” билән сотланғанлиқи вә сотниң 2018-йили 9-айда ечилғанлиқини ашкарилиди. Мәлум болушичә, у 2017-йили тутқун қилинған.

Хитайчә соху торидики бир мәшәл көтүргүчиләр тизимликидә қәйт қилинишичә, у тутулушниң алдидики йилларда үлгилик компартийә әзаси, милләтләр иттипақлиқи үлгиси вә армийәни һимайә қилғучи илғар шәхс қатарлиқ көпләп мукапатларға еришкән. У йәнә җәнубий корейәдә өткүзүлгән қериндаш шәһәр сәнәт паалийитигә мәдәнийәт әлчиси сүпитидә иштирак қилғаникән. Әмма 2020-йили ашкариланған шаңхәй тизимликидә, униң четишлиқ делоси “террорлуқ” дәп қәйт қилинған.

Юқурида, уйғур райониниң сиясий, мәмури вә мәдәнийәт-тәнтәрбийә саһәлиридә 20 йилчә чолпан болуп көзгә көрүнгән, сабиқ мәшәл көтүргүчи адил абдуреһимниң нөвәттә түрмидә 14 йиллиқ җаза муддитини өтәватқанлиқи һәққидә мәлумат бәрдуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт