Sabiq mesh'el kötürgüchi adil abduréhimning “Döletni parchilashqa urunush jinayiti” bilen 14 yilliq késilgenliki delillendi

Muxbirimiz shöhret hoshur
2022-02-14
Share
Sabiq mesh'el kötürgüchi adil abduréhimning “Döletni parchilashqa urunush jinayiti” bilen 14 yilliq késilgenliki delillendi 2008-Yilliq olimpik musabiqisining mesh'ilini kötürüp kétiwatqan Uyghur. 2008-Yili 19-iyun, shixenze.
AFP

Muxbirimizning ilgirilep ehwal éniqlishi dawamida ashkarilinishiche, ürümchi sheher saybagh rayonluq medeniyet idarisining sabiq bashliqi adil abduréhim 2008-yildiki béyjing olimpikida mesh'el kötürgendin bashqa yene ürümchi we béyjinglarda ötküzülgen 300 din artuq medeniyet we tenterbiye pa'aliyetliride riyasetchi, terjiman we teshkilligüchi bolup wezipe ötigen؛ shundaq turuqluq, u 2018-yili döletni parchilashqa urunush jinayiti bilen eyiblinip 14 yilliq késiwétilgen.

Tordiki matériyallarda tonushturulushiche, adil abduréhim chet'el tilliridin rusche we in'glizchini puxta bilidiken. U 1992-yili ötküzülgen “Ürümchi yermenkisi” de rusche terjiman bolup xizmet qilghan. U 2008-yilidiki béyjing olimpikida mesh'el kötürüp, eyni chaghda, xitay axbarat sehniside bir cholpan'gha aylan'ghan. Nöwette türmide jaza mudditini ötewatqan sabiq emeldar adil abduréhimning késim mudditi we seweblirini aydinglashturush üchün, biz yene ürümchidiki alaqidar idare organlargha téléfon qilduq.

Yene tordiki mezkur matériyalda tonushturulushiche, adil abduréhim medeniyet tenterbiye-pa'aliyetlirini teshkillesh jehettimu mol tejribige ige bolup, u Uyghur aptonom rayoni boyiche ötküzülgen medeniyet körgezmisi, en'eniwi tenterbiye musabiqisi we béyjingda ötküzülgen döletlik tenterbiye musabiqisi qatarliq katta sorunlarda riyasetchi we teshkilligüchilik wezipisini ötigen. Adil abduréhim tutqun qilin'ghanda, ürümchi saybagh rayonluq medeniyet-tenterbiye idarisining bashliqi bolup, biz bu heqte ürümchi saybagh rayonluq saqchi idarisige téléfon qilduq. Alaqidar bir xadim, adil abduréhimning tutulghinigha5 yil bolghanliqi we jaza mudditining 14 yil ikenlikini ashkarilidi. Xewer arxiplirida qeyt qilinishiche, adil abduréhim bir sadaqetmen kompartiye ezasi bolup, u dölet we aptonom rayon derijilik bolup, 2010-yiligha qeder 300 din artuq medeniyet-tenterbiye pa'aliyitide memuriy we kespiy jehettin rol alghan. Melum bolushiche, u, ürümchi ottura sot mehkimisi teripidin sotlan'ghan. Sotta uning yuqiriqi xizmet we töhpilirining héchbiri étibargha élinmighan. Téléfonimizni qobul qilghan ürümchi ottura sotning bir xadimi, adil abduréhimning “Döletni parchilashqa urunush jinayiti” bilen sotlan'ghanliqi we sotning 2018-yili 9-ayda échilghanliqini ashkarilidi. Melum bolushiche, u 2017-yili tutqun qilin'ghan.

Xitayche soxu toridiki bir mesh'el kötürgüchiler tizimlikide qeyt qilinishiche, u tutulushning aldidiki yillarda ülgilik kompartiye ezasi, milletler ittipaqliqi ülgisi we armiyeni himaye qilghuchi ilghar shexs qatarliq köplep mukapatlargha érishken. U yene jenubiy koréyede ötküzülgen qérindash sheher sen'et pa'aliyitige medeniyet elchisi süpitide ishtirak qilghaniken. Emma 2020-yili ashkarilan'ghan shangxey tizimlikide, uning chétishliq délosi “Térrorluq” dep qeyt qilin'ghan.

Yuqurida, Uyghur rayonining siyasiy, memuri we medeniyet-tenterbiye saheliride 20 yilche cholpan bolup közge körün'gen, sabiq mesh'el kötürgüchi adil abduréhimning nöwette türmide 14 yilliq jaza mudditini ötewatqanliqi heqqide melumat berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet