Үрүмчи кәспий оттура мәктәпниң ака-ука оқуғучиси кесиветилгән, җаза муддитини нәдә өтәватқанлиқи мәлум әмәс

Мухбиримиз шөһрәт һошур
2020-09-02
Елхәт
Пикир
Share
Принт
Бир қораллиқ сақчиниң хитай лагериниң алдида пос туруватқан көрүнүши. 2018-Йили 7-сентәбир, хотән.
Бир қораллиқ сақчиниң хитай лагериниң алдида пос туруватқан көрүнүши. 2018-Йили 7-сентәбир, хотән.
REUTERS

Вәзийәттин хәвәрдар кишиниң баянлиридин мәлум болушичә, туғулғандин башлап һаятниң иллиқ бир йүзини көрүп бақмиған, пәқәт башланғуч мәктәптики оқутқучисиниң сахавити билән үрүмчи кәспий оттура мәктәпкә оқушқа әвәтилгән учтурпанлиқ 16 вә 17 яштики ака-укилар оқуш пүттүрүшкә аз қалған мәзгилидә лагерға тутуп кетилип, истиқбали қайтидин қараңғулашқан. Ениқлашлиримиз давамида лагерда 5йиллиқтин кесилгәнлики айдиңлашқан бу ака-укиниң җаза муддитини һазир қәйәрдә өтәватқанлиқи ата-аниси вә юрт җамаәткә мәлум әмәс икән.

Инкас қилинишичә, учтурпанниң имамлирим йезисида намрат бир аилидә дуняға көз ачқан абдулла абдуреһим вә абдукерим абдуреһим ака-укилар 10 қа кирмәйла ата-аниси аҗришип кәткән. Дадисиниң йенида қалған бу ака-укилар йеши 12-13 кә йәткәндә, дадиси паралич болуп қелип, оқушини тохтитишқа вә ашханиларда ишләшкә мәҗбур болған. Уларниң бу тәқдиригә ечинған уларниң башланғуч мәктәптики бир сабиқ оқутқучиси уларни өз хираҗити билән үрүмчидики кәспий мәктәпкә оқушқа әвәткән. Акиси абдулла боғалтирлиқта, иниси абдуекрим ашпәзликтә иштияқ билән оқуватқан мәзгилидә, уйғур районида лагер тутқуни башлинип, уларниң оқуш пүттүрүп иш-оқәт қилиш вә намратлиқ сәвәбидин айрилип кәткән ата-анисини яраштуруш, иллиқ үгисини қайта әслигә кәлтүрүш арзуси бәрбат болған.

Биз бу йип учлириға асасән, үрүмчи кәспий оттура мәктәпкә телефон қилдуқ.

Телефонимизни алған бир мәмурий хадим, бу мәктәптә 3000 дин артуқ оқуғучи вә ишчи-хизмәтчи барлиқини сәвәб қилип көрситип, бу мәктәптә бундақ кимликтики оқуғучиларниң бар-йоқлуқидин хәвәрсизликини ейтти. Телефоинимизни қобул қилған мәктәп қоғдаш хадими нөвәттә мәктәптә бу хил кимликтики икки оқуғучиниң йоқ икәнликини ейтти. Биз униңдин бу мәктәптин тутқун қилинған оқуғучилар арисида бу иккисиниң бар-йоқлуқини соридуқ. У бу соалимизға җаваб бәрмиди.

Радийомзиға кәлгән инкаста дийилишичә, улар мәктәп пүттүридиғанға бирқанчә ай қалған мәзгилидә 17 яшлиқ абдулла абдурәһим үрүмчи кәспий оттура мәктәптә дәрсханидин тутуп кетилгән. Униң арқидинла 16 яшлиқ иниси абдукерим абдуреһимму мәктәптин ғайиб болған.

Радийомизға кәлгән инкаста ака-ука һәр иккисиниң оқуш пүттүрүшкә бир қанчә ай қалғанда тутулғанлиқи қәйт қилинған.

Учтурпан имамлиримдики бир аманлиқ мудири 17 яшлиқ абдулла абдуреһимниң дәрсханидин, 16 яшлиқ абдукерим абдуреһимниң имамалиримдики практика қиливатқан бир ашханидин тутуп кетилгәнликини дәлиллиди. Униң дейишичә, абдулла абдурәһим 2017‏-йили 3-айниң 16-күни, абдукерим абдурәһим 3-айниң 17‏-күни тутулған. Ашкарилинишичә, абдулла абдуреһимниң мәктәптин елип кетилгәндин кейин нәләрдә тутуп турулғанлиқи мәлум әмәс икин. Әмма абдукерим абдуреһим аввал имамлиримдин учтурпандики бир лагерға, андин у йәрдин үрүмчиигә йөткәп кетилгән.

Инкаста дийилишичә, бу ака-укилардин бала вақтидила айрилип кәткән вә нөвәттә үрүмчидә тазилиқ ишчиси болуп ишләватқан аниси балилири һәққидә учур елишқа иҗтимаий алақә күчи йәтмигән. Учтурпан имамлиримдики мейип дадиси кәнт кадирлириға йиғлаштин башқа амал қилалмиған. 2019-Йили 10-айларда үрүмчидики мәлум бир адвокат имамлиримдики алақидар кәнт кадириға телефон қилип, бу ака-укиниң соти болидиғанлиқи һәққидә учур бәргән. Аридин 3 күн өткәндә кәнт кадирлири мәзкур адвокатқа телефон қилғинида, адвокат уларниң 5 йиллиқтин кеисилгәнликини ейтқан вә кәнт кадирлириға бу һәқтә өзини қайта издимәсликини тапилиған. Мәзкур сот күнидин һазирға қәдәр бир йилға йеқин вақит өткән болсиму, мәһкумларниң имамлиримдики дадиси вә уруқ-туғқанлири, һәтта кәнт кадирлири уларниң җаза муддитини нәдә өтәватқанлиқи һәққидә учур алалмиған.

Дәлиллинишичә, бу ака-укилар үрүмчи кәспий мәктәпкә кириштин 3-4 йил бурун-ашханида ишләп йүргән мәзгилидә-қолланған телефонидин чатақ чиққанлиқи, йәни «қанунсиз үн-син буюмлири» ни көрүп қалғанлиқи үчүн тутулған икән. Делониң вақит тәртипидин қариғанда, бу ака-укилар 13 вә 14 яш вақитлирида «җинайәт» өткүзгән, 16 вә 17 яш вақитлирида тутқун қилинған, улар лагерда 2 йил тутуп турулуп, яшлири 18 вә 19 ға тошқанда кесиветилгән.

Ениқлашлиримиз бу ака-укиларға четилип бир түркүм савақдашлириниңму тутулған вә кесилгәнлики мәлум. Әмма уларни уларни үрүмчидики кәспий мәктәпкә әвәткән сахавәтчи оқутқучисиниң бешиға немә күнләр кәлгәнлики мәлум әмәс.

Пикирләр (0)
Share
Толуқ бәт