Amérika bilen en'gliye xitay hökümitining “Düshmenlerche tor hujumi” ni eyiblidi

Washin'gtondin muxbirimiz irade teyyarlidi
2024.03.26
anxun-ap Xitayning gherbiy jenubidiki sichüen ölkisining chéngdu shehiridiki enshün (安洵) shirkitining ishxanisining ishtin chüshkendin kéyinki körünüshi. 2024-Yili 2-ayning 20-küni. Chéngdu
AP

25-Mart küni, en'gliyening mu'awin bash ministiri oliwér dowdén (Oliver Dowden) en'gliye parlaméntida mexsus bayanat bérish arqiliq, xitay hökümitining en'gliyening saylam mezgilide yüz bergen bir qatar xakkérliq hujumlirining arqisida ikenlikini ilgiri sürgen.

En'gliyening mu'awin bash ministiri oliwér dowdén parlaméntta qilghan sözide mundaq dégen: “Men bügün shuni jezmleshtüreleymenki, xitay hökümitige baghliq bolghan kishiler bizning démokratik organlirimiz we parlamént ezalirimizni nishan qilghan ikki yaman gherezlik tor hujumining jawabkaridur. ”

Dowdén ependining déyishiche, xakkérliq hujumliri 2021-2022-yilliri arisida en'gliyening saylam komitétigha élip bérilghan bolup, bu xakkérlar shu mezgilde saylamda bilet tashlashqa tizimlatqan nechche milyon kishining xususiy uchurlirigha érishken. Xakkérliq hujumi 2022-yili öktebirde saylam komitéti teripidin éniqlan'ghan bolsimu, emma weqe bulturghiche ashkarilanmighan.

Melum bolushiche, xakkérliq hujum pa'aliyetlirining yene biri en'gliye parlamént ezalirini nishan qilghan bolup, ularning xitaygha tenqidiy pikirdiki en'gliyelik parlamént ezalirining élxetlirini tekshürmekchi bolghanliqi melum bolghan.

Mu'awin bash ministir dowdén parlaménttiki sözide mundaq dégen: “En'gliye 2021-yili yazda yüz bergen we en'gliye parlamént ezalirining élxetlirini oghriliqche körüsh urunushining arqisidimu xitay bar, dep qaraydu. ”

Mu'awin bash ministir dowdén sözide bu heriketlerni “Düshmenche heriket” dep qattiq eyibligen bolup, u xitay hökümitining bundaq heriketlirige misal bergende Uyghurlar mesilisinimu tilgha alghan.

U mundaq dégen: “Bizning démokratik mu'esseselirimiz we parlamént ezalirimizni nishanlash we bashqilarni öz ichige alghan bu heriketler xitaydin kéliwatqan düshmenlik heriketlirining eng yéngi endizisi. Biz bularni xitay hökümitining shinjangda uniwérsal kishilik hoquqni we xelq'araliq kélishimlerni toxtimay depsende qilishidin, xongkongda dölet bixeterlik qanuni arqiliq öktichi awazlargha zerbe bérishidin we jenubiy déngizdiki zomigerlik heriketlirige da'ir doklatlardinmu körgen iduq. ”

Dowdén ependi sözining dawamida, en'gliye hökümitining xitayning en'gliyege qaratqan bu düshmenlerche herikitige hergiz sel qarimaydighanliqini tekitlep ötken. U axirida bu xakkérliq hujumlirining jawabkari dep qaralghan ikki shexs we “APT31” dep atalghan xakkérliq ornigha jaza tedbiri élan qilghan.

Oxshash minutlarda yene amérika edliye ministirliqimu bayanat élan qilip, amérika hökümet emeldarlirini, siyasiyonlirini we amérika shirketlirini nishan qilghan tor hujumlirining keynide xitay hökümiti barliqini jakarlighan. Shuning bilen bir waqitta, xitay hökümitige qarashliq bolghan we 14 yildin béri mushundaq hujumlarni qozghap kelgen “APT31” namliq xakkérliq guruppisi we uning 7 neper ezasigha jaza tedbiri élan qilghan.

Amérikadiki “Pardee RAND” aspirantlar mektipining siyaset penliri piroféssori, rand tetqiqat merkizining tor bixeterliki we mudapi'e tetqiqatchisi ku'entin xagson (Quentin Hodgson) ependining radiyomizgha déyishiche, yuqirida tilgha élin'ghan “APT31” xakkérliq guruppisi izchil halda amérikaning eqliy mülüklirini oghrilashqa urunup kelgen bir guruppa bolup, kishini endishige salidighini uning bu arqiliq xitay shirketlirining adaletsiz iqtisadiy ewzellikke érishishi, shundaqla mudapi'ege munasiwetlik téxnikilarning oghrilinishini keltürüp chiqirishi bilen munasiwetlik iken.

U bizge élxet arqiliq qayturghan inkasida mundaq dégen:

 “Xitayning xakkérliq guruppiliri ötken on yil mabeynide körünerlik heriketlerni qildi, ularning pa'aliyetlirining sanimu éship bériwatidu. Bu kishini endishige salidu. Chünki ular öz heriketlirini toxtitish üchün bir sewebni körelmeywatidu. Ochuqini éytqanda, biz gherb döletliri ularning bizning torlirimizni bimalal suyi'istémal qilishigha qarshi tedbir qollanmaywatimiz. ”

Piroféssor ku'entin xagson ependining déyishiche, xitayning bu xakkérliq guruppisining xitay hökümiti öz hakimiyitige tehdit dep qaraydighan chet el siyasiyonlirini nishan'gha élishi diqqet qozghaydighan yéngi endize iken. U mundaq deydu: “Bu endize kishini endishige salidu. Chünki ular hazir teshkilatlarla emes, shexslerningmu izigha chüshkendek qilidu. Ilgiri xitay hökümiti izigha chüshidighan shexsler adette xitay girazhdanliri hemde xitayning muqimliqigha tehdit dep qaralghan guruppilarning ezaliridin teshkil tapatti. ”

Amérika edliye ministirliqi teripidin élan qilin'ghan bayanatta körsitilishiche, xitay hökümitige qarashliq bu xakkérliq guruppisining 10 mingdin artuq wirusluq (yaman gherezlik) élxet arqiliq qilghan xakkérliq hujumining ziyankeshlikige uchrighuchilar oxshimighan qit'e, oxshimighan döletlerdiki minglighan kishige tesir körsetken. Xitay hökümiti qollishidiki bu yer shari xaraktérlik heriket, zhurnalistlar, siyasiy emeldarlar we shirketlerni nishan qilghan, xitay hökümitini tenqid qilghuchilarni basturushni, hökümet organlirini ajiz orun'gha chüshürüshni we soda mexpiyetlikini oghrilashni meqset qilghan. ”

Amérika edliye ministirliqining bash teptishi mérrik b. Garland (Attorney General Merrick B. Garland) Bayanattiki sözide mundaq dégen:

 “Edliye tarmaqliri xitay hökümitining ammigha mulazimet qilidighan amérikaliqlarni qorqutush, amérika qanuni teripidin qoghdilidighan öktichilerni jimiqturush we amérika shirketlirige qaratqan oghriliq heriketlirige yol qoymaydu. . . Bu délo xitay hökümitining amérika we bizning ittipaqdashlirimizning dölet bixeterlikige tehdit sélishni meqset qilghan yaman gherezlik tor heriketlirini qozghitish iradisige ige ikenlikini yene bir qétim semimizge saldi. ”

Amérika fédératsiye tekshürüsh idarisining bashliqi kristofir wray bayanattiki sözide mundaq dégen: “Biz dölet bixeterliki we tereqqiyatimizgha tehdit salghanlarni qet'iy bosh qoymaymiz. Biz bu bayanat arqiliq öz puqralirimiz, karxanilirimiz we halqiliq ul eslihelirimizni qoghdash iradimizni tekitleymiz. ”

26-Mart küni yene en'gliyening tashqi ishlar weziri dawid kamiron mexsus sinliq bayanat élan qilip xitay hökümitini ochuq-ashkara tenqid qildi. U sözide “Xitay hökümiti qollishidiki organlarning qilghini del bizning démokratiyemizge qilin'ghan hujum bolup, biz uni qobul qilmaymiz. ” dégen. U yene xitayning en'gliye démokratiyesi we qimmet qarashlirigha tehdit ep kélidighan heriketlirige qarap turmaydighanliqini tekitlesh bilen birge, bashqa döletlernimu shundaq qilishqa chaqirghan.

Amérika edliye ministirliqi élan qilghan bayanatta xitay xakkérlirining en'gliyege qaratqan hujumlirigha da'ir tepsilatlarmu orun alghan bolup, uningda körsitilishiche, “APT31 Guruppisidiki xakkérlar xitaygha tenqidiy pikirdiki hökümet emeldarliri we siyasiyonlirini teqiblesh üchün ulargha yaman gherezlik détallar yoshurun'ghan élxet yaki ulanmilarni ewetken. Mesilen, ular 2020-yili xitay tehditige qarshi turush meqsiti bilen herqaysi döletlerge tewe bir guruppa parlamént ezaliri we bashqilar teripidin qurulghan ‛xitaygha qarshi xelq'ara parlaméntlar birleshmisi‚ (IPAC) ning yawropa ittipaqidiki her bir ezasi hemde 43 neper en'gliye parlamént ezasining élxetlirini öz ichige alidiken. ”

Mezkur ‛xitaygha qarshi xelq'ara parlaméntlar birleshmisi‚ ning ijra'iye diréktori luk dé pulférd ependi (Luke de Pulford) bügün radiyomizgha qilghan sözide özlirini nishan qilghan bu hujumlardin 3 yil ötkendin xewerdar bolushimiz bizni oylandurdi, dep körsetti. U mundaq dédi:

 “Amérika edliye ministirliqining doklatidin qarighanda, bizning ‛xitaygha qarshi xelq'ara parlaméntlar birleshmisi‚ xitayning xakkérliq hujumliridiki asasiy nishanlarning biri bolghan. Bu guruppigha tewe 400 din oshuq élxetning hujumgha uchrishi bu hujumning bizge qilin'ghanliqini körsitip turmaqta. Méni qattiq epsuslandurghini, biz bizge qilin'ghan bu hujumdin aridin 3 yil ötkende xewer tapqanni az dep, buni yene amérika edliye ministirliqining doklatidin biliwatimiz. Eslide en'gliyediki bixeterlik organliri bizge bu heqte melumat bérishi hemde bizge yardem béridighan tedbirlerni élishi kérek idi. ”

Luk dé pulférd ependi sözide yene özlirining hazir hökümet bilen birlikte bu hujumlargha taqabil turushning yolliri heqqide xizmet qiliwatqanliqini bildürdi.

 “Xitaygha qarshi xelq'ara parlaméntlar birleshmisi” (IPAC) xitay hökümitining Uyghurlargha qiliwatqan ziyankeshlikini pash qilish we uninggha qarshi tedbir qollinishta aktip rol oynawatqan guruppa bolup, bu birleshmide Uyghurlarning awazi boluwatqan nurghun parlamént ezaliri bar idi.

Mesilen, en'gliye parlamént ezasi nusret gheni xanimmu yuqiridiki guruppining ezasi bolup, u bügün xitayning tor hujumlirigha özining “X” tiki hésabi arqiliq inkas qayturup, “Biz bu tehditlerdin hergiz qorqup qalmaymiz, bizning heqiqetni sözleshtin ibaret mes'uliyitimiz hemde démokratiyedin ibaret imtiyazimiz bar” dep tekitligen.

Xitay bolsa amérika we en'gliyening xitayning tor hujumliri heqqidiki bayanatlirini qet'iy ret qilghan. Xitay tashqi ishlar bayanatchisi lin jyen 26-mart künidiki axbarat yighinida “Biz amérika we en'gliyening tor bixeterlik mesilisini siyasiylashturushni toxtitishini telep qilimiz. Xitayni haqaretleshni, xitaygha bir tereplime jaza yürgüzüshni toxtitishini telep qilimiz” dégen. U yene amérika we en'gliyeni xitaygha tor hujumi qildi, dep eyibligen.

Rand tetqiqat merkizining tor bixeterliki we mudapi'e tetqiqatchisi ku'entin xagsonning déyishiche, xitay hökümitining öz qilmishini ret qilishi we hetta amérikagha artip qoyushi közge körüklük ehwal bolup, xitay hökümiti 2015-yili obama hökümiti mezgilidin tartipla amérikaning tor bixeterliki heqqidiki chaqiriqlirigha qulaq salmay kelgen.

Uning déyishiche, hazirqi eng chong tereqqiyatni amérika we uning shérik döletlirining xitayning tor hujumining xewpini toluq tonup yétishi, dep qarashqa bolidiken. U mundaq dédi: “Méningche, yéqinqi üch yildiki eng muhim tereqqiyat shuki, amérika we uning shérikliri-ittipaqdashliri xitayning tor tehditige oxshash köz bilen qarawatidu. Ular axiri bu mesilini ochuq ashkara eyiblesh yolini tallidi. ”

Mutexessislerning qarishiche, amérika we en'gliyening xitayning tor hujumigha yürgüzgen bu qétimliq jaza tedbirliri asasliq xitay hökümitige uning heriketliridin xewiri barliqi, uninggha taqabil turalaydighanliqi we buninggha keng qorsaqliq qilmaydighanliqi heqqide bérilgen agahlandurush signali bolup hésablinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.