Amérika palata ezaliri xitaygha bérilgen 10 yilliq wiza imtiyazigha xatime bermekchi

Marko rubiyo we tom katton qatarliq nopuzluq kéngesh palata ezaliri xitay puqralirigha bérilgen 10 yilliq wiza imtiyazigha xatime bérish hemde xitayning Uyghur, tibet we bashqa milletlerge sistémiliq zulum qilishni axirlashturush üchün “Wiza bixeterlik qanuni” dep atilidighan bir qanun layihesini tonushturdi.

Mezkur qanun layihesini birlikte tunushturghuchilar arisida yene rik skot, marsha bilakburn we ted kruz qatarliq palata ezalirimu bar.

Tom katton bu heqtiki bayanatida: “2014-Yildin bashlap, xitay kompartiyesi 10 yilliq soda we sayahet wizisi élish imkanigha érishti, bu xitay puqralirining amérikigha xalighanche kirip-chiqishigha yol achti. Bu wiza tarqitishta, amérika x k p (xitay kompartiyesi), uning jasusluq organliri we uning bilen ochuq-ashkara hemkarlashqanlarni qarshi aldi. 2014-Yilidiki bu qarar natoghra boldi, emdi bu xataliqni tüzitidighan peyt keldi.”

Qanun layiheside yene xitayning amérikigha qaratqan iqtisadiy we sana'et jasusluq herikitini toxtitish, uning teywen'ge bolghan ighwagerchilik we mejburlash herikitini axirlashturush, xongkonggha qaratqan “Dölet bixeterlik qanuni” ni emeldin qaldurush qatarliq maddilar yer alghan.

Bu heqte toxtalghan rik skot: “Biz kommunist xitayning dunyagha hökümranliq qilish üchün amérikaning téxnikisi we bilim mülük hoquqini oghrilashtin toxtap qalmaydighanliqini bilimiz. Kommunist xitaygha étibar wizisi bérishning héchqandaq sewebi yoq,” dédi.

Marsha bilakburn, xitay kompartiyesi kishilik hoquq we diniy erkinlikke sistémiliq dexli-terüz qilishni axirlashturmighuche, xitay puqralirigha 10 yilliq köp qétim kirip-chiqish wizisi bérishke bolmaydighanliqini éytti.

Kéngesh palata ezasi ted kruz xitayning amérikagha eng chong jughrapiyelik siyasiy tehdit élip kélidighanliqini, uning tetür teshwiqat bilen shughullinip, amérikaliqlarning xitay heqqidiki qarashlirini kontrol qilishqa urinidighanliqini éytti.

Qanun layiheside yene, xitay puqralirining amérikigha xizmet wizisi bilen kirishigimu munasip cheklime qoyush teklipi otturigha qoyulghan.