Америка генералиниң корейә вә японийәлик кәсипдашлири билән көрүши хитайни нишан қилған дәп қаралмақта

Мухбиримиз мәмәтҗан җүмә
2021-05-02
Share
Америка генералиниң корейә вә японийәлик кәсипдашлири билән көрүши хитайни нишан қилған дәп қаралмақта Америка штаб башлиқлири бирләшмисиниң рәиси генерал марк миллей.
Social Media

29-Апрел, америка штаб башлиқлири бирләшмисиниң рәиси генерал марк миллей һавайда корейә вә японийәлик кәсипдашлири билән көрүшүп, американиң "районниң узун муддәтлик тинчлиқи вә муқимлиқи" қоғдашта бәргән вәдисини қайта тәкитлигән. Гәрчә йиғиндин кейин ахбаратқа елан қилинған йиғин мәлуматида хитай биваситә тилға елинмиған болсиму, мәзкур учришиш американиң һәрбий күчини оттура шәрқтин хитайға техиму кәң көләмлик бурашқа қарап қәдәм алғанлиқини намаян қилидикән.

С н н ниң хәвәр қилишичә, йиғин мәлуматида "қаидиләрни асас қилған хәлқара тәртип" ниң муһимлиқи вә американиң һәрбий иқтидарниң барлиқ имканлирини ишқа селип "кеңәйтилгән тәһдит" билән тәминләшкә тәйярлиқ қилиш қатарлиқ аталғуларниң ишлитилгәнлики буниң хитайни нишан қилған бир учришиш икәнликини техиму ениқ көрситидикән.

Бу америка, японийә вә җәнубий корейә һәрбий әмәлдарлириниң корона вируси таралғандин буянқи тунҗи қетимлиқ биваситә учришиши болуп, учришишта йәнә шималий корейәниң ядро вә башқурулидиған бомба пиланиға болған әндишиләрму тилға елинған.

С н н дә көрситишичә, бу юқири дәриҗилик һәрбий әмәлдарларниң учришиши байден һөкүмитиниң диққитини йеқинқи 20 йилдин буян давам қиливатқан уруштин кәлгүсидики риқабәткә мәркәзләштүридиғанлиқини гәвдиләндүридикән.

Президент җов байден чаршәнбә күни кәчтә америка дөләт мәҗлисидә қилған тунҗи нутқида, хитайниң "адаләтсиз сода усули" ға тақабил туридиғанлиқи, һинди-тинч окян районида күчлүк һәрбий мәвҗутлуқни сақлап, "тоқунушни башлаш әмәс, бәлки тоқунушниң алдини елиш" ни көзләйдиғанлиқини оттуриға қойған.

Америка дөләт мудапиә министири лойд австин бу йил мартниң бешида "хитай хизмәт гурупписи" дәп атилидиған бир гуруппиниң тәшкилләнгәнликини җакарлиған һәмдә бу гуруппиниң хитай америка армийәсигә шәкилләндүридиған хирисни техиму яхши чүшинип йетишни мәқсәт қилидиғанлиқини билдүргән иди.

Президент байден чаршәнбә күни йәнә афғанистандики америка әскәрлирини чекиндүрүп чиқидиғанлиқини билдүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт