Американиң мичиган университетида уйғур елидики лагерлар мәсилиси тонуштурулди

Мухбиримиз ирадә
2019-04-22
Елхәт
Пикир
Share
Принт
Мичиган университетиниң «гералд форд аммиви сиясәтләр институти» да өткүзүлгән уйғур елидики еғир кишилик һоқуқ кризиси һәққидики муһакимә йиғининиң уқтуруши. 2019-Йили 18-апрел.
Мичиган университетиниң «гералд форд аммиви сиясәтләр институти» да өткүзүлгән уйғур елидики еғир кишилик һоқуқ кризиси һәққидики муһакимә йиғининиң уқтуруши. 2019-Йили 18-апрел.
Social Media

Һөрмәтлик радио аңлиғучилар, 18-апрел күни америкадики даңлиқ университетларниң бири болған мичиган университетиниң «гералд форд аммиви сиясәтләр институти» да уйғур елидики еғир кишилик һоқуқ кризиси һәққидә бир муһакимә йиғини чақирилди. Йиғинға америкадики адвокат нурий түркәл әпәнди, җорҗ вашингтон университети профессори шан робертис, рос-хулман техника институти оқутқучиси тимосий грус қатарлиқлар тәклип қилинған.

Мичиган университети аммиви сиясәтләр институти дотсенти ан линниң риясәтчиликидә елип берилған муһакимә йиғинида узун йиллардин бери хитай һөкүмитиниң қаттиқ бесим сиясәтлири астида езилип келиватқан уйғурларниң нөвәттә ислами вә миллий адәтлири бойичә саламлашқанлиқи вә һалал-һарамни пәрқләндүргәнликидәк интайин әқәллий һәрикәтлири сәвәбидинму «радикаллиқ» билән әйиблинип «қайта тәрбийә лагерлири» ға қамиливатқанлиқи вә һазирғичә охшимиған мәнбәләрдә алаһазәл 800 миңдин 2 милйонғичә уйғур вә башқа милләтләрниң лагерға соланғанлиқи қатарлиқ түрлүк мәсилиләр һәққидә мәлуматлар берилгән. 

Йиғинда сөз қилған профессор шан робертис қатарлиқ мутәхәссисләр хитай һөкүмити гәрчә уйғур елидики сиясәтләрни «террорлуққа қарши туруш» дегән намлар астида елип бериватқан болсиму, бирақ әмәлийәттә у йәрдә уйғурларға қарши ирқчилиқ түсини алған сиясәтләр йүргүзүлүватқанлиқини әскәртип өткән. 

Нурий түркәл әпәнди бүгүн радийомизниң зияритини қобул қилип йиғин һәққидә тохталди. 

Нурий түркәл әпәнди йиғинда уйғур елидә нөвәттә йүргүзүлүватқан бу сиясәтләрниң уйғур елиниң ичи-сиртида яшаватқан уйғурларға елип келиватқан тәсирлирини асасий нуқта қилип туруп, уйғурлар баштин кәчүрүватқан еғир вәзийәтни шәрһләп өткән.

Йеқиндин буян америкадики нурғун университетларда, илмий тәтқиқат органлирида арқа-арқидин мушуниңға охшаш илмий доклат бериш йиғинлири уюштурулди. Нурий түркәл әпәнди юқиридикигә охшаш билим юртлирида уйғур мәсилисиниң давамлиқ муназирә қилинип турушиниң бу мәсилини давамлиқ һалда җанлиқ тутуп туруш, уни бир кәң аммиви һәрикәткә айландуруш вә қанун-түзүмләрни мақуллашқа түрткә болидиған қозғатқуч күчни шәкилләндүрүш үчүн зор әһмийити барлиқини әскәртип өтти.

У йиғиндики аңлиғучиларғиму уйғурларниң бешиға келиватқан вәзийәтни өзгәртиш үчүн һәр бир кишиниң өзлири турушлуқ җайлардики дөләт мәҗлис әзалири билән алақилишип, уйғурларға мунасивәтлик икки қанун лайиһисиниң мақуллиниши үчүн күч қошушиниң зөрүрлүкини билдүргән. 

Юқиридики бу йиғин «мичиган күндилик хәвәрләр гезити» ниң 18-апрел күнидики санидиму орун алған. Хәвәрдә баян қилинишичә, шу күндики йиғинға қатнашқан бир қисим оқуғучилар йиғин арқилиқ өзлириниң уйғурлар тоғрулуқ нурғун мәлуматларни биливалғанлиқини вә өзиниң бир кишилик сайлам һоқуқини қоллинип туруп, америка дөләт мәҗлиси вә һөкүмитини уйғурларниң кишилик һоқуқини қоллашқа чақириқ қилидиғанлиқини билдүргән.

Пикирләр (0)
Share
Толуқ бәт