Америка дөләт бихәтәрлик мәслиһәтчиси: уйғурларға қаратқан қилмишлири сәвәблик хитайға бәдәл төлитишкә һазирлиниш лазим

Мухбиримиз мәмәтҗан җүмә
2021.01.31
Америка дөләт бихәтәрлик мәслиһәтчиси: уйғурларға қаратқан қилмишлири сәвәблик хитайға бәдәл төлитишкә һазирлиниш лазим Президент җо байдинниң дөләт бихәтәрлик мәслиһәтчиси җәке сулливан.
Social Media

Президент җо байдинниң дөләт бихәтәрлик мәслиһәтчиси җәке сулливан уйғурларға қаратқан қилмишлири сәвәблик америкиниң хитайға бәдәл төлитишкә тәйяр туруши керәкликни билдүрди.

Сулливан 29-январ америка тинчлиқ институтида өткүзүлгән бир паалийәттә мундақ деди: “хитайниң шинҗаңда немиләрни қиливатқанлиқи, хоңкоңда қиливатқан ишлири, тәйвәнгә қаратқан қопаллиқи вә тәһдити үчүн һәрикәт қилишқа, шундақла уни бәдәл төлитишкә тәйярлиқ қилишимиз керәк.”

У, америкиниң қандақ тәдбир қоллинидиғанлиқи һәққидә тәпсилий тохталмиған болсиму, әмма вашингтонниң бу мәсилиләрдики мәвқәсиниң ениқ вә изчил болуши керәкликини ейтти.

Байден һөкүмити килимат өзгириш қатарлиқ мәсилиләрдә хитай билән һәмкарлишишни үмид қилидиғанлиқини билдүргән болсиму, әмма сабиқ президент доналд трамп хитайға қаратқан қаттиқ чәклимә сиясәтлирини давамлаштуридиғанлиқини билдүргән.

Байдинниң ташқи ишлар министири антоний биллинкен вәзипигә тәйинлинип тунҗи өткүзүлгән ахбарат елан қилиш йиғинда, хитайниң уйғурлар устидин ирқий қирғинчилиқ елип бериватқанлиқини қайта тәкитлигән. У, 27-январ күни мухбирларниң трамп һөкүмитиниң уйғурлар устидин чиқарған “ирқий қирғинчилиқ қарари” һәққидики соаллириға җаваб берип мундақ дегән: “мениң ‛уйғурларға қарши ирқий қирғинчилиқ елип бериливатиду‚ дегән һөкүмүм йәнила әслидикидәк. Униңда өзгириш болғини йоқ.”

Америкиниң сабиқ ташқи ишлар министири майк помпейо 19-январ баянат елан қилип, хитайниң уйғурларға қарши “ирқий қирғинчилиқ” вә “инсанийәткә қарши җинайәт” садир қиливатқанлиқини җакарлиған иди.

Униңдин башқа байдин һөкүмити йәнә, хитай тәйвәнгә һәрбий тәһдит селишни күчәйткән мәзгилдә “теодор розвелт” намлиқ авиаматкисини тәйвән боғузи арқилиқ җәнубий деңизға әвәткән вә тәйвәнни қоллап күчлүк баянат елан қилип, америкиниң тәйбейгә бәргән вәдисиниң “мустәһкәм” икәнликини билдүргән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.