Sidnéy: men köpchilikke özümning barliq Uyghurlar üchün küresh qiliwatqanliqimni bildürmekchi

Muxbirimiz shehrizat
2021-03-14
Share
Sidnéy: men köpchilikke özümning barliq Uyghurlar üchün küresh qiliwatqanliqimni bildürmekchi Amérikining shimaliy karolina shtatida turushluq 16 yashliq qiz sidnéy change.org Torida bashlatqan, amérika kéngesh palatasi we awam palatasining Uyghurlarning mejburiy emgekke sélinishini tosush qanun layihisini maqullishini qolgha keltürüsh üchün imza toplash pa'aliyitining muraji'etnamisi.
change.org

Amérikining shimaliy karolina shtatida turushluq 16 yashliq qiz torda Muraji'etname Yollap, xelqning imzasi arqiliq amérika kéngesh palatasi we awam palatasining Uyghurlarning mejburiy emgekke sélinishini tosush qanun layihesini maqullishini telep qilghan. Bu Muraji'etnamige Hazir 2315 tin artuq imza qoyulghan.

Biz sidnéy isimlik 16 yashliq qizni ziyaret qilish pursitige ige bolduq. U erkin asiya radiyosining ziyaritini qobul qilghanda, Uyghurlarning mejburiy emgekke sélinishini tosush qanun layihesini maqullash muraji'etnamisi yollashtiki sewebi we néme üchün Uyghurlar heqqide söz qilishni tallighanliqini bayan qildi. U köpchilikke özining barliq Uyghurlar üchün küresh qiliwatqanliqini hemde Uyghurlarning tézdin erkinlikke chiqishini arzu qilidighanliqini éytti.

Töwende anglighuchilargha sidnéi bilen ötküzgen söhbitimizni sunimiz.

Erkin asiya radiyosi: özingizni we néme ish qiliwatqanliqingizni qisqiche tonushturup ötken bolsingiz?

Sidnéy: ismim sidnéy, 16 yashqa kirdim. Hazir dölet mejlisini Uyghurlarning mejburiy emgekke sélinishini tosush qanun layihesini maqullashqa qayil qilish pa'aliyiti bilen shughulliniwatimen.

Erkin asiya radiyosi: Uyghurlarning qirghin qiliniwatqanliqini qachan bilgen idingiz?

Sidnéy: 9-ayda inistigramda Uyghurlar toghrisidiki yazmini körginimde yürikim qattiq aghridi we shundin buyan Uyghurlar üchün birer ish qilish niyitige keldim. Men bu heqte izdinip, Uyghurlarning mejburiy emgekke sélinishini tosush qanunini bildim hemde bu toghruluq Muraji'etme Élan qildim.

Erkin asiya radiyosi: Muraji'etname Qandaqraq kétiwatidu?

Sidnéy: heqiqeten yaxshi boluwatidu. Hazir ikki mingdin artuq Imza Toplandi, bu méni nahayiti xushal qildi.

Erkin asiya radiyosi: siz dölet mejlisini Uyghurlarning mejburiy emgekke sélinishini tosush qanunini maqullashqa chaqirghan Bu muraji'etnamiNi bashlapsiz. Uyghurlar mesilisini sözleshke néme seweb boldi? néme üchün bu ishni qilishni tallidingiz?

Sidnéy: manga nisbeten bu ishni qilish toghra tuyuldi, chünki bundaq irqiy qirghinchiliq we mejburiy emgekke sélinish 21-esirde yeni bundaq bir zamaniwi dunyada yüz bermesliki kérek. Biz bularni mektepte ögen'gen, emeliyette yüz bermeydu dep oylayttim, ré'al turmushta yüz bergende néme qilishni bilmeyttim. Hazir bu ishlar emeliyette yüz bériwatidu, shunga men néme üchün muraji'etname bashlimaymen, belkim mushu ishni qilish arqiliq ashu kishilerge yardem bérelishim mumkin, dep oylidim.

Erkin asiya radiyosi: kokakola, nayk we her qaysi tijaret shirketliri Uyghurlarning mejburiy emgekke sélinishini tosush qanunining maqullinishining aldini élishqa heriket qiliwatidu, buninggha qandaq qaraysiz?

Sidnéy: méningche ular lobichiyliq qilmasliqi kérek, chünki kishilik hoquq kishilerning erzan emgek küchidin paydilinip pul tépishidin muhimraq. Bu shirketlerning bayliqi özlirining mehsulatlirini insaniy exlaqqa uyghun yollar bilen ishleshke yétidu. Shunga bu kishilerni azad qilish erzan emgek küchidin paydilinip téximu köp payda élishqa qarighanda téximu muhim.

Erkin asiya radiyosi: xitay amérikaning tijarettiki üchinchi chong shériki, shunga ular xitaydin nurghun mal import qilidu. Dölet mejlisi we amérika hökümitining nöwettiki Uyghur mesiliside némilerni qilishini ümid qilisiz?

Sidnéy: men dölet mejlisining Uyghurlarning mejburiy emgekke sélinishini tosush qanunini maqullishini, andin prézidéntning imza qoyushini we bashqa döletlermu mushuninggha oxshash qanunlarni maqullishini ümid qilimen. Chünki bu qanun maqullansa, paydini qoghliship mejburlan'ghan emgekchilerni ishletken shirketler bilen soda qilish qanunsizliq bolidu. Démekchimenki, bu heqiqeten bir yaxshi ish, chünki bu qanun layihesi ashu kishilerni erkinlikke érishtüridu we ularning qan-teri biz ishlitidighan mehsulatlarda bolmaydu. Ularning yene nöwettiki cheklimilerni ijra qilip, sherqiy türkistandin paxta we pemidurlarni import qilishni dawamliq cheklishini ümid qilimen. Shundaqla ularning bu cheklimini Uyghurlarning mejburiy emgekke sélinishini tosush qanunini maqullashqa oxshash barliq mehsulatlargha kéngeytishini ümid qilimen.

Erkin asiya radiyosi: awam palatasining wekili yéqinda Uyghurlarning mejburiy emgekke sélinishini tosush qanunini parlaméntning ikkila palatasida qayta otturigha qoydi, bashqilar bu qanun layihesining maqullinishini ilgiri sürüsh üchün néme qilalaydu?

Sidnéy: méningche ular aldi bilen men otturigha qoyghan muraji'etnamige imza qoyushi kérek, bu ularning parlaméntqa bu qanun layihesining maqullinishini xalaydighanliqini bildürüshning asan bir yoli. Emma hemmidin muhimi, kishiler özliri turuwatqan yerlerning kéngesh palata ezaliri bilen alaqiliship ulargha bildürüsh kérek. Bu ziyarettin kéyin men öz rayonumdiki kéngesh palata ezaliri we wekilliri bilen téximu köp alaqilishimen, chünki biz her bir ishxanining ishikini chékip kirip derdimizni anglatqandila ular sözlirimizge qulaq sélishi we bu qanun'gha diqqitini bérishi mumkin.

Erkin asiya radiyosi: 19-yanwar amérika tunji bolup xitayni Uyghurlargha qarita irqiy qirghinchiliq qiliwatidu dep resmiy élan qilghan dölet bolup qaldi. Sizningche, bashqa döletlerning Uyghurlar üchün sözlishini néme tosidu? dunya rehberliri néme üchün Uyghur krizisini irqiy qirghinchiliq déyishni xalimaydu?

Sidnéy: méningche, dunya rehberliri qandaq irqiy qirghinchiliqlarning yüz bériwatqanliqini taza éniq bilmise kérek, shunga bu ishlarni bilidighanlar yéterlik bolmighachqa buning üchün sözleydighanlarmu yéterlik bolmaywatidu. Emma pat arida en'gliyening téléfon arqiliq bélet tashlaydighanliqini bilimen, bashqa döletlerdiki téximu köp kishilerningmu xewerdar bolushini we Uyghurlar üchün sözlishini we téximu köp kishilerning uning irqiy qirghinchiliq ikenlikini tonup yétishini ümid qilimen.

Erkin asiya radiyosi: siz bu pa'aliyetni qachan bashlighan? hemde bu pa'aliyitingizning hazirche qandaq netijisini körüp baqtingiz?

Sidnéy: men bultur öktebirde bashlidim. Shuningdin kéyin men özüm turushluq rayondiki kéngesh palata ezasi burs bilen uning ishxanisida körüshtüm, yene bashqa bir kéngesh palata ezasi we tashqi munasiwetler komitétining bashliqi bilenmu mushu jüme küni körüshmekchimen. Men bu ishni bashlighandin kéyin téximu köp kéngesh palata ezaliri bu qanun layihisige imza qoydi. Uning üstige bu qanun layihesi awam palatasida qayta otturigha qoyuldi, méning bu ishta oynighan azraq rolum bar dep qaraymen. Shunga yüz bériwatqan bu ishlar méni heqiqeten xushal qilidu.

Erkin asiya radiyosi: siz yaki sizge oxshash xitaylarning bu wehshiylikini toxtitishni ümid qiliwatqan oqughuchilar bu qirghinchiliqini toxtitish üchün némilerni qilalaysiler?

Sidnéy: hazirqi waqittiki eng muhim ish Uyghurlarning mejburiy emgekke sélinishini tosush qanunini we Uyghurlargha yardem béridighan bashqa qanunlarning maqullinishini qolgha keltürüsh. Yene bashqilarni terbiyeleshmu intayin muhim, chünki nurghun kishiler néme ishlarning yüz bériwatqanliqini bilmeydu, men a'ilemdikilerge bildürimen we a'ilemni terbiyeleymen.

Bizge oxshash oqughuchilar a'ilisidikilerni we dostlirini terbiyeleydu, shundaq qilish arqiliq bu wehshiylikni pat arida axirlashturalishimizni ümid qilimen.

Men köpchilikke özümning barliq Uyghurlar üchün küresh qiliwatqanliqimni bildürmekchi, chünki ularning tézdin erkinlikke chiqishini arzu qilimen. Men bu arzuyumning haman bir küni emelge ashidighanliqigha ishinimen, emma shuning üchün nurghun ishlarni qilishimizgha we nurghun bedellerni tölishimizge toghra kélidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet