Том суози: "биз уйғурларниң авази болушимиз керәк"

Мухбиримиз нуриман
2021-07-30
Share
Том суози: Америка дөләт мәҗлис әзаси том суози(Tom Suozzi) йиғинда сөз қилмақта. 2020-Йили 23-апрел, вашингтон.
AP

29-Июл күни америка дөләт мәҗлис әзалиридин том суози вә киристофер симис "америка дөләт мәҗлиси уйғур қоллаш гурупписи" (Uyghur Caucus) қурулғанлиқи һәққидә бирләшмә баянат елан қилған.

Баянатта дейилишичә, мәзкур гуруппа хитай компартийәсиниң уйғур районидики уйғурларға қаритилған системилиқ кишилик һоқуқ дәпсәндичиликигә болған тонушни юқири көтүрүш вә 21-әсирдики әң чоң системилиқ елип бериливатқан кишилик һоқуқ дәпсәндичиликини һәл қилишни мәқсәт қилған қанунларни қоллаш үчүн хизмәт қилидикән.

Америка дөләт мәҗлис әзаси киристофер симис(Christopher Smith) йиғинда сөз қилмақта. 2020-Йили 23-апрел, вашингтон.
Америка дөләт мәҗлис әзаси киристофер симис(Christopher Smith) йиғинда сөз қилмақта. 2020-Йили 23-апрел, вашингтон.

Авам палата әзаси том суози әпәнди баянатта мундақ дегән: "аддий қилип ейтқанда, биз 21-әсирдики хитай компартийәси тәрипидин елип бериливатқан, кәң көләмдә сиситемилаштурулған кишилик һоқуқни дәпсәндә қилиш һәрикити тоғрисида сөзләватимиз. Дөләт мәҗлиси әзаси болуштин башқа, инсан болуш сүпитимиз билән бизниң һәр қандақ йәрдә харлиниватқан негизлик инсаний иззәт-һөрмәт вә диний әркинликни қоғдаш мәҗбурийитимиз бар".

Киристофер симис әпәнди мундақ дегән: "хитай компартийәсиниң уйғурлар вә қазақларға охшаш мусулман топлуқларға қарита елип бериватқан ирқий қирғинчилиқи вә кәң көләмдә лагерларға солиши қәбиһ җинайәтләрдур. Ши җинпиңниң пүткүл бир топлуқни қийнап йоқитишқа урунушиға америка сүкүт қилалмайду. ‹Америка дөләт мәҗлиси уйғур қоллаш гурупписи' зулумға учраватқан бу мәзлумлар билән бирлишип, хитай һөкүмитиниң уйғур районидики вәһший кишилик һоқуқ дәпсәндичиликигә диққәт қилиду вә дунядики әң еғир кишилик һоқуқ дәпсәндичиликини түгитиш үчүн тиришиду".

Уйғур һәрикити тәшкилатиниң бу һәқтә бәргән баянатиға қариғанда америка дөләт мәҗлисидики мәзкур "америка дөләт мәҗлиси уйғур қоллаш гурупписи" қуруш тәшәббусини уйғур һәрикити тәшкилати оттуриға қойған. Уйғур һәрикити тәшкилатиниң рәиси рошән аббас ханим бу һәқтә зияритимизни қобул қилип мундақ деди: "бу хил гуруппини қуруш узун йиллиқ үмидимиз иди. Уйғурларниң бешиға кәлгән еғир зулум бу гуруппини қуруш тәқәззасини техиму күчәйтти".

Том суози әпәнди өзиниң иҗтимаий таратқу бетидә уйғурларниң авази болидиғанлиқини ейтқан вә мәзкур гуруппа һәққидә мундақ дәп язған: "түнүгүн мән хитай компартийәси садир қилған 21-әсирдики әң чоң кишилик һоқуқ дәпсәндичиликини һәл қилиш үчүн, партийә һалқиған ‹америка дөләт мәҗлиси уйғур қоллаш гурупписи' қурушқа ярдәм қилдим".

Том суози әпәнди йәнә иҗтимаий таратқу бетидә 27-июл күни долан уйғур рестораниниң хоҗайини хәмит кирим әпәндиниң аилиси билән көрүшкәнликини һәмбәһирлигән, вә мундақ дәп язған: "биз уйғурларниң һекайисини сөзлишимиз керәк. Бүгүн мән 2017-йилдин башлап америкада яшаватқан уйғур мусулман хәмит керим вә униң аилисидикилири билән көрүштүм. Хәмит маңа өз аилиси вә башқа уйғурларниң шинҗаңда баштин кәчүрүватқан кишини ечиндуридиған реаллиқи тоғрисида сөзләп бәрди. Мән хитай ишилири иҗраийә комитетиниң әзаси болуш сүпитим билән хитай компартийәсиниң уйғур мусулманлириға қиливатқан зиянкәшликигә қарши туримән. Биз чоқум мәҗбурий әмгәккә, җинсий паракәндичиликкә, мәҗбурий туғмас қилиш вә диний етиқад әркинликигә тосқунлуқ қилишқа қарши турушимиз керәк".

Рошән аббас ханим мәзкур гуруппиниң америка дөләт мәҗлисидики роли һәққидә мундақ деди: "буниңдин кейин дөләт мәҗлисигә, ақсарайға сунулмақчи болған уйғурларға аит һәрқандақ бир қарар болса мушу гуруппа биваситә суналайду".

Рошән аббас ханим ахирида "америка дөләт мәҗлиси уйғур қоллаш гурупписи" билән бирлишип елип баридиған хизмәтлири тохталди: "алдимизда қилидиған нурғун ишлар бар, мәсилән олимпикни байқут қилиш мәсилиси. Йәнә мақуллинишни сақлаватқан бир қанчә қанун-лайиһәләр бар. Қисқичә қилип ейтқанда америка дөләт мәҗлисидә уйғурларниң мәсилисини күнтәртиптә тутуп туридиған бир мунбәр шәкилләнди".

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт