Amérika kéngesh palatasi maliye qanun chiqirish komitétining ispat anglash yighini ötküzüldi

Muxbirimiz jewlan
2020-09-18
Élxet
Pikir
Share
Print
17-Séntebir ötküzülgen, amérika kéngesh palatasi maliye qanun chiqirish komitétining "Uyghur rayonidiki mejburiy emgektin kelgen import mallarni cheklesh" ispat anglash tor yighinining uqturushi.
17-Séntebir ötküzülgen, amérika kéngesh palatasi maliye qanun chiqirish komitétining "Uyghur rayonidiki mejburiy emgektin kelgen import mallarni cheklesh" ispat anglash tor yighinining uqturushi.
Social Media

17-Séntebir, amérika kéngesh palatasi maliye qanun chiqirish komitétining "Uyghur rayonidiki mejburiy emgektin kelgen import mallarni cheklesh" ispat anglash tor yighini ötküzüldi. Yighin'gha amérika kéngesh palatasining jumhuriyetchiler we démokratlardin teshkil tapqan maliye qanun chiqirish komitéti ezaliridin éril bluminawur (Earl Blumenauer), bil paskrél (Bill Pascrell), térri siwél (Terri Sewell) qatarliq on nechche kéngesh palata ezasi qatnashti.

Yighinda Uyghur herikiti teshkilatining bashliqi roshen abbas xanim, ishchilarning hoquq-menpe'etini qoghdash birleshmisi mudiri skot nowa (Scott Nova), istratégiye xelq'ara tetqiqat merkizining aliy tetqiqatchisi, kishilik hoquqni teshebbus qilish ijra'iye mudiri émiy lér xanim (Amy Lehr), amérika emgekchiler we sana'etchiler birleshmisi xelq'ara bölümining mudiri kétiy fin'gold xanim (Cathy Feingold), amérika kiyim-kéchek we ayagh kespi jem'iyitining bash diréktori stifin lamar (Stephen Lamar) qatarliqlar ispat berdi. 

Bu qétimliq ispat anglash yighinigha amérika kéngesh palata ezasi éril bluminawur riyasetchilik qildi. U bashlinish sözide mundaq dédi: "Tramp hökümiti soda ishliri guruppisi bügün Uyghur rayonidiki mejburiy emgektin kélidighan import mallargha cheklime qoyush heqqide ispat anglash yighini ötküzdi. Mejburiy emgek zamaniwi qulluq démektur. Ispatlargha asaslan'ghanda, xitay hökümiti Uyghur qatarliq musulman milletlerni pilanliq, sistémiliq halda assimilyatsiye qilmaqta, ularni mejburlap ishlitip her xil mehsulatlarni ishlepchiqarmaqta. Maliye qanun chiqirish komitétimizning zamaniwi qulluq mesilisini hel qilish tarixi uzun bolup, mejburiy emgektin kelgen mehsulatlarning amérika bazirida sétilishini chekleshke kapaletlik qilalaydu. Amérika dölet mejlisi bir esir ilgirila qanun maqullap, bundaq mallarning amérikagha kirishini chekligen. Amérikining bu qanuni kishilik hoquq we ishichilarning hoquqini qoghdashtek exlaq prinsipi, shundaqla adil riqabetni saqlashtek soda prinsipi üstige qurulghan".

U yene sözide, amérikada gerche mushundaq qanun bolsimu amérika zawutlirining amérikadiki istémalchilarning éhtiyajini yéterlik qamdiyalmaywatqanliqi seweblik bu qanunning ijra qilinishida égiz-peslik körülgenlikini, istémalchilarning éhtiyaji peyda qilghan yochuqning aqiwet exlaq we adilliq prinsipida yochuq peyda qilghanliqini, shimaliy amérika erkin soda kélishimi(NAFTA )ge eza döletlerningmu buninggha emdi xatime bérishi kéreklikini otturigha qoydi, andin xitayning Uyghur rayonidiki milletlerge zulum sélishini toxtitish üchün xitayning ularni qul qilip ishlepchiqarghan mehsulatlarni amérikagha import qilishni tézdin chekleshning nahayiti muhimliqini tekitlidi. U bu ishta amérika dölet bixeterlik minisitirliqining uchur-alaqe jehette hemkarlishishining zörürlükini, amérika fédératsiye hökümitining qanun ijra qilish méxanizmini kücheytip, her qaysi organlarni öz'ara maslashturush kéreklikini bildürdi hemde bu qétimliq ispat anglash yighinining xitaygha cheklime qoyidighan qanun we siyaset belgileshtiki rolini eskertti.

Yighinda birinchi bolup ispat bergen roshen abbas xanim xitayning Uyghurlargha yürgüzüwatqan qebih jinayetlirini birmu bir körsitip, 3 milyon Uyghurning lagérlagha qamilip jismaniy we rohiy jehettin weyran qilin'ghanliqini, bezilirining qiyin-qistaqta ölüp, bezilirining lagér sirtida qul qilin'ghanliqini, bularning tamamen irqiy qirghinchiliq ikenlikini ochuq otturigha qoydi؛ xitayning Uyghurlarni qul qilip qan-terini sümürüwatqanliqini, gherb elliridiki bezi shexsler, organlar we shirketlerning bu irqiy qirghinchiliqqa shérik bolup, zamaniwi qulluqtin menpe'etliniwatqanliqini éniq pakitlar bilen bayan qildi, bu jeryanda hedisi we yoldishining a'ile-tawabi'atliri uchrighan ziyankeshlik heqqide guwahliq berdi.

Roshen abbas xanim bu qétimliq ispat anglash yighinining "Uyghur mejburiy emgekning aldini élish qanun layihesi" ning dölet mejliside maqullinishi üchün bésilghan muhim qedem ikenlikini, Uyghur herikiti teshkilatining bu qanunning maqullinishi üchün izchil tiriship kéliwatqanliqini bildürdi.

Ishchilarning hoquq-menpe'etini qoghdash birleshmisi mudiri skot nowa bu yighinda bergen ispatida walmart, amazon, zara qatarliq chong shirketlerning xitaydin kiyim élip sétip köp payda tapidighanliqini, xitaydiki emgek küchi erzan bolghachqa méiliningmu erzan bolidighanliqini, chünki ularning xitayda qul qilin'ghan insanlar ikenlikini otturigha qoydi. U yene bezi shirketlerning paydini dep exlaqni qayrip qoyidighanliqini, hetta köz boyamchiliq qilidighanliqini, qanun yochuqliridin paydilinidighanliqini, shunga xitayning mejburiy emgekke chétishliq mélini import qilishni chekleshte amérika tamozhnisi we chégra mudapi'esi idarisining rolini kücheytish kéreklikini bildürdi.

Kishilik hoquqni teshebbus qilish ijra'iye mudiri émiy lér xanim bu yighinda bergen ispatida aldi bilen Uyghur rayonidiki mejburiy emgekning bashqa jaylardikige oxshimaydighanliqini, uning Uyghurlarni din we medeniyet jehette basturushning bir qismi ikenlikini bildürdi. U yéza igilik, toqumichiliq, renglik métal, éléktr eswabliri we bezi kan mehsulatlirining xitayda ishlepchiqirilip, üchinchi dölet arqiliq amérikagha kélidighanliqini, teminlesh zenjirining deslepki ikki halqisida mejburiy emgekke chétishliq mesile körülgen bolsa waqtida bayqash we tedbir qollinish kéreklikini otturigha qoydi. U yene "Amérika buninggha qarita köp tereplimilik siyaset tüzüshi we ittipaqdash döletlernimu shundaq qilishqa qayil qilishi kérek؛ magnitiski qanunini qet'iy ijra qilip, Uyghur rayonidiki mejburiy emgekke sélish jinayitige chétishliq xitay emeldarlirini jazalash kérek" dédi.

Amérika emgekchiler we sana'etchiler birleshmisi xelq'ara bölümining mudiri kétiy fin'gold xanim Uyghur rayonidiki zamaniwi qulluq mesilisini hel qilishta xelq'araliq ishlarda aktip rol oynawatqan amérika bashchiliqidiki démokratik döletlerning, b d t kishilik hoquq kéngishi, xelq'ara emgekchiler teshkilati, dunya soda teshkilati qatarliq xelq'araliq teshkilatlarning emdi birlikte heriketlinishi kéreklikini alahide tekitlidi؛ mezkur teshkilatlarning birlikte xelq'araliq teptish orgini tesis qilip, Uyghur rayonidiki mejburiy emgekke sélish jinayitini tekshürüshi we uningdin nep alghan barliq shirketlerning xelq'araliq sodisini derhal toxtitishqa atlinishi lazimliqini bildürdi. U mundaq dédi: "Biz amérikaning choqum özide bar bolghan soda we iqtisad tedbirlirini ishqa sélip, Uyghur rayonidiki emgekchilerning hoquqi we adil soda muhitini qoghdaydighan muhit berpa qilishqa tirishishini, insanlarni xarlaydighan undaq qebihlik we nomussizliqni tügitishke atlinishini ümid qilimiz". 

Amérika kiyim-kéchek we ayagh kespi jem'iyitining bash diréktori stifin lamar bu yighinda ispat bérip, "Uyghur rayonidiki emgek küchi depsendichilikige taqet qilghili bolmaydu" dédi. U amérikadiki top we parche sétish dukanlirida bu xil mejburiy emgek mehsulatlirining mewjutluqini, buning bilen jan baqidighanlarning az emeslikini, u xil mehsulatlarni import qilish we sétishni chekleshte hökümetsiz teshkilatlar we ishchilar uyushmisining rolidinimu paydilinish kéreklikini otturigha qoydi. 

Yighinning dawamida amérika kéngesh palatasi maliye qanun chiqirish komitétining ezaliri ispat bergüchilerdin so'al soridi. Ispat bergüchiler öz xizmet da'irisidiki ishlardin melumat berdi we pikirlirini otturigha qoydi. Ikki terep Uyghur rayonida mejburiy emgekni toxtitish mesilisi heqqide etrapliq pikir almashturdi we munazire qilishti.

Roshen abbas xanim bu xil qanun layihelirining amérika siyasitidiki ehmiyitini chüshendürüp, "Siyasetchiler ötkünchi bolsimu qanun-nizam saqlinip qalidu" dédi. U yene "Bügünkidek weziyette xitay bilen soda qilish Uyghurlargha irqiy qirghinchiliq yürgüzüshke shérik bolghanliq. Biz bu nuqtini her da'im tekitlesh arqiliq, xitay bilen soda qiliwatqanlarni bu qilmishtin waz kéchishke ündep turushimiz lazim" dédi.

Toluq bet