Qirghizistan Uyghurliri yash-ösmürlerning öz ana tilini öginishige alahide ehmiyet bermekte

18-Féwral küni bishkekte qirghizistan Uyghurliri “Ittipaq” jem'iyitining idariside ana til pa'aliyiti ötküzüldi. Pa'aliyet “Bowa-momaylar we newriliri” namida yash-ösmürler arisida Uyghur tilini söyüsh dolqunlirini kücheytish we omumlashturush meqsitide uyushturuldi.

Igilinishiche yanwar éyida “Ittipaq” jem'iyitide özgirishler bolup ötti. Jem'iyet terkibidiki bir qanche komitétlarning re'isliri özgertildi. Shundaq qilip yashlar komitétining re'islikige ilzat kerimof, ma'arip komitétining re'islikige zarina ibdiminowa-kerimowa, medeniyet komitétining re'islikige gülnaz mexsutowalar teyinlendi.

Her üch re'is bilimlik we yéngi köz qarashlargha ige Uyghur yashliridur. Mezkur komitétlarning teshebbuskarliqida xelq'ara ana til künige béghishlap yash-gödekler üchün ana-til musabiqisi uyushturuldi. Musabiqining dawamida balilargha bir chöchek oqulup üstidin so'allar we türlük tapshuruqlar bérildi. Bowa-momaylar perzentlirining so'allargha jawab bérishige yardem qilishti.

Mezkur pa'aliyetke newrisi ezize bilen qatnashqan nowopokrowka mehellisining yigit béshi gheyret jahanof ziyaritimizni qobul qilip, öz pikirliri bilen ortaqlashti. Uning köz qarishiche bu pa'aliyetning asasiy meqsiti yash ewladlargha “Ittipaq” jem'iyitini tonushturush we ana tilda sözleshni ögitishtin ibarettur.

Mezkur pa'aliyetni hem bowaylar, hem newriler bek yaqturushti. Ular qiziqip tapshuruqlarni atqurup, yéngi sözlerni yadlap bir-biri bilen ana tilda sözlep özliri xushal bolushti. Pa'aliyetke 7 yashtin 14 yashqiche ösmür qatnashqan bolup, ularning köpinchisi bishkek shehirining etrapidiki yézilardin kelgen. Pa'aliyetke qatnashqan hediye bilen yusüpbek ziyaritimizni qobul qilip murasim dawamida jiq sözlerni ögen'genlikini we kélerki musabiqilerni teqezzaliq bilen kütidighanliqlirini éytishti.

Qirghizistan Uyghurliri arisida Uyghur tili mesilisi eng chong we muhim mesililerdin biridur. “Ittipaq” jem'iyiti bu mesilini hel qilish üchün bezi tedbirlerni almaqta, jem'iyetning idariside Uyghur til kursliri échilghan, gézit sehipiliride Uyghur tilida türlük shé'ir-hékayiler bésilmaqta, hem ana til bayramlirini oxshimighan halda uyushturushqa tirishmaqta. Mezkur pa'aliyetke tamashibin süpitide qatnashqan jama'et erbabliridin abduméjit hajim mezkur ana til pa'aliyitining balilarning ana til öginishi üchün paydiliq bolghanliqini bildürdi.

Uyghur ana tili musabiqisi qirghizistanda birinchi qétim uyushturulghan. Kéyinki yillarda “Ittipaq” jem'iyiti türlük medeniyet pa'aliyetliri uyushturghanidi. Bu qétim ma'arip we medeniyet komitétlirining teshebbuskarliqida til öginish nishan qilin'ghanidi. Musabiqe üchün “Ittipaq” gézitining muherrirliri teripidin chöchekler we tapshuruqlar teyyarlandi, musabiqe oyun shekilde ötküzülüp balilar Uyghur tilida tartinmay sözleshke shara'itlar tüzüldi. Radi'o ziyaritimizni qobul qilghan musabiqige qatnashquchi zulpiye ghilajidin pa'aliyetning bek qiziqarliq ötkenlikini tekitlep, shu xil pa'aliyetlerni imkan qeder köprek uyushturushni tewsiye qildi.

“Ittipaq” jem'iyiti qirghizistan Uyghurlirining köp yillardin buyan her xil medeniyet we bashqa xil nuqtilardiki pa'aliyetlerni uyushturup kéliwatqan ammiwi teshkilati bolup, Uyghur tilini terghib qilish ularning muhim wezipiliridin hésablinidu.