Қирғизистан уйғурлири "ана тил" байримини тәнтәнилик қутлуқлиди

Ихтиярий мухбиримиз ферузә
2021-02-22
Share
Қирғизистан уйғурлири Қирғизистан уйғурлириниң "иттипақ" җәмийити уюштуруши билән өткүзүл "ана тил" күнигә беғишланған "уйғур мәдәнийәт фестивали" мурасимидин көрүнүш. 2021-Йили 19- феврал, қирғизистан.
RFA/Féruze

19-Феврал күни, қирғизистан уйғурлириниң "иттипақ" җәмийити уюштуруши билән "ана тил" күнигә беғишланған "уйғур мәдәнийәт фестивали" мурасими өткүзүлди. Мурасим бишкәк шәһиридики "ават" ашханисида өтти. Мәзкур мурасимға бишкәк шәһири вә чуй наһийәсидики ала-тав, кәң-булуң, лебединовка, шәрқ вә фрунзе йезилардики, шундақла тоқмақ вә қара-балта шәһиридики мәктәпләрниң оқуғучилири қатнашти.

Мурасимниң асаси мәқсити-уйғур тилини сақлап қелиш омумлаштуруш, уйғур мәдәнийитини вә тилини өгинишкә һәрикәтләндүргүч күч бериштин ибарәт икән. Мәзкур мурасимға үч яштин он төрт яштики балилар қатнашти.

Қирғизистан уйғурлириниң

Паалийәт давамида уйғур тилида әнәнивий нахшилар вә миллий уссуллар орундалди, ана тил вә уйғур хәлқи тоғрисидики шеирлар оқулди, һәтта уйғур миллий марши оқулди.

Зияритимизни қобул қилған баһалиғучилар өмики әзаси асийәм моллабақийева яш қатнашқучиларниң уйғур тилида декламатсийә қилғанлиқини ейтип, келәчәктә улар техиму өсүп уйғур хәлқини пәхирләндириду дегән үмиди барлиқини изһар қилди.

Мәзкур мурасимға қатнашқан гулбаһар ханим зияритимизни қобул қилип "уйғур мәдәнийәт фестивали" мурасими чоң әһмийәткә игә икәнликини тәкитлиди.

Шуни тәкитләп өтүш керәкки, қирғизистан мәктәплиридә уйғур тили синиплири йоқ. Әмма шундақ болсиму уйғур муәллимләр балиларға уйғур тилида шеирларни ядлитип, уларниң уйғур миллий кимликини унутмаслиқи үчүн уйғур балилирини мәзкур мурасимға башлап келишипту. Улар "лебединовка" йезиси мәктипидики математика муәллими рәйһан мусаханова вә "шәрқ" йезисиниң мәктипидики рус тили муәллими рәна қасимовалардур. "шәрқ" йезисидин кәлгән саадәт сәлимова "уйғурум сән" шеирини оқуп тамашибинларниң қизғин алқишлириға еришти.

"уйғур мәдәнийәт фестивали" икки саәттин ошуқ давам қилди вә наһайити достанә кәйпиятта өтти. Паалийәт давамида ихсан әбдурейимоф "хәлқимниң зари" нахшисини орундиди, бишкәк шәһиридин "севим", қара балта шәһиридин "сәнәм", фрунзе йезисидин "келәчәк" уссул ансәмбиллири вә новопокровка йезисидики мәктәпниң оқуғучиси руфина насирҗанова уйғур миллий уссуллирини орундиди. Һәрбир қатнашқучиға уйғур допписи, уйғур көңлики вә уйғур миллий рәсимлири совғат қилинди. Булар ичидики фрунзе йезисидики "келәчәк" уссул гурупписиға сәһнә кийими тәқдим қилинди

Қирғизистан уйғурлири "иттипақ" җәмийити аяллар кеңишиниң рәиси турсунай ислам ханим зияритимизни қобул қилип, қатнашқучиларға тәшәккүр билдүрүп, мурасим өз мәқситигә йәткәнликини тәкитлиди.

Ана тил күнини хатириләш мурасимлири йәнә җалал-абад вә ош шәһәрлиридиму уюштурулди. Қирғизистанниң һәрқайси йеза-шәһәрлиридә уюштурулған ана тил байримиға уйғур җамаити актиплиқ билән қатнишип, көргәзмиләрни уюштурушти.

Қирғизистанда һөкүмәт мәлумати бойичә 60 миңға йеқин уйғур яшайду. Әмма уларниң сани буниңдин көп икәнликиму ейтилиду. Бирақ қирғизистанда һазирғичә бирму мәхсус уйғур мәктипи ечилмиған. Уйғур балилири өз ана тилини өйдә, бәзи муәллимләрдин вә иштин сиртқи курслардин өгинип кәлмәктә. Ош вә җалал-абад қатарлиқ җайлардики зор сандики уйғурларниң пүтүнләй өз тилини йоқитип, асасән өзбекилишип кәткәнлики мәлум.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт