Германийәдә уйғур ана тил паалийити өткүзүлди

Ихтиярий мухбиримиз әкрәм
2020-03-02
Share

Германийәдә өткүзүлгән ана тил паалийити һәр қайси әлләрдин кәлгән уйғур җамаитиниң қизғин алқишиға еришти.

1-Март күни "германийә уйғур анилар бирлики" ниң уюштуруши, "боғда ана тил мәктипи" оқуғучилириниң рол елиши билән мюнхен шәһиридә рәңгарәң мәзмунларға толған ана тил паалийити өткүзүлди. Паалийәт шәрқий түркистанниң истиқлал марши билән башланди.

Паалийәткә германийәниң һәрқайси шәһәрлиридин кәлгән көплигән уйғурлар иштирак қилиш билән биргә қошна дөләтләрдинму бир бөләк уйғурлар келип қатнашти. Йәрлик герман аһалилиридинму бәзи кишиләр бу сорунға дахил болди.

Хитай һакимийити уйғур диярида җиддий рәвиштә тил, мәдәнийәт, сән´әт вә өрп-адәт қирғинчилиқи йүргүзүватқан мушундақ бир заманда "германийә уйғур анилар бирлики" ниң бир қанчә айлар тәйярлиқ қилип, зор бәдәлләр һесабиға уйғур миллий кимликини қоғдаш һәм тәшәббус қилиш мәқситидә уюштурған бу паалийити уйғур җамаитиниң қизғин алқишиға, қайиллиқиға сазавәр болди.

Зал ичи уйғурчә кийингән ата-анилар, сәбий омақ балилар билән лиқ толған иди. Сәһнидә орунлиниватқан һәр бир пәрдә оюн тамашабиларниң қәлбини ләрзигә салатти. ялғуз кишилик нахша, опчә нахша, итот, бир пәрдилик драма, тепишмақ, шеир, қошақ, музика һәмдә ләрзан уйғурчә уссуллар кишиләрни реял муһиттин айрип, қоюқ миллий түс алған ғайиви уйғур дунясиға башлап кирәтти. Ана тилни қәдирләш, уйғур мәдәнийитини қоғдаш, уйғур өрп-адәтлиригә садиқ болуш, җаза лагерлириға қарши күрәш қилиш, "шәрқий түркистанниң азадлиқи үчүн бәдәл төләш" мәзмун қилинған һәр түрлүк номурлар бириниң арқидин йәнә бири орундинип, зал ичини алқиш садалириға толдуруп туратти. Буларниң һәммиси уйғур диярида чәкләнгән иди.

"германийә уйғур анилар бирлики" ниң әзалиридин һәлимә ханим бу һәқтә тохталғанда бүгүнки бу паалийәтниң һәр җайдин кәлгән уйғур җамаитиниң юқири баһалириға еришкәнликини әскәртип өтти. Германийәниң карлсруһе шәһиридин келип уйғур ана тил паалийитигә қатнашқан уйғур зиялийси әнвәр әпәндиму нәқ мәйдандин зияритимизни қобул қилғанда көплигән ата-аниларниң һаяҗандин көз яшлирини төккәнликини тилға алди.

Сәһнидә номур көрситиватқан омақ уйғур пәрзәнтлириниң кичиклири әмдила 5 яшқа киргән иди. Уларниң үсти-бешидики канвай көйнәк, бадам доппилар, ай-юлтуз сүрити чүшүрүлгән галастуклар, уларниң чүчүк тилларда ейтиватқан декламатсийәси, қошақлири яки сәбийләрчә уссуллири кишиләрниң һәвисини кәлтүрәтти. Буларниң хитайниң мәдәнийәт қирғинчилиқиға қарши тиркишиш һесаблинидиғанлиқини илгири сүргән уйғур зиялийси аблимит турсун әпәнди паалийәт хатимисидә қилған сөзидә "биз уйғурниң йоқалмайдиғанлиқини вә хитайниң бу милләтни һәрнемә қилипму йоқиталмайдиғанлиқиниң җанлиқ испатини йәнә бир қетим көрдуқ," дегәнләрни тилға алди.

Қоюқ миллий байрам кәйпияти һасил қилған бу паалийәт чүштин кейин саәт 13:00 да башлинип 16:00 дин ашқанда ахирлашти. Көңүллири яйриған ата-анилар оюн ахирида бу вақитниң қандақ өтүп кәткәнликини туймай қалғанлиқини билдүрүшти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт