Istanbuldiki “Ana til yesli” oqughuchiliri oqush püttürüsh murasimida ana til söygüsini namayan qildi

Sefaköyge jaylashqan sutuq bughraxan ilim we medeniyet wexpisi qarmiqidiki “Ana til yesli we qur'an kursi” ning oqughuchilirining oqush püttürüsh murasimi körünüshi. 2024-Yili 1-iyul, istanbul

1-Iyun küni istanbulning Uyghurlar köp olturaqlashqan sefaköyge jaylashqan sutuq bughraxan ilim we medeniyet wexpi qarmiqidiki “Ana til yesli we qur'an kursi” ning oqughuchiliri oqush püttürüsh murasimi ötküzüp her xil numur körsetti.

Murasimgha sutuq bughraxan ilim we medeniyet wexpi ezaliri, Uyghur teshkilat rehberliri we oqughuchilarning ata aniliri bolup köp sanda kishi qatnashti.

Qur'an kerim tilawiti we istiqlal marshi oqush bilen bashlan'ghan murasimda, ana til yeslining mudiri alimjan sabirli échilish sözi qildi.

RFA/Arslan

Murasimda söz qilghan jama'et erbabi abduqadir yapchan ependi, yeslilerde oquwatqan Uyghur perzentlirige ilim ögitish bilen birge, sherqiy türkistan dewasi üchün xizmet qilidighan, bu dewaning üstide mustehkem turidighan idiyenimu bildürüsh kéreklikini tekitlidi.

Arqidin balilar top-top bolup sehnige chiqip, Uyghur tili we medeniyiti toghrisida her xil shé'ir, nesir we qiziqarliq numurlarni teqdim qilip, özlirining Uyghur tili we medeniyitini söyidighanliqini ipadileshti.

RFA/Arslan

Yesli mudiri alimjan sabirlining bildürüshiche, bu yeslide bu yil 80 etrapida Uyghur perzenti telim-terbiye almaqta iken؛ köpinchisi bashlan'ghuch mektep yéshigha toshmighan balilar bolup, yash perqi boyiche siniplargha ayrilip oquydiken.

Bu yeslidiki oqughuchilargha asasliqi milliy we diniy qimmet qarashlirini tonutush, Uyghur tilidin sawad chiqirish, qur'andin sawaq bérish hemde kündülük turmushta kéreklik bolghan milliy örp-adetlerni ögitish qatarliq telim-terbiye bérilidiken.

Alimjan sabirli bu yeslidiki oqughuchilarning oqush ehwali we ana tili we Uyghur medeniyitige bolghan qiziqishi toghrisida toxtilip mundaq dédi: “Mektep bashlashtin burun ana til sawadini chiqarghan balilar kelgüside ana tilini untup qalmaydiken؛ arida bir mezgil ana tildiki oqush matériyallirini ishletmigen teqdirdimu, kéyin chong bolghanda ana tilini tizlan öginiwalalaydiken. Biz ilgiri oqughan oqughuchilarni közitish arqiliq toplighan tejribilirimizde mushularni hés qilduq”.

Alimjan sabirli ependi Uyghur diyarda Uyghur tili we medeniyitining cheklimige uchrawatqanliqini, shuning üchün chet'ellerdiki Uyghur ösmürlirige Uyghur tili we medeniyitini ögitishning muhimliqini tekitlep mundaq dédi: “Wetinimizde Uyghur tili, Uyghur medeniyiti xeter astida qalghan ehwalda, muhajirette yashawatqan Uyghurlarning öz tili we medeniyitini qoghdishi hem buni kelgüsi ewladlargha ögitishi intayin muhim. Shuning üchün bu xizmetni yesli ma'aripidin bashlap élip méngiwatimiz؛ yesli ma'aripidin kéyinmu bashlan'ghuch we ottura mektep oqughuchilirigha Uyghurlargha xas bolghan milliy we diniy chüshenchilerni özleshtürüsh üchün xizmet qilip kéliwatimiz”.

Murasim jeryanida balilar guruppa halda sehnige chiqip, “Ilim penni söyimen” dégen shé'irni we ataqliq sha'ir abduréhim ötkürning “Iz” namliq shé'irini jarangliq déklimatsiye qilip murasimgha qatnashquchi ata-anilarning qizghin alqishigha érishti.

Yash iduq uzun seperge atlinip chiqqanda biz,

Emdi atqa min'güdek bop qaldi ene newrimiz,

Az iduq müshkül seperge atlinip chiqqanda biz,

Emdi chong karwan atalduq qaldurup chöllerde iz.

Qaldi iz chöller ara gahi dawanlarda yene,

Qaldi ni ni arslanlar deshti-chölde qebrisiz,

Qebrisiz qaldi dimeng yulghun qizarghan dalida,

Gül-chéchekke pürkinur tangla-baharda qebrimiz.

Qaldi iz, qaldi menzil, qaldi uzaqta hemmisi,

Chiqsa buran, köchse qumlar hem kömülmes izimiz,

Toxtimas karwan yolidin gerche atlar bek oruq,

Tapqusi bu izni bir kün, newrimiz-ya ewrimiz.

Murasim axirida balilargha hediye tarqitildi we bu pa'aliyet qizghin keypiyat ichide axirlashti.