Америкида "ана тил күни" алаһидә хатириләнди

Мухбиримиз җүмә
2020-02-23
Share
Ana-Til-Kuni-Ameriki-2020-01.jpg 21- Феврал америкида хатириләнгән "ана тил күни" дин бир көрүнүш. 2020-Йили 21-феврал. Фәйирфәкс, америка.
RFA/Jume

21-Феврал америкида хатириләнгән "ана тил күни" дә муһаҗирәттә ана тилни әвладму-әвлад давамлаштуруш үчүн, уни турмушниң һәрбир һалқисиға сиңдүрүшниң зөрүрлүки тәкитләнди.

Паалийәтни америкиниң вирҗинийә штатиға җайлашқан "меһрибан ана маарипи" җәмийити билән америка уйғур бирләшмиси һәмкарлишип тәшкиллигән. Фәйирфәкс шәһиридики уйғур паалийәт мәркизиниң зали бу алаһидә күн үчүн кәлгән һәр саһә затлири, ата-анилар вә яш-өсмүрләр билән толған иди.

Паалийәткә йәнә мәлум санда уйғурларниң америкилиқ достлириму иштирак қилди.

Бу күнни толиму мәнилик бир күн дейишкә болатти. Чүнки бу күн "дуня ана тил күни" мунасивити билән уйғурлар бир йәргә йиғилип, өз ана тилиға болған сөйгүсини изһар қилишқан бир күн болупла қалмай, бәлки йәнә, уйғур тили үчүн түрмидә азаб чәккән ана тил паалийәтчиси абдувәли аюпму иштирак қилған алаһидә бир күн иди.

Алди билән сөзгә чиққан америка уйғур бирләшмисиниң рәиси қуззат алтай әпәндим йиғин иштиракчилириға рәһмәт ейтқач, абдувәли аюпни қисқичә тонуштурди вә уни сәһнигә тәклип қилди.

Чавак вә алқиш садалири иликидә нутқини башлиған абдувәли аюп уйғур ана тилини муһаҗирәттә қандақ сақлап қелиш һәққидә өз қарашлирини оттуриға қойди. У йәнә, ана тилни шәнбә йәкшәнбиләрдики курсларда аңлайдиған тил әмәс, бәлки уни турмуштики барлиқ һалқиларға сиңдүрүшниң зөрүрлүкини тәкитлиди.

Униң сөзи тамамланғандин кейин униңға җамаәт тәйярлиған бир ләвһә тәқдим қилинди вә ана тил курсиниң ғунчилири бирдин келип униға гүл тутти. Бу көрүнүш интайин тәсирлик болған иди. Абдувәли аюпниң көзлиридинму һаяҗан яшлири әгийтти.

Паалийәт шеир декламатсийә қилиш, нахша музикиларни орунлаш шәклидә давам қилди.

Абдувәли аюп 2011-йили америкадики оқушини тамамлиғандин кейин, юртиға қайтқан вә уйғур тилини қоғдап қелиш үчүн қилған паалийәтлири сәвәблик 2013-йилидин 2014-йилғичә түрмигә ташланған. У түрмидин қоюп берилгәндин кейин түркийәгә келип йәрләшкән вә өткән йили норвегийәгә көчүп кәткән. У бу қетим уйғурларға мунасивәтлик бир муһакимә йиғиниға қатнишиш үчүн америкиға кәлгән иди.

Ахирида зияритимизни қобул қилған абдувәли аюп өзиниң мәзкур паалийәттин алған тәсиратини биз билән ортақлашти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт