Antalyada ötküzülgen taylandche janbazliq musabiqisige qatnashqan Uyghur mahirlar sherqiy türkistan bayriqini namayan qildi

Istanbuldin ixtiyariy muxbirimiz arslan teyyarlidi
2024.05.28
janbazliq-01 Türkiyening antalya shehiride ötküzülgen taylandche janbazliq musabiqiside ghelibe qilghan Uyghur ösmürler longqa alghan körünüsh. 2024-Yili 25‏-may, antalya
RFA/Arslan

Türkiyening antalya shehiride 25‏-may küni ötküzülgen “Korkutan Fight Night” (qorqunchluq jeng kéchisi) namidiki taylandche janbazliq musabiqisige istanbuldiki ataman janbazliq kulubida chéniqiwatqan Uyghur yashlardin abdulla éli, muhemmed salih ataman, muhemmed fetih, abdulbasit wetensewer, abdul'ehed wetensewer qatarliq 5 neper Uyghur ösmür mahir qatniship reqiblirini yuqiri nomur bilen yéngip alqishqa érishti.

Istanbuldiki ataman janbazliq kulubining meshqawuli xalid ataman ziyaritimizni qobul qilip bu qétimqi musabiqining jeryani toghrisida sözlep berdi.

Uning bildürüshiche, bu musabiqige ataman janbazliq kulubida chéniqiwatqanlardin bir türk, bir afghanistanliq özbék bolup, jem'iy 7 neper mahir qatnashqan, bulardin 5 neper ösmür Uyghurlargha wakaliten qatnashqan we musabiqide muhemmed salih ataman, abdulbasit wetensewer uning qérindishi abdul'ehed wetensewer we muhemmed fetih qatarliq töt neper mahir utuq qazinip altun hellik kemerge érishken.

Xalid atamanning bildürüshiche, bu musabiqige ezerbeyjan, iran, afghanistan, rusiye we türkiye qatarliq döletlerning mahirliri qatnashqan bolup, bu musabiqe 3 minuttin 3 qétim oynilidighan musabiqe iken. Musabiqide reqibige kim köp musht orghan bolsa axirida hésablinip shu utqan bolidiken.

Uyghur mahirlar meydan'gha kirishte we reqibini yéngip netije élan qilin'ghan waqitta doppa we kanway könglek qatarliq Uyghur milliy kiyimlirini kiygen shuningdek ularning sherqiy türkistan bayriqini sehnide égiz kötürüp lepilditishi tamashibinlarning alahide alqishigha érishken.

“Korkutan Fight Night” (qorqunchluq jeng kéchisi) namidiki taylandche janbazliq musabiqisi shu küni Sports TV qanili arqiliq neq meydandin biwasite tarqitildi.

Xalid ataman bu musabiqige qatnishishtiki meqsitining Uyghur mahirlarning talanti, jasaritini sinap béqish we Uyghurlarni tonushturushtin ibaret ikenlikini shundaqla musabiqide balilarning chidamliqi we jasaritige apirin oqughanliqini hem kütken netijige érishkenlikini bildürdi.

Xalid ataman sözide buningdin kéyin Uyghur yashlirini chéniqturushta janbazliq boyiche terbiyelesh türini köpeytip, ularni kékbosk, bokis we bashqa türler boyiche terbiyelep musabiqilerge qatnashturush üchün teyyarliq qilidighanliqini, yéngiliq yaritish üchün téximu tiriship chéniqturidighanliqini bildürdi.

Biz yene pikir-qarashlirini élish üchün musabiqide reqibini yéngip utuq qazan'ghan abdulbasit we abdul'ehed qatarliq mahirlarning dadisi abdulhemid wetensewer bilen söhbet élip barduq.

Abdulhemid wetensewer ependi bu qétimqi musabiqige özi biwasite bérip qatnashqan bolup, ikki oghlining utuq qazan'ghanliqidin memnun bolghanliqini we oghulliridin ümidlen'genlikini, kelgüside ularning chong xelq'araliq musabiqilerge qatniship, Uyghurlarni tonushturushqa töhpe qoshushi üchün ularni qollap quwwetleydighanliqini bildürdi.

Abdulhemid wetensewer ependi ikki oghlining chéniqish jeryani toghrisida toxtaldi.

Biz yene bu qétimqi musabiqide ghelibe qazan'ghan abdul'ehed wetensewer bilen söhbet élip barduq. U özining töt yildin buyan chéniqiwatqanliqini, bu qétimqi musabiqide ghelibe qazan'ghanliqini, buningdin töt ay ilgiri ésenlerde ötküzülgen musabiqide ghelibe qazan'ghanliqini, yene 4 aydin kéyin bir musabiqige qatnishish we téximu yaxshi netijilerni qolgha keltürüsh üchün téximu ching tiriship chéniqidighanliqini, shundaqla chong-chong musabiqilerge qatniship Uyghurlar we kök bayraqni tonushturush arqiliq Uyghur millitige töhpe qoshush arzusi barliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.