Адвокат майкил полак: “бизниң аргентина сотиға сунмақчи болған әрзимиз адаләткә қарап ташланған бир қәдәмдур”

Мухбиримиз нуриман
2021-12-15
Share
Адвокат майкил полак: “бизниң аргентина сотиға сунмақчи болған әрзимиз адаләткә қарап ташланған бир қәдәмдур” Әнглийәлик адвокат майкол полак(Michael Polak) әпәнди сипрусниң паралимнийдики фамагуста сот мәһкимисиниң сиртида таратқуларға сөз қилмақта. 2019-Йили 2-өктәбир.
REUTERS

13-Декабир күни “вашингтон почтиси” гезити “олимпик тәнһәрикәт мусабиқиси ечиливатқанда уйғурлар әрзини сотқа тапшурушқа тәйярлиниватиду” сәрләвһилик бир мақалә елан қилған. Мақалидә дейилишичә, дуня уйғур қурултийи вә уйғур кишилик һоқуқ қурулуши хитай һөкүмитиниң уйғурларға йүргүзүватқан “ирқий қирғинчилиқ” җинайити үстидин аргинтина сотиға “универсал башқуруш тәвәлики җинайи ишлар әрзи” ни сунушқа тәйярланған.

Әнглийәлик адвокат майкил полак әпәнди дуня уйғур қурултийи вә уйғур кишилик һоқуқ қурулушиға вакалитән “универсал башқуруш тәвәлики җинайи ишлар әрзи” ни тәйярлашқа башлиған болуп, у бу һәқтә “бирләшмә агенитлиқи” (AP) ға қилған сөзидә мундақ дегән: “бизниң аргентина сотиға сунмақчи болған әрзимиз, адаләткә қарап ташланған бир қәдәмдур.”

Дуня уйғур қурултийиниң рәиси долқун әйса әпәнди бу һәқтә радийомизниң зияритини қобул қилип, мундақ деди: “‛уйғур сот коллегийәси‚ чиқарған һөкүмдин кейин, қолимизда топланған пакит-испатлар билән биз рәсмий һалда сот мәһкимисигә әрз сунушни қарар қилдуқ. Аргинтина соти бундин бурунму мушуниңға охшаш делоларни сотлиған икән.”

14-Декабир күни мәркизи вашингтондики уйғур кишилик һоқуқ қурулуши бу һәқтә баянатта елан қилған. Баянатта көрситилишичә, биринчи қәдәмдә әрзнамә сотқа тапшурулидикән. Баш сотчи мушу әрзнамигә асасән башқа тәптишләр билән бу һәқтә дело турғузуш һәққидә қарар чиқиридикән. Дело турғузуш һәққидә қарар елинғандин кейин, сотниң тәптиш вә тәкшүрүш басқучи башлинидикән. Д у қ вә уйғур кишилик һоқуқ қурулуши хитайниң ирқий қирғинчилиқ вә инсанийәткә қарши җинайәтлири һәққидики дәлил-испатларни сотқа тапшуридикән. Навада бу басқучлар оңушлуқ ишқа ашса, сотчи уйғур қирғинчилиқиға җавабкар болғучи асаслиқ шәхсләрни қолға елиш буйруқи чиқиридикән. Йәни бу буйруқ бойичә, җавабкар шәхисләр аргентина тәвәликигә киргән яки иккинчи бир дөләткә кәлгән һаман уларни сотлиялайдикән. Техиму муһими бу бир тарихий вәқә болуп, уйғурларға қарши зулумниң тунҗи қетим хәлқаралиқ рәсмий бир сот тәрипидин сотлиниши болуп қалидикән.

Майкил полак әпәнди бу һәқтә радийомизниң зияритини қобул қилип мундақ деди: “биз аргнтина сотиға әрз қилишни қарар қилдуқ, чүнки аргинтина соти һоқуқ даириси әң кәң болған әркин һаләттики унверсал сотларниң бири. Хәлқаралиқ қанун тәвәлики бойичә, аргинтина соти уруш җинайәтлири, қийин-қистақ, қирғинчилиқ яки инсанийәткә қарши җинайәтләргә охшаш қилмишлар дуняниң қәйәридә йүз бәргән болушидин қәтийнәзәр, сот ечиш имтиязиға игә. Йеқинда аргинтина өзиниң мушу унверсал имтиязини ишлитип, өзлири мустәқил бир шәкилдә хәлқаралиқ сот ачти. Уйғурларниң ирқи қирғинчлиқ вә инсанийәткә қарши җинайәтниң қурбани болуватқанлиқи һәққидики дәлил-испатлар барғансири толуқланмақта. Биз ишинимизки, биз бу испатларни аргинтина сотиға сунсақ, улар уйғун бир шәкилдә бу әрзни сотқа елип чиқиду.”

Уйғур аптонум районлуқ һөкүмәтниң баянатчиси шү гүйшяң “уйғур сот коллегийәси” ниң һөкүмигә һәр қетимқидәкла инкас қайтуруп, мундақ дегән: “биз аталмиш ‛шинҗаң мәсилиси‚ намида һечкимниң шинҗаңниң ишлириға вә җуңгониң ичкий ишлириға арилишишқа йол қоймаймиз.”

Майкил полак әпәнди ахирида йәнә мундақ дегән: “уйғур районида уйғурларға, уйғурларғила әмәс, бәлки башқа түркий милләтләргиму йүргүзүлүватқан инсанийәткә қарши җинайәтләрни тәкшүрүш, мушу ирқий қирғинчилиқни тохтитишки муһим бир қәдәм. Лекин дөләтләр бу җинайәтләрни тохтитиш үчүн техиму көп күч чиқириши керәк. Иккинчи дуня урушидин кейин пүтүн дуняға ‛қайта тәкрарланмайду‚ дәп берилгән вәдә бүгүнки күндә йәнә қайта тәкрарлиниватиду. Бу җинайәтләргә қарши һәр қайси дөләтләрниң қайтурған инкаси күчлүк болмайватиду. ‛уйғур сот коллегийәси‚ топлиған полаттәк дәлил-испатлар һөкүмәтләрниң әмәлий һәрикәткә өтүши үчүн бесим болиду. Йиқинда йәнә бирләшкән дөләтләр тәшкилати кишилик һоқуқ али киңеши уйғур районидики кишилик һоқуқ дәпсәндичиликлири паш қилинған мәхсус доклатни елан қилиду. Хитайниң уйғурларға қарита йүргүзүватқан җинайәтлирини тохтитиш үчүн елип бириливатқан мушуниңға охшаш һәрикәтләр қар помзикигә охшаш барғансери чоңийип адаләткә қарап илгириләйду. Биз мушундақ җәрянлар арқилиқ уйғур районидики җинайәтләрниң йәнә давамлишиниң алдини елишни үмд қилимиз.”

Долқун әйса әпәнди ахирида муһаҗирәттики барлиқ уйғурларниң бу сот үчүн керәклик болған дәлил-испатлар вә матеялларни тәминләшкә тайяр турушини тәләп қилди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт