Атуш сүнтағдики төкүл мәсчит обурниға айландурулған

Мухбиримиз шөһрәт һошур
2020-08-12
Елхәт
Пикир
Share
Принт
Қағилиқ наһийә базиридики мәсчиткә есилған қизил тәшвиқат лозункиси, 2017-йили июл.
Қағилиқ наһийә базиридики мәсчиткә есилған қизил тәшвиқат лозункиси, 2017-йили июл.
Oqurmen teminligen

Хитай даирилири диний етиқадқа қарши җәң елан қилған йеқинқи үч йилда, уйғур районидики мәсчитләрниң көпинчисини чеқиш вә йоқ қилиш билән қанаәт қилмастин; униң орниға етиқад әһлиниң үстиләп ғуруриға тегидиған ишларни қилған яки мулазимәт орунлирини тәсис қилған. Атушниң сүнтағ йезисидики төкүл мәсчит төвәнгә чүшкән кадирларниң еһтияҗи үчүнла обурнийға өзгәртилгән; чеқилған азна мәсчити орниға һарақ-тамакиму сетилидиған талла базири бәрпа қилинған.

Хитай даирилири лагерлар һәққидә хәлқара җамаәтниң алдида өзини ақлиғанда, болупму ислам дунясиға чүшәнчә бәргәндә, өзлириниң ислам диниға қарши әмәслики, пәқәт террорлуққа вә диний әсәбийликкә қарши икәнликини оттуриға қоюп кәлгәниди. Әмма ашкарилиниватқан миңларчә пакит, хитайниң диний етиқад вә етиқад әһлигә қарши хорлаш вә дәпсәндә қилиш характеридә һуҗум елип бериватқанлиқини дәлиллимәктә. Атушқа қарита елип барған телефон зиярәтлиримиз давамида, атуштики бир он аилә башлиқи, сүнтағдики төкүл мәсчитиниң обурнийға айландурулғанлиқини ашкарилиди. Мәлум болушичә, атуш шәһәр ичидин 3 километирчә узақлиқтики бу мәсчитниң обурнийға айландуруш қурулуши, буниңдин икки йил бурун мәлум бир хитай қурулуш ширкити тәрипидин елип берилған. Алақидар хадимниң ашкарилишичә, сүнтағниң төкүл мәһәллисидә һәммә аилиликләр қорусида обурни болғанлиқи үчүн аммиви бир һаҗәтханиға еһтияҗлиқ кишиләр йоқ икән ; униң үстигә бу мәһәллә, шәһәрдин 3 километир узақлиқта болуп, бу мәһәллигә саяһәтчиләрниңму келиш нисбити нөвәт икән. Әслидә бу мәһәллидә аммиви бир һаҗәтханиға қарита реал бир еһтияҗниң йоқлуқини етирап қилған бу хадим; бу мәсчитниң орниға немә үчүн һаҗәтхана селинғанлиқини өзиму билмәйдиғанлиқини баян қилиш билән бирликтә, буниң пәқәт хизмәт мунасивити билән төвәнгә чүшкән кадирларниң еһтияҗи үчүнла селинғанлиқ еһтималлиқини илгири сүрди. Дейилишичә төкүл мәсчитниң орниға селинған бу обурний қурулуши тамамланған болсиму, техи рәсмий мулазимәт башлимиған.

Йәнә сүнтағда чеқиветилгән азна мәсчитиниң орниға һарақ-тамакиму сетилидиған бир талла базири селинған.

Илгирики ениқлашлиримизда хотәнниң лоп наһийәсидики бир мәсчитниң кәнт көңүл ечиш соруниға айландурулғанлиқи ашкариланған; хотән шәһири илчи йезисидики бир мәсчитниң болса, сичүәндики бир ич кийим фабрикисиниң шөбисигә айландурулғанлиқи дәлилләнгәниди.

Илгири бу темида зияритимизни қобул қилған доктор қаһар барат әпәнди, хитайниң мәсчитләрни чеқиш биләнла қанаәт қилмай, униң орниға миллий өрп-адәт вә динда қаттиқ чәклинидиған иш вә мулазимәт орунлирини тәсис қилиш арқилиқ, етиқад әһлиниң роһини сундурушқа урунуватқанлиқини оттуриға қойғаниди. Көзәткүчи мәмәт тохти әпәнди болса хитайниң мәсчит чеқишни ислам диниға вә уйғурларға қарита бир өчмәнлик вә интиқам туйғуси билән билән елип бериватқанлиқини оттуриға қойған вә буниң ялғуз уйғурларғила әмәс, ислам дунясиға қарита бир җәң елан қилиш икәнликини тәкитлигән.

Юқирида атуш сүнтағдики төкүл мәсчитниң һаҗәтханиға айландурулғанлиқи һәққидә мәлумат бәрдуқ.

Пикирләр (0)
Share
Толуқ бәт