Америка авам палата әзаси америка яшлириға коммунизимниң маһийитини тонутуш үчүн йеңи бир қанун лайиһәси тонуштурған

Мухбиримиз нуриман
2021-12-02
Share
Америка авам палата әзаси америка яшлириға коммунизимниң маһийитини тонутуш үчүн йеңи бир қанун лайиһәси тонуштурған Америка җумһурийәтчиләр партийәсиниң авам палата әзаси мария елвира салазар ханим башқа палата әзалири вә коммунизм қурбанлири вәкиллири билән биргә дөләт мәҗлиси бинасиниң алдида өткүзгән мухбирларни күтүвелиш йиғинидин көрүнүш. 2021-Йили 2-декабир, вашингтон.
Photo: RFA

Америка җумһурийәтчиләр партийәсиниң авам палата әзаси мария елвира салазар ханим 2-дикабир күни 10 дин артуқ башқа палата әзалири вә коммунизим қурбанлири вәкиллири билән биргә дөләт мәҗлиси бинасиниң алдида мухбирларни күтүвелиш йиғини өткүзгән. Мария елвира салазар ханим мәзкур йиғинда "коммунизмниң маһийитини тонутуш қанун лайиһәси" ни тонуштурған.

Мәзкур қанун лайиһәси һәққидә йизилған чүшәндүрүштики мәзмунларға қариғанда, америкада коммунизм идеологийәси яшлар арисида кәң көләмдә тарқилишқа башлиған. Болупму 2020-йилдики хәлқ райини синаш нәтиҗисидин аян болушичә, 2000-йилидин кейин туғулған яшларниң үчтин бир қисиминиң коммунизм идийәсигә маһиллиқи барлиқи мәлум болған.

"коммунизмниң маһийитини тонутуш қанун лайиһәси" ниң асаслиқ мәқситигә мундақ изаһат берилгән: "бу қанун лайиһәси ‹коммунизм қурбанлири хатирә сарийи' арқилиқ маарип саһәсини материял билән тәминләйду. Фонди җәмийәт йәнә толуқ оттура мәктәп оқуғучилириға коммунизм һәмдә мустәбит түзүмниң хәвипи, шундақла униң американиң әркинлик вә демократийә асасий принсиплири билән зитлиқи тоғрисида тәрбийә беришкә ярдәм бериду."

Мария елвира салазар ханим мәзкур қанун лайиһәси һәққидә сөз қилип мундақ дегән: "биз бу йәргә наһайити муһим бир вәзипә үчүн топландуқ. Биз оқуғучилиримизни тәрбийәлишимиз керәк. Улар коммунизимниң һәқиқий маһийитини билидиған кәлгүсиниң игилири, әтиниң рәһбәрлиридур. Бүгүн дөләт мәҗлисидики 60 нәпәр мәҗлис әзалири билән биргә мушу һәқтики қанун лайиһәмизни тонуштурмақчимиз. Мәзкур қанун лайиһәсиниң темисини ‹мәктәпләрдә коммунизмниң маһийитини тонутуш қанун лайиһәси' дәп бекиттуқ. Бу қанун лайиһәси кәлгүси әвлатлиримизға коммунизимниң һәқиқий маһийитини тонутуш үчүн мәктәпләрниң оқутуш материяллирини түзүп чиқиду. Әвлатлиримизға трагидийәлириниң һәқиқий йүзини чүшәндүрүшкә ярдәм бириду. Тарих алиқачан коммунизимниң америкада базири йоқ икәнликини испатлиған. Бу интайин зөүр болған дәрс. Мән улар билән биллә бу қанун лайиһәсини сунғанлиқимдин пәхирлинимән."

Мария елвира салазар ханим мәзкур қанун лайиһәсини тонуштурғандин кейин "коммунизим қурбанлири хатирә сарийи" ниң рәиси анҗирув бирембирг әпәнди коммунизимниң зиянкәшликигә учриғучиларни әсләп өткән вә йәнә мундақ дегән: "бүгүнки күндә биз хитайда коммунизимниң зиянкәшликигә учраватқанларға шаһит болуватимиз. Хитай компартийәси уйғурлар вә башқа етник горуппиларға қарита ирқи қирғинчлиқ йүргүзүватиду. 21-Әсирдики бүгүнки күндә 3 милйонға йеқин уйғур мусулманлар лагерларда тутуп турулуватиду. Уйғур аяллириниң асаси қисими мәҗбури туғмас қилиниватиду, уйғур әрлири мәҗбури әмгәккә селиниватиду. Америка яшлири асасән өтмүштики вә күнимиздики коммунистик риҗиминиң тарихини билмәйду. Милйонлиған кишинң коммунист риҗимниң қурбанлириға айланғанлиқини билмәйду. Шуңа коммунистларниң бәлгилири чүшүрүлгән майкиларни мода дәп, кейип йүрүйду. Америкалиқлар чоқум коммунистик риҗимнң зиянкәшликини тонуп йетиши керәк. Бүгүн тонуштурулған бу қанун лайиһәси филорида шитатида мувәппәқийәтлик өтти. Буниңдин кейин пүтүн филорида шитатидики толуқ оттура мәктәпләр оқуғучилириға коммунизимниң маһийитини тонуштуриду. Биз йәнә башқа 50 шитатниң һәммисидә бу қанун лайиһәсини тонуштуруп, пүтүн америкалиқ яшларға коммунизимниң маһийитини тонутушқа капаләтлик қилишқа тиришимиз."

Мәзкур қанун лайиһәсини тонуштуруш ахбарат елан қилиш йиғиниға коммунистик мустәнит һакимийәтләрдин қичип америкада олтурақлишип қалған кишиләрниң вәкиллри сөз қилған. "уйғур һәрикити" тәшкилатиниң рәиси рошән аббас ханимму хитай компартийәсиниң зиянкәшликигә учраватқан уйғурларниң мәсилисни аңлатқан.

У мундақ дегән: "маарип демократик җәмийәтниң увиси. Биз өз әвладлиримизға инсанийәтниң иззәт-һөрмитини инкар қилидиған коммунизм идеологийәсиниң хәтирини тонутушимиз керәк. Бая беримбирг әпәнди ейтип өткинидәк, мәҗбурий бала чүшүрүш қатарлиқ зиянкәшликләрниң қурбани болуватқан уйғур аяллири хитайниң уйғурларға қаратқан ирқи қириғинчилиқидики җәң мәйдани болуп қалди. Хитай компартийиси диний етиқадқа вә инсанийәткә қарши уруш қиливатиду. Америкада мениң әркин пикир қилғанлиқим үчүн һәдәм доктор гүлшән аббас вә йолдишимниң туғқанлирини хитай компартийәси тутқун қилди. Әркин дуняниң кәлгүси, хәлқара җәмийәтниң зулумға қарши туруш ирадисигә бағлиқ. Биз кейинки әвладлиримиз үчүн, балилиримиз вә нәврилиримиз варислиқ қилидиған инсанийәтниң кәлгүси үчүн, өтмүштики дәһшәтләрдин ибрәт елишимиз керәк."

Мәзкур қанун лайиһәсиниң чүшәндүрүлүшигә қариғанда, әгәр бу қанун лайиһәси мақулланса, коммунизм һәққидә толуқ оттура мәктәп дәрсликлири түзүлидикән. "вәтәнпәрвәрликтики портрет" намлиқ йүрүшлүк тарихи китаблар тәйярлинип, һәрқайсий шитатлар вә йәрлик маарип рәһбәрлирниң тәстиқи билән рәсми дәрслик сүпитидә мәктәпләрдә оқутулидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт