“Jenubiy awstraliye Uyghur tili mektipi” ana til oqutushi bilen milliy medeniyet muhitini qandaq birleshtürdi?

Uyghur ana tili oqutushini Uyghur medeniyiti we bayramliri bilen birleshtürüshtin ibaret emeliy oqutush mitodi, nöwette amérika, yawropa döletliri we awstraliyediki Uyghur ana til mektepliride teshebbus qilinip, ünümi körülmekte. Igilishimizche, awstraliyening adélayd shehiridiki “Jenubiy awstraliye Uyghur tili mektipi” bu yil 5-may künidiki “Uyghur doppa bayrimi” da, bu xil oqutush métodining muweppeqiyetlirini namayan qilghan.

 “Jenubiy awstraliye Uyghur tili mektipi” ning 5-may künidiki pa'aliyiti heqqide féysbuk, instgram qatarliq ijtima'iy taratqularda köpligen sin körünüshliri tarqitilghan. Uningda oqughuchilar bilen ata-anilarning tengla shu künidiki pa'aliyetke qatnashqanliqi, oqughuchilar körsetken sen'et nomurlirining Uyghurlarning kündilik turmush medeniyiti bilen nahayiti muweppeqiyetlik birleshtürülgenliki, shundaqla “Doppa bayrimi” ning muhajirettiki Uyghur yash-ösmürlirige özlirining milliy en'enisi we Uyghurluq kimlikini hés qildurushta muhim sehne bolghanliqi körsitilgen.

 “Jenubiy awstraliye Uyghur tili mektipi” ning nöwettiki mektep mudiri yultuz téyipjan xanimning bildürüshiche, ular bu xildiki pa'aliyetlerni her yili dégüdek ötküzüp kelmekte iken.

Uning bildürüshiche, bundaq pa'aliyetlerde oqughuchilar Uyghur medeniyet muhiti bilen toyun'ghan bayram keypiyatini özi biwasite hés qilidiken, shundaqla oqughuchilarda özini Uyghur medeniyet muhiti ichidiki Uyghur jama'itining bir parchisi dep qaraydighan kimlik tuyghusi küchiyidiken.

Yultuz xanim yene bu yilqi doppa bayrimining mol mezmunluq pa'aliyetler bilen ötküzülgenlikini bildürdi. U, oqughuchilarning Uyghur tilida orundighan sen'et pirogrammilirining muweppeqiyetlik bolghanliqini؛ ularning shu künidiki pa'aliyetler dawamida Uyghurlarning kündilik örp-adetliri, Uyghur yémek-ichmek medeniyiti we méhman kütüsh adetliri bilenmu tonushush imkaniyitige ige bolghanliqini tekitlep ötti.

Mektep mudiri yultuz xanimning bildürüshiche, ular bu yilqi “5-May Uyghur doppa bayrimi” da awstraliyege Uyghur ana til oqutushining emeliy ehwalini tekshürüsh üchün kelgen ana til pa'aliyetchisi abduweli ayup, robért wilson qatarliq tetqiqatchilarnimu kütüwalghan.

Bu munasiwet bilen adélayd shehirige yétip barghan abduweli ayup ependimu radiyomiz ziyaritini qobul qildi.

U, adélayd shehiridiki “Jenubiy awstraliye Uyghur tili mektipi” ning emeliy ehwalini öz közi bilen körgenlikini, bu mektep oqughuchilirining “5-May doppa bayrimi” diki nomurliridin tesirlen'genlikini, shundaqla muhajirettiki Uyghur ana til mekteplirining oqutush métodida emeliy ünümlerning körülüwatqanliqini tekitlep ötti.

Abduweli ayup ependining bildürüshiche, ular özliri ishlewatqan gherb döletliridiki “Uyghur ana til oqutush ehwali” ni tekshürüsh pirogrammisi boyiche, deslep amérika we gérmaniyediki Uyghur ana til mekteplirini ziyaret qilghandin kéyin, bu qétim awstraliyediki Uyghur ana til mekteplirining oqutush ehwalini tekshürüshke barghan iken.

U, bu qétim özining “Jenubiy awstraliye Uyghur tili mektipi” diki birqanche künlük tekshürüshtin kéyin, Uyghur ana tili oqutushini Uyghur medeniyiti we bayramliri bilen birleshtürüp élip bérishning métod jehettiki emeliy ünümining qanchilik boluwatqanliqini téximu éniq hés qilalaydighanliqini tilgha aldi.