Awstraliyede “Biz Uyghurlar bilen bir septe” sho'ari bilen namayish ötküzüldi

3-Ayning 20-küni awstraliyening sidnéy, brisbane, mélborn we adélayd qatarliq 4 chong shehiride oxshash bir waqitta “Biz Uyghurlar bilen bir septe” sho'ari bilen namayish ötküzülgen. Awstraliyediki sherqiy türkistan ammiwi teshkilatliri bilen musulmanlarning ammiwi teshkilatliridin bolup 30 ammiwi teshkilat qatnashqan bu namayishta xitayni Uyghur irqiy qirghinchiliqini toxtitishqa, gherb döletlirini bolsa ukra'inadiki urushni toxtitish meqsiti bilen rusiyege qarshi yolgha qoyghan siyasiy we iqtisadiy bésimni xitayghimu ishlitishke chaqirghan. Biz bu heqte tepsiliy melumat igilesh üchün dunya Uyghur qurultiyining ichki ishlar komitéti mudiri bextiyar böre ependi, dunya Uyghur qurultiyi wekili memet chelepchi ependi, mélborndiki Uyghur pa'aliyetchi alimjan osman we adélayttiki awstraliye sherqiy türkistan jem'iyiti mu'awin re'isi tash yari ependiler bilen téléfon söhbiti élip barduq.

Bextiyar böre ependi “Biz Uyghurlar bilen bir septe” sho'ari astida ötküzülgen namayishning sidnéy shehiridiki jeryani toghrisida melumat bérip mundaq dédi: “Sidnéy waqti on ikkidin ikkigiche ötküzülgen namayishqa ming etrapida kishi ishtirak qildi. Namayishta awstraliye Uyghur jem'iyitining bash katipi zulpiye xanim, dunya Uyghur qurultiyining wekili mehmet chelepchi ependi we yash pa'aliyetchi sümeyye jür'et qatarliqlar nutuq sözlidi.

RFA/Erkin Tarim

Ular sözliride xitayning Uyghur qatarliq sherqiy türkistandiki yerlik milletler üstidin élip bériwatqan irqiy qirghinchiliq, mejburiy emgek, ayallarni qisirlashturush, jaza lagérlirigha solash qatarliqlarni pash qilip, tepsiliy chüshendürdi.

Ziyaritimizni qobul qilghan dunya Uyghur qurultiyining sidnéydiki wekili memet chelepchi ependi bu namayishqa ishtirak qilghan 30 etrapida musulman ammiwi teshkilatlirining pikir birliki hasil qilghanliqini bayan qilip mundaq dédi: “Namayishning ünümi jehettin élip éytqanda xitayning sherqiy türkistanda élip bériwatqan irqiy qirghinchiliqini toxtitish meqsiti bilen 4 témida hem pikir bolduq. Birinchisi bundin kéyin Uyghur teshkilatliri bilen birlikte pa'aliyet élip bérish. Ikkinchisi Uyghur mesilisini keng-kölemde tonushturush, üchinchisi Uyghurlar üchün pa'aliyet élip bériwatqan teshkilatlarni iqtisadiy jehettin qollash. Tötinchisi bolsa xitay mallirini bayqot qilish. Bulardin bashqa namayishqa ishtirak qilghan 30 ammiwi teshkilat gherb ellirini ukra'inadiki urushni toxtitish meqsiti bilen rusiyege qarshi yolgha qoyghan siyasiy we iqtisadiy bésimgha oxshash xitayghimu bésim ishlitish arqiliq irqiy qirghinchiliqni toxtitishqa chaqirdi”.

Awstraliyening mélbornda shehiride ötküzülgen pa'aliyet toghrisida ziyaritimizni qobul qilghan Uyghur pa'aliyetchi alimjan osman ependi, mezkur namayishqa wiktoriye shtatining islam jem'iyitining re'isiningmu ishtirak qilghanliqini, awstraliyediki musulman ammiwi teshkilatlarning “Biz Uyghurlar bilen bir septe” sho'ari astida ötküzülgen bu pa'aliyitining nahayiti muweppeqiyetlik ötkenlikini, ehmiyitining zor ikenlikini bayan qilip mundaq dédi: “Awstraliyening sidnéy, mélborn, brisbane we adélayd qatarliq 4 chong sheherde ötküzülgen namayishning ehmiyiti zor dep qaraymen. Chünki musulman jama'itige Uyghurlarning béshigha kéliwatqan irqiy qirghinchiliq we insaniyetke qarshi jinayetni tonushturush, shundaqla musulman bolmighan xelqlergimu anglitish arqiliq awstraliye hökümitige bésim peyda qilish arqiliq Uyghur irqiy qirghinchiliqini qobul qildurush üchün paydisi zor. Ikkinchidin awstraliyediki musulmanlar bu irqiy qirghinchiliqtin xewerdar bolsa dunyadiki musulman döletlerningmu sükütte turushini buzup, Uyghur irqiy qirghinchiliqini qobul qilishigha paydisi bar dep qaraymen”.

Tash yari ependi adélayd shehirining merkizide élip bérilghan ortaq namayishning yaxshi ötkenlikini bildürdi.

Igilishimizche 30 ammiwi teshkilat ishtirak qilghan 4 chong sheherde oxshash waqitta ötküzülgen bu pa'aliyetni oyushturushqa awstraliyediki Uyghurlarning ammiwi teshkilatliri zor küch chiqarghan we Uyghurlarmu aktip qatnashqan.