Австралийә уйғур җәмийити йеңи нөвәтлик рәһбәрлик һәйити сайлап чиқти

Ихтиярий мухбиримиз әркин тарим
2022-02-28
Share
Австралийә уйғур җәмийити йеңи нөвәтлик рәһбәрлик һәйити сайлап чиқти Мәркизи австралийәниң сидней шәһиридики австралийә уйғур җәмийитиниң сайлимидин көрүнүш. 2022-Йили 27-феврал.
RFA/Erkin Tarim

27-Феврал күни мәркизи австралийәниң сидней шәһиридики австралийә уйғур җәмийитиниң сайлими өткүзүлгән. Сайламға мәзкур җәмийәтниң рәһбәрлири вә әзалири, сидней шәһиридә яшаватқан бир бөлүк уйғур җамаити, шундақла д у қ ниң рәһбәрлири қатнашқан.

Мәлум болушичә, австралийә уйғур җәмийити д у қ ниң сабиқ муавин рәиси мәрһум һәсән һүсән әпәндиниң башчилиқида 2005-йили 9-айниң 25-күни сиднейдә қурулған болуп, бу тәшкилат қурулған күндин тартип дуня уйғур қурултийини изчил һалда д у қ ни қоллап кәлгән. Бу тәшкилат өзиниң низамнамисики һәр 3 йилда бир қетим сайлам өткүзүш бәлгилимисигә бинаән, бу қетимлиқ сайламини 27-феврал күни елип барған.

Сайламдин илгири тәшкилатниң кона рәһбәрлик һәйити сәһнидин орун елип, алди билән өткән 3 йиллиқ хизмәтлири тоғрисида доклат тәқдим қилған. Хизмәт доклатидин кейин, малийә доклати тәқдим қилинған.

Сайламға д у қ вәкили гүлмирә имин ханим башлиқ 3 кишилик бир һәйәт риясәтчилик қилған. Сайлам демократик принсипларға асасән елип берилған болуп, мәмәт обул әпәнди австралийә уйғур җәмийитиниң йеңи нөвәтлик рәисликигә сайланған.

Рәислик сайлимидин кейин, җүрәт абдукерим, гүлмирә зунун, зулфийә әрк вә талғат аббас қатарлиқ кишиләр австралийә уйғур җәмийитиниң идарә һәйәт әзалири болуп сайлап чиқилған.

Йеңи нөвәтлик рәисликкә сайланған мәмәт обул әпәнди зияритимизни қобул қилғанда, бу қетимқи сайламниң нәтиҗилик болғанлиқини муәййәнләштүрди.

Мәмәт обул әпәнди өзини рәисликкә намзат қилип көрситиштики мәқсити тоғрисида тохтилип өтти. У австралийәдә шәрқий түркистан дәваси үчүн наһайити яхши пурсәтләрни туғуватқанлиқини булардин яхши пайдилинип дәвани йеңи бир пәллигә чиқириш үчүн қайта намзат болғанлиқини тәкитлиди.

Җәмийәтниң идарә һәйәт әзаси болуп сайланған җүрәт әпәнди 2005-йили қурулған австралийә уйғур җәмийитиниң бу қетимқи сайламда яшлашқанлиқини, сайламниң демократик усулда елип берилғанлиқини, мәзкур җәмийәтниң бурунқиға охшашла бундин кейинму д у қ ни қоллайдиғанлиқини билдүрди.

Австралйә уйғур җәмийитиниң сабиқ баш катипи, д у қ ичкий ишлар комитетиниң мудири бәхтияр бөрә әпәнди, йиғинда мәрһум сиясий паалийәтчи һәсән һүсән акиниң иш-излириниң әсләп өтүлгәнликини баян қилди. У австралйә уйғур җәмийитиниң дуня уйғур қурултийини қоллашни давам қилидиғанлиқини тәкитләп өтти.

Австралийә уйғурлар әң дәсләп олтурақлашқан дөләтләрдин бири болуп, бу дөләттә австралийә шәрқий түркистан җәмийити, тәңритағ ханим-қизлар уюшмиси, мелборнда викторийә уйғур җәмийити қатарлиқ аммивий тәшкилатлар паалийәт елип бармақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт