Awstraliye Uyghur jem'iyiti yéngi nöwetlik rehberlik hey'iti saylap chiqti

Ixtiyariy muxbirimiz erkin tarim
2022.02.28
Awstraliye Uyghur jem'iyiti yéngi nöwetlik rehberlik hey'iti saylap chiqti Merkizi awstraliyening sidnéy shehiridiki awstraliye Uyghur jem'iyitining saylimidin körünüsh. 2022-Yili 27-féwral.
RFA/Erkin Tarim

27-Féwral küni merkizi awstraliyening sidnéy shehiridiki awstraliye Uyghur jem'iyitining saylimi ötküzülgen. Saylamgha mezkur jem'iyetning rehberliri we ezaliri, sidnéy shehiride yashawatqan bir bölük Uyghur jama'iti, shundaqla d u q ning rehberliri qatnashqan.

Melum bolushiche, awstraliye Uyghur jemiyiti d u q ning sabiq mu'awin re'isi merhum hesen hüsen ependining bashchiliqida 2005-yili 9-ayning 25-küni sidnéyde qurulghan bolup, bu teshkilat qurulghan kündin tartip dunya Uyghur qurultiyini izchil halda d u q ni qollap kelgen. Bu teshkilat özining nizamnamisiki her 3 yilda bir qétim saylam ötküzüsh belgilimisige bina'en, bu qétimliq saylamini 27-féwral küni élip barghan.

Saylamdin ilgiri teshkilatning kona rehberlik hey'iti sehnidin orun élip, aldi bilen ötken 3 yilliq xizmetliri toghrisida doklat teqdim qilghan. Xizmet doklatidin kéyin, maliye doklati teqdim qilin'ghan.

Saylamgha d u q wekili gülmire imin xanim bashliq 3 kishilik bir hey'et riyasetchilik qilghan. Saylam démokratik prinsiplargha asasen élip bérilghan bolup, memet obul ependi awstraliye Uyghur jem'iyitining yéngi nöwetlik re'islikige saylan'ghan.

Re'islik saylimidin kéyin, jür'et abdukérim, gülmire zunun, zulfiye erk we talghat abbas qatarliq kishiler awstraliye Uyghur jem'iyitining idare hey'et ezaliri bolup saylap chiqilghan.

Yéngi nöwetlik re'islikke saylan'ghan memet obul ependi ziyaritimizni qobul qilghanda, bu qétimqi saylamning netijilik bolghanliqini mu'eyyenleshtürdi.

Memet obul ependi özini re'islikke namzat qilip körsitishtiki meqsiti toghrisida toxtilip ötti. U awstraliyede sherqiy türkistan dewasi üchün nahayiti yaxshi pursetlerni tughuwatqanliqini bulardin yaxshi paydilinip dewani yéngi bir pellige chiqirish üchün qayta namzat bolghanliqini tekitlidi.

Jem'iyetning idare hey'et ezasi bolup saylan'ghan jür'et ependi 2005-yili qurulghan awstraliye Uyghur jem'iyitining bu qétimqi saylamda yashlashqanliqini, saylamning démokratik usulda élip bérilghanliqini, mezkur jem'iyetning burunqigha oxshashla bundin kéyinmu d u q ni qollaydighanliqini bildürdi.

Awstralye Uyghur jem'iyitining sabiq bash katipi, d u q ichkiy ishlar komitétining mudiri bextiyar böre ependi, yighinda merhum siyasiy pa'aliyetchi hesen hüsen akining ish-izlirining eslep ötülgenlikini bayan qildi. U awstralye Uyghur jem'iyitining dunya Uyghur qurultiyini qollashni dawam qilidighanliqini tekitlep ötti.

Awstraliye Uyghurlar eng deslep olturaqlashqan döletlerdin biri bolup, bu dölette awstraliye sherqiy türkistan jem'iyiti, tengritagh xanim-qizlar uyushmisi, mélbornda wiktoriye Uyghur jem'iyiti qatarliq ammiwiy teshkilatlar pa'aliyet élip barmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.